00:00:00 IGIHE NETWORK KN KINYARWANDA EN ENGLISH FR FRANCAIS

Uko ubupfubyi bwasembuye inganzo ya Kabasire yo kuba umuboshyi w’ibyibo

Yanditswe na Uwiduhaye Theos
Kuya 30 Nzeri 2021 saa 06:08
Yasuwe :
0 0

Kabasire Iyadema ni umwe mu basore bakibyiruka wahisemo kuyoboka inzira y’ububoshyi bw’ibyibo, kugira ngo arebe ko yakwiteza imbere n’ubwo ari ibintu bidakunze gukorwa n’abagabo byongeyeho abari mu rungano rwe.

Uyu musore mu kiganiro yahaye IGIHE yavuze ko yahisemo kujya muri uyu mwuga ashaka kugira ngo arebe ko yabona ubuzima cyane ko atari yorohewe kuko se yitabye Imana akiri muto.

Kabasire amaze igihe cy’umwaka umwe atangiye ibijyanye no kuboha ibyibo.

Yakomeje ati “Ndi imfubyi, data yapfiriye mu rugamba rwo kubohora igihugu, akaba yaraguye ku musozi wa Rebero, mama nawe umuryango we warashize kubera Jenoside yakorewe Abatutsi yabaye mu Rwanda. Papa yapfuye ari njye gusa abyaye bityo kuko mama yari akiri muto, yashatse undi mugabo ariko kuko atankundaga byaje kuba ngombwa ko ndererwa mu muryango wo kwa data.”

Ibyibo baboha akenshi byifashishwa n’abashaka gutaka mu nyubako zabo hakaba n’abandi babigura hari ikindi babishakira.

Avuga ko mu biruhuko yakundaga kujya gusura umubyeyi we, nyuma akaza guhura n’umubyeyi uboha ibiseke akaza gutangira gutyo kugeza ubwo abigize umwuga.

Aba babyeyi bakorana harimo abafite ibibazo bitandukanye barimo abarokotse Jenoside n’abandi bafite ibindi bibazo n’ubukene.
Ati “Ubuhanzi ni ibintu bindimo, naje gusura mama nzakumenyana n’umubyeyi wabohaga ibiseke, musanze mu rugo aho ni bwo igitekerezo cyaje, musaba ko namufasha nkajya mushakira isoko, nyuma ni bwo nabonye udufaranga duke mugezaho igitekerezo cyo gushaka abandi nkawe, tugafatanya ndetse nanjye bakanyigisha kuboha.”

Yakomeje avuga ko iyo aba abayeho mu buzima bwiza yari gutekereza gukora umuziki cyangwa ikindi kintu ariko akaza kwisanga mu bucuruzi bw’ibyibo, cyane ko kubutangira byari kumworohera kurusha ibindi.

Avuga ko yihuje n’ababyeyi barindwi bagakodesha inzu akajya amenya buri kimwe bakeneye ari nako bafatanya, akabafasha kuboha no gushaka amasoko y’ibyo bakora.

Ngo impamvu yahisemo gukora umwuga ujyanye n’umuco Nyarwanda kandi akaba yarumvaga byanga bikunze hari ikintu bizamwungura ndetse bigafasha no mu bukerarugendo bw’igihugu.

Ati “Ni yo nzira yonyine nari mfite yo gucamo mfasha abo babyeyi ku bushobozi bwanjye bukeya, ikindi ibindimo ni ubuhanzi kandi ni nabwo nahoze nkora. Nararirimbaga nkanandika indirimbo ariko ubu nta kinshimisha nko kubona abana b’abo babyeyi biga, n’ubwo biba bitoroshye. Burya mu buzima abacantege ntibabura ariko ntabwo nita ku bantu nk’abo banca intege bavuga ko ntagakwiriye kuba naragiye mu by’ibiseke, kuko ibyo ndimo nzi impamvu mbirimo nzi n’icyo nshaka.”

Mu myaka itanu uyu musore yifuza kuba yaba afite iduka ry’ibyo bakora ndetse n’isoko ry’imitako kugira ngo ubuzima bwe n’abo bakorana bukomeze kuba bwiza kurushaho ndetse n’abana b’aba babyeyi bakomeze kwiga no kubaho neza. Kabasire Iyadema ibikorwa bye abikorera muri sosiyete yise Basket Store.

Ushaka kumenya byinshi bakora wakanda hano:

Kabasire Iyadema ni umwe mu basore bakibyiruka wahisemo kuboha ibiseke
Avuga ko nubwo akiri mu itangira yizeye ko ibintu akora abantu bazabikunda
Ibi biseke biboneka mu mabara atandukanye
Ibiseke ni imwe mu mitako iba inogeye ijisho gusa ntabwo ari ko kamaro kayo gusa
Kabasire asanzwe ari umuhanzi
Kabasire yatangiye uyu mwuga yihuza n'abagore bamufasha mu kazi ka buri munsi
Mu myaka itanu, yifuza ko azaba afite iduka rikomeye
Uyu musore akora ibyibo byo mu bwoko butandukanye byiganjemo ibiba ari imitako
Uyu musore amaze umwaka umwe atangiye aka kazi
Kabasire yavuze ko yahisemo kujya muri uyu mwuga ashaka kugira ngo arebe ko yabona ubuzima cyane ko atari yorohewe kuko se yitabye Imana akiri muto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .