Melania Trump yashimiye abagore 10 b’indashyikirwa ku isi barimo Umunyarwandakazi Mukasarasi

Yanditswe na Mukaneza M.Ange
Kuya 24 Werurwe 2018 saa 01:39
Yasuwe :
3 3

Melania Trump, umugore wa Perezida wa Leta Zunze Ubumwe za Amerika yitabiriye umuhango wo gutanga igihembo cy’ubwitange ku bagore 10 barimo n’Umunyarwandakazi Mukasarasi Godeliève, aho yabashimiye umurava, avuga ko ari intwari zihorana na bo.

Ku wa 23 Werurwe 2018, nibwo Leta Zunze Ubumwe za Amerika zahembye abagore 10 bagiye bakora ibikorwa by’ubwitange, byahinduye imibereho y’abatari bake.

Muri uyu muhango ubaye ku nshuro ya 12, Melania Trump yavuze ko umurava uri mu myitwarire myiza ikenewe ku Isi, ariko akenshi bigoye kubona abanyamurava, aho yashimangiye ko abahawe ibihembo ari intwari zakoze ibikorwa byashoboraga gushyiraga mu kaga ubuzima bwabo n’imiryango yabo.

Ati “ Mu kubakeza, turi gushyikira igikwiye. Mu kuvuga inkuru zabo, turigisha abagore bakiri bato n’abakobwa bari hirya no hino ku isi igisobanuro cyo kugira umurava no kuba intwari, ingero zabo zisobanura neza umurava.”

Umuvugizi wa Minisiteri ishinzwe Ububanyi n’Amahanga ya Amerika, Heather Nauert yavuze ko kuva iyi gahunda yatangira, imaze gushimira abagore 120 bo hirya no hino ku isi bagiye bagaragaza ibikorwa by’indashyikirwa.

Yakomeje avuga ko impamvu batanga ibi bihembo ari uko baziko amajwi y’abagore ari ingenzi cyane mu mutekano w’isi, uburumbuke ndetse n’amahoro. Kandi ubutumwa bw’abashimwa byubaka ubutumwa bukomeye burebana n’umurava ndetse n’imiyoborere myiza.

Nauert yongeyeho ko kuba Amerika ishyize imbere kongerera umugore ubushobozi, ari byo byatumye Perezida Donald Trump ashyira umukono ku itegeko rirebana n’abagore, amahoro n’umutekano, ndetse akemera ko igihugu cye gitanga umusanzu wa miliyoni 40 z’amadolari muri gahunda igamije gukusanya miliyoni 340 agamije guteza imbere ba rwiyemezamirimo b’abagore hirya no hino ku isi.

Mukasarasi Godeliève washinze Umuryango wita ku bapfakazi n’imfubyi za Jenoside yakorewe Abatutsi witwa ‘SEVOTA’, watanze ubutumwa mu izina rya bagenzi be bahawe ibihembo, yavuze ko yaharaniye uburenganzira bw’abapfakazi n’abafashwe ku ngufu muri Jenoside yakorewe Abatutsi mu 1994 ndetse n’abana bavutse muri ubwo buryo, binyuze mu bujyanama n’ubuvugizi bakabasha gukira ibikomere no kwiyubaka.

Ati “ Mbere yo guhura n’umuryango ‘SEVOTA’, buri mugore yumvaga ari wenyine ndetse akumva afite igisebo. Ariko mu gusangizanya inkuru zabo, baje kubona ko bishoboka kwakira ibyabayeho, no kwemera abana babo.”

Nk’uko yakomeje abivuga nyuma yo gukira ibikomere, aba bagore b’Abanyarwandakazi batangiye kuvuga inzira ikomeye banyuzemo, ndetse batangira urugamba rwo gusaba ko gufata ku ngufu bishyirwa mu byaha byaburanishwaga n’Urukiko Mpanabyaha rwashyiriweho u Rwanda ndetse babigeraho.

Mukasarasi washimiye leta y’u Rwanda yamugize umurinzi w’igihango, ndetse na Amerika yamutoranyije mu bagomba guhabwa igihembo yavuze ko SEVOTA ikomeje ubuvugizi kuko nubwo bariya bagore barokotse Jenoside babashije gukira ibikomere byo gufatwa ku ngufu, bamwe muri bo bagihangana n’ingaruka z’ibyababayeho zirimo ubwandu bw’agakoko gatera Sida n’ubukene.

Melania Trump ashimira Mukasarasi ibikorwa bye by'indashyikirwa

Mukasarasi yashinze Umuryango SEVOTA “Solidarité pour l’Épanouissement des Veuves et des Orphelins visant le Travail et l’Auto promotion" mu 1994, ufite intego yo kugira uruhare mu kongerera imfubyi n’abapfakazi imibereho mu byerekeye imibanire, ubukungu n’umuco.

Mukasarasi ni Umuyobozi Wungirije w’Urwego rw’Intwari z’Igihugu, Imidari n’Impeta by’Ishimwe (CHENO);yashyizwe mu bazahabwa igihembo nk’umugore wagize uruhare mu guteza imbere uburenganzira bw’abagore n’abakobwa bafashwe ku ngufu hirya no hino ku Isi.

Mu 1996, Mukasarasi yafashije itsinda ry’Umuryango w’Abibumbye gutanga ubuhamya bushinja uwari Burugumesitiri wa Komine Taba, Jean-Paul Akayezu, uruhare muri Jenoside yakorewe Abatutsi.

Atitaye ku bamuteraga ubwoba n’abamwiciye umugabo n’umukobwa muri Jenoside, Mukasarasi yatanze ubuhamya mu Rukiko rwa Arusha, ashishikariza na bane mu bagize SEVOTA gushinja Akayezu.

Nubwo gufata abagore cyari icyaha cy’intambara kuva 1919, nta n’umwe wari waragihaniwe, cyahaniwe bwa mbere mu rubanza rwa Akayezu mu 1998.

Ku bw’ibyo, Mukasarasi ashimirwa ko yatanze umusanzu ku Isi ukomeye mu butabera, afasha bagore bahohotewe mu bihe by’intambara kugera ku butabera.

Kuva mu 1994, SEVOTA yageze ku bafashwe ku ngufu barenga 300, abafasha kongera kubaho.

Abandi bagore bahembwe ni Roya Sadat (Afghanistan); Aura Elena Farfan (Guatemala); Dr. Julissa Villanueva (Honduras); Aliyah Khalaf Saleh (Iraq); Umubikira witwa Maria Elena Berini (u Butaliyani); Aiman Umarova (Kazakhstan); Dr. Feride Rushiti (Kosovo); L’Malouma Said (Mauritania) na Sirikan Charoensiri (Thailand).

Umuryango SEVOTA urimo amashyirahamwe 80 arimo abanyamuryango bagera ku 2000, yose akaba agamije guteza imbere abarokotse Jenoside.

Melania Trump hamwe na bamwe mu bagore b'indashyikirwa barimo Mukasarasi (wa kabiri ibumoso) ukomoka mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza