Inama zagufasha kongera kubaho neza nyuma yo gutandukana n’umukunzi wawe

Yanditswe na Mukaneza M.Ange
Kuya 31 Nyakanga 2018 saa 10:34
Yasuwe :
0 0

Agahinda gakabije, kwiheba, kwiyahuza ibiyobyabwenge ndetse n‘izindi ngeso zitari nziza ni bimwe mu byo umuntu yisangamo kubera kunanirwa kwakira gutandukana n’uwari umukunzi we cyane cyane iyo bari bamaranye igihe kinini cyangwa bari bafitanye gahunda yo kubana ubuziraherezo.

Nubwo akenshi uba wumva ubuzima busa n’ubukurangiriyeho, ugomba kuzirikana ko atari ryo herezo ryawe, ndetse imyanzuro yose ufata muri icyo gihe igira ingaruka ku hazaza hawe.

Urubuga Elcrema rugaragaza ko byumvikana ko urugendo rwo kwakira ibiba bimaze kukubaho ruba rutoroshye, by’umwihariko igihe ari umwanzuro wagutunguye, ariko kandi rugatanga inama zishobora kugufasha gusohoka muri ibi bihe wemye ndetse ukongera kubaho neza.

Dore inama zagufasha gukira igikomere cyo gutandukana n’uwo umutima wawe wari warihebeye:

-  Irinde kumwandikira cyangwa kumuhamagara

Ikosa rikomeye abantu benshi bakunze gukora nyuma yo gutandukana n’abakunzi babo ni ugukomeza kubandikira, cyangwa kubahamagara kuri telefoni ahanini bashaka kubereka ko bakibakeneye mu buzima bwabo, cyangwa se babasaba imbabazi ngo barebe ko bakwisubiraho bagasubukura urukundo.

Birumvikana rwose kuba wamukumbura, cyangwa ukumva wifuje kumuhamagara ngo umubwire agahinda ufite cyane ko n’ubundi ariko uba waramenyereye.

Ibi ariko ntacyo bimaze kuko uretse kuba akenshi adashobora kukwitaba cyangwa ngo asubize ubutumwa wamwandikiye, binatuma rimwe na rimwe agusuzugura ndetse akaba yakora ibintu bikubabaza kuko uba watumye arushaho kwiyumva nk’umuntu wari ugufatiye runini.

Uko wihanganira kutamuhamagara, kutamwandikira cyangwa ngo ube wamusubiza igihe we abikoze, bituma urushaho kugira imbaraga zo kwakira ko ibyakubayeho.

-  Zirikana icyatumye mutandukana

Akenshi iyo abantu bakundanaga batandukanye, mu rugendo rwo kwakira ibyabaye usanga buri umwe ku ruhande akomeza gutekereza cyane ku bihe byiza bagiranye.

Ibi si byiza kuko akenshi biri mu bituma ushobora kwifuza gusubirana nabo ndetse ugashakisha inzira zose zatuma mwongera gukundana.

Aho gutinda ku bihe byiza mwagiranye, tekereza ku mpamvu nyazo zatumye mutandukana, wibaze niba ari wowe wagize uruhare mu gutuma uyu mwanzuro ufatwa cyangwa ari we.

Uretse kuba bizakurinda gutinda gukira ibikomere, bizanatuma ufata umwanzuro utuma igihe wongeye gukunda biguhira.

-  Fata umwanya uhagije wo kwakira ibyabaye

Kwakira ko utakiri kumwe n’uwari umukunzi wawe ntabwo ari ibintu bishobora kuba mu munsi umwe, cyangwa icyumweru kimwe; bifata igihe kitari gito kandi kitangana ku bantu bose bitewe n’agaciro buri wese yahaga umubano bari bafitanye.

Kwihatira kumwiyibagiza ugerageza kwirukana buri gitekerezo cyose si byo bituma ukira, ahubwo bishobora gutuma urugendo rurushaho kugukomerera ndetse ukisanga waguye mu makosa atuma ubuzima bwawe burushaho kwangirika.

Emera ko ibyabaye ntacyo wabihinduraho, ntiwicire urubanza cyangwa ngo wumve ko kugira agahinda ari ukuba umunyantege nke. Bizagutwara igihe, ariko umucyo uzongera ugaruke mu buzima bwawe.

-  Rushaho kwiyitaho no gukora ibikorwa bituma unezerwa

Nk’uko benshi bakunze kubivuga burya uburyo bwiza bwo kwihorera si ukugirira nabi uwaguhemukiye ahubwo ni ukubaho kandi neza bitandukanye n’ibyo we yakwifurizaga.

Kubaho ubuzima bwiza nyuma yo gutandukana n’uwari umukunzi wawe uretse kuba bituma yicuza impamvu mwatandukanye cyane cyane iyo ari we umwanzuro waturutse, cyangwa byaraturutse ku makosa ye, ni n’uburyo bwo kumwereka ko kuba mutari kumwe atari ryo herezo ry’ubuzima bwawe.

Nawe ubwawe kandi bikugiraho ingaruka nziza kuko bituma udatekereza ku bintu bibi bituma wiheba, ahubwo ugatangira kubona ubuzima mu buryo butandukanye n’uko wabubonaga mukiri kumwe.

Kurushaho kubaho neza kandi bijyana no kongera gukora bya bikorwa byagushimishaga birimo imyidagaduro, gusohokera ahantu hashya ndetse bigatuma wunguka inshuti nshya. Wihagarika ubuzima bwawe kubera umuntu umwe wabuvuyemo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza