Imbamutima za Miss Yassipi wayoboye urugamba rw’intore imbere ya Perezida Kagame (Video)

Yanditswe na Ferdinand Maniraguha
Kuya 9 Kanama 2019 saa 08:57
Yasuwe :
0 0

Tariki ya 8 Kanama 2019 ishobora kutazibagirana mu buzima bwa Miss Uwihirwe Yassipi Casimir nyuma yo kuyobora urugamba mu myiyereko yagaragajwe n’urubyiruko rwitabiriye itorero Indangamirwa icyiciro cya 12.

Ni imyiyereko igaragaza imyiteguro, amayeri n’ibindi ingabo zifashisha ziri ku rugamba kugira ngo zibashe gutsinsura umwanzi.

Urugamba ni kimwe mu bigize imyiyereko izo ntore zeretse Perezida Paul Kagame n’abandi banyacyubahiro bari bitabiriye umuhango wo gusoza ibyumweru bitandatu urwo rubyiruko rwari rumaze rutorezwa mu kigo cy’imyitozo ya gisirikare cya Gabiro mu Karere ka Gatsibo.

Yassipi ni umwe mu bakobwa bitabiriye amarushanwa yo gushaka Nyampinga w’u Rwanda 2019. Yabaye igisonga cya mbere cya Nyampinga.

Mu gihe cy’iminota 13 imyiyereko y’urugamba yamaze, Uwihirwe ni we wari uyoboye urwo rugamba, ayoboye abasirikare b’igihugu cyari cyiswe Rugari, ababwira uburyo bagomba gukoresha ngo batsinde umwanzi bari bahanganye, ni ukuvuga ingabo ziswe ‘Inyangabirama’.

Mbere yo gutangira urugamba nyir’izina, Uwihirwe yabanje gusobanurira Perezida Kagame n’abandi banyacyubahiro uko urugamba ruteguye, akomeza abwira abayobozi b’imitwe y’ingabo uko bari bwitware kugeza ubwo urugamba nyir’izina rwatangiraga.

Ni ibintu yavugaga adategwa, ku buryo hari abaketse ko asanzwe azi ibijyanye n’igisirikare dore ko byanarangiye ingabo yari ayoboye zitsinze umwanzi.

Mu kiganiro uyu mukobwa w’imyaka 19 yahaye IGIHE, yavuze ko ibijyanye n’igisirikare yabimenyeye mu itorero.

Kuba yabashije kuyobora neza, Uwihirwe avuga ko ari uko yatojwe neza kandi agashyiraho umuhate.

Ati “Navuga ko ari amasomo twigishijwe muri rusange aho tuba dusobanurirwa uburyo urugamba rutegurwa ndetse n’uburyo rushyirwa mu bikorwa. Nyuma yo kubyiga tugenda dukora imyitozo itandukanye bikagera ku munsi nyamukuru wo kuba twabyerekana.”

Yakomeje agira ati “Ni ibintu bifata hafi iminota 13 uvuga ibintu ufite mu mutwe, ni akazi navuga ko katoroshye. Bisaba umuhate no kubikora wumva ko ubikunze atari ibintu ukora ngo imyiyerekano irangire.”

Uyu mukobwa asanzwe ari umusizi ukomeye mu bijyanye n’imivugo kandi abahimba imivugo bakunze kuba bafite ubushobozi bwo gufata mu mutwe.

Abajijwe niba kuba asanzwe ari umusizi hari aho bihuriye no kuba yafashe neza imiyoborere y’urugamba mu mutwe, Yassipi yavuze ko bifitanye isano.

Ati “Isano rirahari kuko twari dufite igihe gito ariko ibyo gukora ari byinshi. Bisaba ko hari ukundi kwiyemeza uba ufite haba kubifata mu mutwe, kuba wabivuga imbere y’abantu ntutinye kuvugira mu ruhame.”

Kuba ari we watoranyijwe mu bantu bagera kuri 700 ngo azayobore imyiyereko y’urugamba kimwe mu bice bikomeye, Yassipi yavuze ko ari amahirwe akomeye yahawe.

Mu mpanuro Perezida Kagame yahaye intore zisoje itorero, yazisabye gukoresha uburere zahawe bugaherekeza ubumenyi zakuye mu ishuri ubundi bagateza igihugu imbere.

Ati “Ushobora kujya mu ishuri ukiga ukagira ubumenyi buhanitse byarangiza bigapfa ubusa bigapfira n’igihugu ubusa. Ukiga ukaba umuhanga, ukamenya warangiza kubera ko nta muco, nta burere buhagije, nta kwibaza wowe ubwawe bishingiye kuri ibyo, bya bindi byose ukabihindura ubusa, ukajya mu biyobyabwenge.”

Yassipi yavuze ko uburere no gukunda igihugu ari byo azashyira imbere mu buzima asubiyemo.

Ati “Hari indangagaciro nyinshi byanyigishije ariko by’umwihariko indangagaciro yo gukunda igihugu no kugikorera tutizigamye. Nzabasha gusobanurira abenshi batazi icyo gukunda igihugu bivuze cyangwa batabiha agaciro nkuko bisabwa.”

Uyu mukobwa wazanye n’abandi mu itorero ku wa 24 Kamena 2019, yavuze ko icyabanje kumugora mu byumweru bitandatu yahamaze ari uburyo gahunda zari zipanze, nta mwanya wo gupfa ubusa ariko ngo yaje kubimenyera.

Yavuze ko ikintu gitangaje cyamubayeho ari uko buri gihe yikangaga ifirimbi ya mu gitondo ibabyutsa, akenshi agashiduka yikanze ko bayivugije kandi batarayivuza.

Yassipi ngo azakumbura morale yo mu itorero dore ko abenshi bari bamaze kumenyerana.

Intore zasoje itorero Indangamirwa icyiciro cya 12 ni 698 harimo abakobwa 214 n’abahungu 484. Muri bo 78 baturutse mu bihugu 23 by’amahanga.

Yassipi niwe wayoboye imyiyereko y'urugamba
Yassipi (ibumoso) mbere yo kujya kuyobora imyiyereko y'urugamba
Yassipi asobanurira Perezida uko urugamba rwapanzwe
Bifashishije ikarita bagaragaza uko urugamba ruteguwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza