Musenyeri Blaise Forissier washinze Communauté Ingoro y’Urukundo i Butare yitabye Imana

Yanditswe na Prudence Kwizera
Kuya 11 Mutarama 2018 saa 04:06
Yasuwe :
0 0

Musenyeri Blaise Forissier washinze Communauté Ingoro y’Urukundo muri Diyoseze ya Butare yitabye Imana mu gitondo cyo kuri uyu wa 11 Mutarama 2018.

Musenyeri Blaise Forissier yari afite imyaka 89 y’amavuko, akomoka mu Bufaransa, yari asanzwe aba muri Diyoseze Gatolika ya Butare akaba yari amaze igihe arwariye muri CHUB.

Umushumba wa Diyoseze ya Butare, Musenyeri Philippe Rukamba yatangaje ko Musenyeri Blaise yitabye Imana ahagana saa kumi n’ebyiri zo mu gitondo cyo kuri uyu wa kane.

Yagize ati “Ni byo yitabye Imana uyu munsi saa kumi n’ebyiri za mu gitondo, yari arwariye mu Bitaro bya Kaminuza bya Butare, ariko ni umuntu wari ugeze mu zabukuru kuko yari amaze kugira imyaka 89”.

Musenyeri Blaise Forissier ni we washinze Communauté Ingoro y’urukundo igizwe n’aba Frẻres hamwe n’Ababikira akaba yarageze mu Rwanda mu myaka ya 1959.

Mu Rwanda yahakoze imirimo itandukanye irimo kuba yarabaye Umuyobozi Mukuru wa Seminari Nkuru ya Nyakibanda, Padiri Mukuru wa Cathédrale ya Butare, igisonga cya Musenyeri Gahamanyi wayoboye Diyoseze ya Butare n’indi.

Communauté Ingoro y’Urukundo yashinze igizwe n’Abalayiki ndetse n’Abihayimana ibaka ifite amashami mu Ntara zose z’Igihugu, ikaba iherutse kwizihiza imyaka 25 imaze ibayeho kuko yashinzwe mu mpera z’umwaka wa 1991.

Ubuyobozi bwa Kiliziya Gatolika buvuga ko biteganyijwe ko Musenyeri Blaise Forissier azashyingurwa ku itakiki 18 Mutarama 2018 mu Karere ka Huye.

Musenyeri Blaise Forissier yitabye Imana nyuma y'igihe arwariye mu Bitaro bya Kaminuza bya Butare
Musenyeri Blaise Forissier yakoze imirimo itandukanye muri Diyosezi Gatolika ya Butare

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza