Ivumburamatsiko kuri Miss Iradukunda Elsa wakiniye Ikipe y’Igihugu mu koga (Video)

Yanditswe na Uwiduhaye Theos
Kuya 10 Gicurasi 2019 saa 09:39
Yasuwe :
0 0

Mu ijoro rya tariki 25 Gashyantare 2017, Iradukunda Elsa yatorewe kuba Nyampinga uhiga abandi mu buranga n’ubuhanga. Yahawe ibihembo bikomeye birimo imodoka nshya ya Suzuki ifite agaciro ka miliyoni 15 Frw.

Ubu imyaka ibiri irihiritse uyu mukobwa abaye ikimenyabose ndetse ni n’umwe mu bitabiriye irushanwa rya Miss Rwanda wagaragaje imishinga ifatika kandi ifitiye inyungu ab’iganjemo rubanda rugufi.

Ni mwene Samuel Mana ufite ibiro by’ivunjisha mu Mujyi wa Kigali rwagati naho nyina akitwa Mukandekezi Christine akora akazi k’ubucuruzi, batuye mu Kagari ka Kanserege, mu Murenge wa Gikondo mu Karere ka Kicukiro.

Iyo aganira aganisha ku kuba afite indoto zo kuzaba umushoramari ukomeye akagera ikirenge mu cy’ababyeyi be yakuze abona bashabika ndetse ubu akaba yaratangiye gukarishya ubwenge mu byerekeye ubucuruzi muri Kaminuza y’u Rwanda.

Kurikira ikiganiro kirekire yagiranye na IGIHE

IGIHE: Ubu uhugiye mu biki ?

Miss Iradukunda: Mpugiye mu masomo ndiga, mpugiye no mu kazi kagiye gatandukanye yaba ari ako kwamamaza ibikorerwa mu Rwanda kuko ndi Ambasaderi wa Made in Rwanda, inshingano z’umuvugizi wa Miss Rwanda ndetse n’izindi nshingano.

IGIHE: Twavuga ko ubundi umunsi wawe uba uteye ute ?

Miss Iradukunda : Biterwa na gahunda mfite ariko icya mbere ni siporo, nyikora saa kumi n’ebyiri za mu gitondo kugeza saa mbili, nyuma y’ibyo rero iyo mfite gahunda mu munsi nkazikora ni mugoroba nkajya kwiga.

IGIHE: Wiga hehe ?

Miss Iradukunda: Muri Kaminuza y’u Rwanda ibijyanye n’ubushabitsi [Business Management].

IGIHE: Kuki aribyo wahisemo ?

Miss Iradukunda: Ni uko nifuza kuba umushabitsi, nakuze mbona ababyeyi banjye aribyo bakora. Mama ni umushabitsi na Papa ni uko, rero nanjye nkura numva aribyo nshaka.

IGIHE: Ni umuhamagaro wo mu muryango noneho ?

Miss Iradukunda : Oya sinavuga ko ari byo ariko nibyo nisanze nkunda nshaka kuzakora.

IGIHE: Abantu benshi baba bifuza ko bakora ibitandukanye nibyo abo bashakanye bakora, wowe wakwishimira ko umugabo wawe yaba akora ubushabitsi nawe aribwo ukora?

Miss Iradukunda: [Aseka] yego rwose nta kibazo. Umuntu wese haba ibyo yiyumvamo, ntabwo namukura mu byo yimariyemo ngo kuko nanjye aribyo nkora.

IGIHE: Kuva wajya muri Miss Rwanda ubona ari iki cyahindutse mu buzima bwawe ?

Miss Iradukunda: Kuva najya muri Miss Rwanda birumvikana nk’umuntu narakuze, yaba mu mitekerereze yanjye nagize inshingano nkiri umwana, hari imiryango myinshi yafungutse muri make yarankujije.

IGIHE: Tubwire ikintu kigaragara wakwishimira Miss Rwanda yakujejeho ?

Miss Iradukunda : Nta kinini cyahindutse gusa Imana nagize sinasesaguye kuko narizigamaga kuva kera, mu bintu bigaragara mfite imodoka imfasha mu kazi. Icyangombwa cyane ni uko yankujije.

IGIHE: Hari andi marushanwa mpuzamahanga waba uteganya kwitabira ?

Miss Iradukunda : Ibijyanye n’amarushanwa mpuzamahanga nitabiriye ni Miss World ariko ibijyanye nayo mba mfite ikipe ibikurikirana ni nayo imenya amarushanwa ngomba kujyamo, kuri ubu kubera izindi nshingano mfite ndumva nta rindi rushanwa nzajyamo ariko na none ntawamenya.

IGIHE: Ni iki wigiye mu irushanwa rya Miss World?

Miss Iradukunda : Icyo nigiyeyo ni uko twese nk’abantu dufite imico itandukanye, amasura atandukanye ndetse n’uruhu rutandukanye ariko turi umwe.

Namenyanye n’abantu benshi, abakobwa 117 . Namenye imico igiye itandukanye, mfite inshuti muri buri gihugu ni ukuvuga ko ahantu hose najya naba mpafite umuntu rero ni ikintu kuri njye cyanshimishije cyane.

IGIHE: Iyo abanyarwanda bagiye mu marushanwa mpuzamahanga usanga benshi bavuga ngo ntibazatsinda ndetse koko akenshi ntibibe, ubona biterwa n’iki ?

Miss Iradukunda : Kuri njye ntabwo navuga ko ari uko tudatsinda kuko urebye nko muri Miss World, uyu ni umwaka wa gatatu tugiyeyo ariko irushanwa rimaze kuba inshuro 68 urumva hagomba kuba ubunararibonye.

Urebye no mu yandi marushanwa abandi bakobwa bajyamo nka Miss Africa dufite Fiona Muthoni wabaye igisonga cya mbere, hari Umunyana Shanitah yakuye ibikombe byinshi muri Miss University Africa rero kuri njye ntabwo navuga ko badatsinda, yego ntibazana umwanya wa mbere ariko hari ibindi baba bazanye.

IGIHE: Ni ibihe bintu byakugoye muri Miss World ?

Miss Iradukunda : Ibiryo byo mu Bushinwa.

IGIHE: Uwagusubiza muri Miss World wumva wakwitwara neza kurusha mbere ?

Miss Iradukunda : Ntabwo ari ukuvuga ko nakwitwara neza kuko njyayo nakoze ibisabwa byose. Natanze ibyo nari mfite byose ariko sibyampira nsubiyeyo numva nta gishya.

IGIHE: Miss Rwanda 2019 wabonye yaragenze ite ?

Miss Iradukunda : Miss Rwanda y’uyu mwaka yagenze neza cyane, abakobwa baritabira ku bwinshi bakaza atari uko ari beza gusa ahubwo umukobwa akaza ashaka gutanga ibitekerezo bye, abantu bayikurikiye ari benshi.

IGIHE: Ibyo nibyo twabonye natwe, nk’umuntu wari imbere mu ikipe yariteguye nta kindi gishya?

Miss Iradukunda: Harimo utuntu dushya twagiye tuza nka biriya byo gusohora umukobwa mu mwiherero, ariko Miss Rwanda ni irushanwa rikura umunsi ku munsi.

Kuba abantu baza ari benshi tukanagenda tubona ibitekerezo bitandukanye nabyo ni byiza ariko kubona nko mu ijonjora haza abantu barenga 100 ni ikintu kuri twe kidushimisha bitwereka ko Miss Rwanda abantu bari kugenda bayumva.

IGIHE: Ku gihe cyawe ntabwo bazaga ari benshi ?

Miss Iradukunda: Twebwe barazaga ariko ntabwo bari benshi nk’uyu mwaka.

IGIHE: Baguhitishijemo, ari ukujya mu irushanwa ryo gusohoka mu mwiherero ndetse no kuwugumamo wahitamo iki?

Miss Iradukunda : Byose ni byiza yaba ari ukuhaguma ni byiza ariko no gutaha bituma ukora cyane kuko uba uvuga ngo ntabwo mbizi ejo ashobora kuba ari njye uzataha bigatuma wongea imbaraga zo gukora ntucike intege. Njye byose ni byiza.

IGIHE: Ikintu tuzi ni uko ukiri Miss twari tuzi ko dufite nyampinga ucecetse, ubona ari iki cyagufashije mu gihe cyawe ?

Miss Iradukunda : 50% yo kugera ku ntego by’umuntu biba ari ukubaha, nari mvuye mu mashuri yisumbuye sinari nzi uko Isi imeze ariko iyo wubaha ugira uko witwara mu bantu. Njye icyamfashije numva ari ukubaha no kumenya icyo nshaka.

IGIHE: Amarushanwa yawe wari watangije yo koga yaheze he ?

Miss Iradukunda : Ntabwo navuga ngo yaheze he kuko nk’uko nabikubwiye mfite ibintu byinshi, mfite kwiga, ndi Ambasaderi wa Made in Rwanda […] ni ukuvuga ngo hari ukuntu biba byabaye byinshi ariko bitarenze mu mpeshyi irushanwa rizongera ribe.

IGIHE: Uherutse kugirwa Ambasaderi wa Made in Rwanda, ubundi inshingano zawe ni izihe ?

Miss Iradukunda: Ni ugihindura imyumvire y’abanyarwanda tukabumvisha ko Made in Rwanda atari iya leta gusa, kandi twumve ko utaguze ikintu kugira ngo ufashe umuryango runaka. Izo nizo nshingano zanjye.

IGIHE: Uzishyira mu bikorwa gute ko utari umuhanzi ngo ukore indirimbo irimo ubwo butumwa ?

Miss Iradukunda: Ntabwo ndi umuhanzi ariko hari igikorwa ndi gutegura kizabera mu gihugu hose, kizaba kigamije gushishikariza abantu gukunda Made in Rwanda, kuyikoresha no kuyikora ku bafite impano ariko ubu sindamenya igihe neza.

IGIHE: Wowe ubwawe ukoresha ibikorerwa mu Rwanda ?

Miss Iradukunda: Yego ndabikoresha cyane kuko urebye ibintu byinshi nkoresha ni ibya Made in Rwanda byaba ibyo nambara, akenshi usanga aribyo gusa.

IGIHE: Ushyize ku ijana byaba bingana gute ?

Miss Iradukunda: Ni nka 80%. Ibyinshi ni imyambaro, imitako yongera ubwiza, amasakoshi amwe n’amwe,…

IGIHE: Kubera iki iyo abantu batekereje Made in Rwanda bumva imyenda gusa ?

Miss Iradukunda: Ibyo nabyo biri mu nshingano zanjye, kwereka Abanyarwanda ko Made in Rwanda atari imyenda gusa hari abakora intebe, ubukorikori hari ibintu byinshi byayo. Sinamenya igituma twumva ko ‘Made in Rwanda’ ari imyenda gusa ariko tugomba guhindura iyo myumvire.

IGIHE: Igitekerezo cyo kwiga iby’amabuye y’agaciro cyarengeye he ?

Miss Iradukunda: Ni ibintu nakundaga n’ubu ndacyabikunda ariko buriya iyo umuntu agenda akunda hari ibyo ahindura n’amabuye ndayakunda ariko buriya iby’ubushabitsi ndabikunda cyane.

Iradukunda Elsa ashaka kugera ikirenge mu cya se Samuel Mana ufite ibiro by’ivunjisha mu Mujyi wa Kigali rwagati cyangwa se nyina Mukandekezi Christine ukora akazi k’ubucuruzi

IGIHE: Ni ryari wari wumva ufite ibyishimo?

Miss Iradukunda: Ni igihe mba ndi kumwe n’inshuti zanjye n’umuryango wanjye.

IGIHE: Ni ikihe kintu gishobora kugutera ubwoba kurusha ibindi ?

Miss Iradukunda: Hari byinshi; icya mbere ukuba nahemukira umuntu ikindi ni nyamanswa.

IGIHE: Ni iyihe ndangagaciro wiyiziho ?

Miss Iradukunda: Ni ubupfura kubera ko kuri njye nsangamo ibintu byinshi birimo kuba inyangamugayo, gukunda igihugu, umurimo […] kuri njye byose mbyisangamo.

IGIHE: Ni iki wishimira ku nshuti zawe?

Miss Iradukunda: Icya mbere nkunda ko duhuza ikindi ni imyitwarire yabo.

IGIHE: Ni iki kintu ukora buri munsi ?

Miss Iradukunda: Nshobora kudasenga ngo mvuge nafashe igihe kinini, ariko niragiza Imana.

Mu Ukwakira 2018, Minisitiri w'Ubucuruzi n’Inganda, Hakuziyaremye Soraya yatangaje ko Miss Iradukunda Elsa ari Ambasaderi wa Made in Rwanda

IGIHE: Ni irihe kosa ujya wisanga wakoze ?

Miss Iradukunda: Hari ukuntu amasaha ajya angora.

IGIHE: Iyo umuntu avuze ibyishimo wumva iki ?

Miss Iradukunda: Numva ibyishimo ari igihe uba wumva muri wowe ufite amahoro, ufite akanyamuneza.

IGIHE: Ni uwuhe muntu ufata nk’icyitegererrezo ?

Miss Iradukunda: Ni Madamu wa Perezida wa Repubilika y’u Rwanda, nkunda ukuntu adutera imbaraga nk’abakobwa, numva umunsi umwe nazaba umuntu abandi bakobwa bafatiraho icyitegererezo.

IGIHE: Ni he wakwishimira kuba hatari mu Rwanda?

Miss Iradukunda: Ntabwo nakwifuza kujya kubayo ahubwo nagenda nkagaruka ariko haba mu Birwa bya Bahamas, impamvu nahakunze ni ukuntu umukobwa uhakomoka twari kumwe muri Miss World yahasobanuye akahadukundisha.

IGIHE: Ni he mu Rwanda ujya usohokera ?

Miss Iradukunda: Ni i Gisenyi. Ngira ngo ni uko ariho ahantu nkunda kujya cyane urebye ibikorwa byinshi byanjye nabikoreye i Rubavu ni nko mu rugo iwacu ha kabiri.

IGIHE: Ni ikihe kintu cyakubabaje mu buzima?

Miss Iradukunda: Hari umwana twiganaga mu mashuri yisumbuye wapfushije umubyeyi twenda gukora ikizamini cya leta ntiyabasha kugikora. Icyo kintu cyarambabaje.

IGIHE: Ni ikihe utakwibagirwa cyiza cyakubayeho?

Miss Iradukunda: Ntabwo nakwibagirwa ko nigeze gukinira ikipe y’igihugu mu koga. Ntabwo nagize amahirwe yo kuba naserukira igihugu kuko nabaga ndi ku ishuri ariko iyo mbyibutse biranshimisha. Nigaga mu wa gatatu w’amashuri yisumbuye.

IGIHE: Hari umudali wigeze wegukana mu koga ?

Miss Iradukunda: Ni myinshi. Igihe nahereye noga kugeza ubu imidali ni myinshi, yarenga nka 20.

IGIHE: Iyo utaza gukora siporo yo koga ni iyihe yindi wiyumvagamo wari gukora bibaye ngombwa ?

Miss Iradukunda: Sinzi ko navuga ngo nayishobora ariko buriya nkunda Tennis, nzanayiga kuko ndayikunda. Naragejeho rimwe ariko byarananiye ndabireka.

IGIHE: Upfuye bakakubwira ngo ugaruke ku Isi uri ikindi kintu, wifuza ko waba uri nk’iki?

Miss Iradukunda: Numva naza ndi akanyoni nkajya nguruka ahantu hose.

IGIHE: Ni ayahe magambo uhora wibuka wabwiwe?

Miss Iradukunda: Ntabwo navuga ngo ni amagambo ahubwo reka mvuge ko ari ijambo, ni iryo mama wanjye yambwiye ngo ‘nshobora gukora buri kimwe’ ambwira ko ikintu nshaka nakigeraho.

IGIHE: Ni iyihe filime wigeze kureba utazibagirwa ?

Miss Iradukunda: Ni iyitwa 24 hours to live.

Miss Iradukunda Elsa afite ubuhanga mu mukino wo koga, ndetse yigeze gukinira ikipe y'igihugu muri uyu mukino
Iradukunda Elsa avuga ko akunze kwambara ibikorerwa mu Rwanda ku kigero cya 80% , aha yari yambaye ikanzu yakozwe na Moshions
Muri Nzeri 2017 Miss Iradukunda Elsa yerekanye ibikorerwa mu Rwanda mu ruzinduko yagiriye mu Budage
Nyampinga w'u Rwanda asura Uburanga Products

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza