Inama zigirwa abayobozi b’ibigo ku ikoreshwa ry’amarangamutima mu gucunga abakozi

Yanditswe na Muvunyi Arsène
Kuya 26 Gicurasi 2019 saa 02:11
Yasuwe :
0 0

Abayobozi mu bigo bitandukanye bahawe amahugurwa agamije kubafasha gusesengura no gucunga amarangamutima [Emotional intelligence] yabo kugira ngo bibafashe mu kazi ka buri munsi.

Aya mahugurwa yatanzwe ku wa 24 Gicurasi 2019 n’ikigo ‘ITM Africa Ltd’ kigizwe n’inzobere mu gutanga amahugurwa ku micungire y’abakozi, yitabiriwe n’abayabozi batandukanye mu bigo biganjemo abashinzwe gucunga abakozi.

Yatanzwe n’inzobere mu byerekeye imikorere y’ubwonko n’amarangamutima, Dr. Jerome Bonnifay, ufite Impamyabumenyi y’Ikirenga mu Mitekerereze ya Muntu (Psychology), Imicungire y’Abakozi, Amategeko n’Ubukungu.

Dr. Bonnifay yavuze ko umuntu ufite ubumenyi ku marangamutima atayoborwa na yo ahubwo akoresha ubwonko n’umutima mbere yo gufata umwanzuro uwo ari wo wese.

Intambwe ya mbere ni ukwimenya no kumenya uko utwara amarangamutima yawe kugira ngo atagukoresha ibintu bibi. Abantu bameze gutya bumva neza, bigira ku makosa, bahorana amatsiko yo kumenya ibintu bitandukanye, bagira umuhate n’ibindi.

Dr. Bonnifay yavuze ko kumenya gusesengura amarangamutima y’umuntu ari ingenzi ku muntu uwo ari wese kugira ngo arusheho gutera imbere mu byo akora.

Ati “ Ni urufunguzo rw’intsinzi, ni umusingi ushingiraho uhinduka umuntu mwiza kuruta wowe ubwawe, ukagagara neza kurusha abandi kandi ugatera imbere.”

Yongeyeho ko umuntu utabasha gusesengura amarangamutima ye no mu kazi adashobora gutanga umusaruro. Ati “Icyo gihe ntabwo uzakorana n’abandi, uzabakorera cyangwa bagukorere kandi ntabwo ari byiza mu kazi.”

Umuyobozi ushinzwe Ikoranabuhanga no guhanga Udushya muri Smart Africa, Nkurikiyimfura Didier, we yavuze umuntu udasobanukiwe amarangamutima n’uburyo ayacunga, bishobora no kumugiraho ingaruka ku buzima bwe.

Ati “Mu kazi uhura n’abantu benshi, umukoresha, bagenzi bawe mukorana kandi ubuzima ntabwo ari inzira irambuye, ushobora guhura n’imbogamizi zishobora kuzamura uburakari mu gihe uri gufata ibyemezo byagira ingaruka ku buzima bw’abantu.”

Yunzemo ati “ Bishobora no kugira ingaruka ku buzima bwo mu mutwe. Kuko indwara y’ubwoba ishobora guterwa n’umunaniro ukabije. Ushobora kurwara umuvuduko w’amaraso cyangwa ugasaza imburagihe.”

Yasabye abayobozi bari aho kumenya aho bafite intege nke no kumenya impamvu y’imyitwarire y’abo bakorana.

Aya mahugurwa yitezweho gufasha abayobozi gusobanukirwa akamaro ko gusesengura amarangamutima yabo ubwabo n’ayabo bayoboye, bikabafasha kunoza imikorere no gufata ibyemezo birushaho guteza imbere ibigo bayoboye.

ITM Africa Ltd iyategura ifite amashami mu bihugu birindwi muri Afurika nko muri Afurika y’Epfo, Angola, Nigeria, Repubulika Iharanira Demokarasi ya Congo, Tanzania u Rwanda n’i Burayi mu Budage.

Dr. Jerome Bonnifay asobanurira abari bitabiriye aya mahugurwa akamaro ko gukoresha amarangamutima mu ifatwa ry'ibyemezo
Umuyobozi ushinzwe Ikoranabuhanga no guhanga Udushya muri Smart Africa, Nkurikiyimfura Didier, yavuze umuntu udasobanukiwe amarangamutima n’uburyo ayacunga, bishobora no kumugiraho ingaruka ku buzima bwe
Abayobozi batandukanye bahuguwe ku bijyanye no gukoresha amarangamutima mu gufata ibyemezo mu kazi
Dr. Jerome Bonnifay mu ifoto y'urwibutso n'abari bitabiriye aya mahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza