Inzego z’ubutasi zabujije Abanyamerika gukoresha ibikoresho by’uruganda rwa Huawei

Yanditswe na Mukaneza M.Ange
Kuya 15 Gashyantare 2018 saa 09:08
Yasuwe :
0 0

Inzego zishinzwe ubutasi n’iperereza muri Leta Zunze Ubumwe za Amerika, zatangaje ko Abanyamerika badakwiye gukoresha ibikoresho by’ikoranabuhanga bikorerwa mu Bushinwa n’inganda za Huawei na ZTE, kuko bishobora kugira ingaruka ku mutekano wabo.

Ku wa Kabiri abayobozi muri CIA, FBI, NSA n’igisirikare, babwiye komisiyo ishinzwe ubutasi muri Sena ko telefoni zikorwa na ziriya nganda zishobora guteza ibibazo by’umutekano ku bakiliya b’Abanyamerika ndetse n’igihugu muri rusange.

Nk’uko CNN yabyanditse, Umuyobozi w’ibiro bya Amerika bishinzwe iperereza, FBI, Chris Wray yavuze ko gukoresha ibikoresho na serivisi zitangwa na Huawei cyangwa ZTE, bishobora guteza ibibazo birimo no kwibwa kw’amakuru y’Abanyamerika.

Ati “ Bibaha ubushobozi bwo guhindura mu ibanga cyangwa kwiba amakuru. Ndetse bibaha ububasha bwo gukora ubutasi mu buryo butapfa gutahurwa.”

Huawei n’ubusanzwe ntiyari yarabashije gukwira muri Amerika hose, kubera impungenge zagaragajwe na guverinoma ku bijyanye no kuba u Bushinwa bwakwifashisha telefoni n’ibindi bikoresho byabo mu butasi.

Mu 2012, Inteko Ishinga Amategeko ya Amerika yashyize ahagaragara raporo yavugaga ko ziriya nganda ebyiri zikwiye kugirirwa amakenga. Muri Mutarama uyu mwaka ibiganiro ku kuba ibikoresho bya Huawei byagurishwa na AT&T y’Abanyamerika byarahagaritswe.

Mu itangazo Huawei yashyize ahagaragara ku wa Gatatu yavuze ko iri gukurikirana ibiri kubera mu nteko, ariko yirinda kugira icyo itangaza ku byagejejwe kuri komisiyo ishinzwe ubutasi.

Uru ruganda kandi rwanagarutse ku buryo ruhagaze neza ku masoko yo hanze ya Amerika, aho ibikoresho bya Huawei bifite abakiliya benshi ugereranyije na Apple.

Itangazo ryagize riti “Dukorera mu bihugu 170, aho dufitiwe icyizere na guverinoma n’abakiliya. Nta bibazo by’umutekano mu ikoranabuhanga duteza biruta iby’abandi bacuruzi.”

Uru ruganda ndetse na ZTE byashimangiye ko nta na rimwe byigeze basabwa gutanga amakuru yaba ayerekeranye n’igihugu cyangwa abantu ku giti cyabo.

Sen.Tom Cotton uhagarariye leta ya Arkansas, mu cyumweru gishize yagejeje ku Nteko umushinga w’itegeko ribuza guverinoma gukorana n’ibigo bikoresha ibikoresho na serivisi za Huawei cyangwa ZTE.

Si ubwa mbere Amerika ikumira ibikoresho bikorerwa mu bindi bihugu, kuko na sosiyete y’Abarusiya itanga serivisi zirinda mudasobwa, Kaspersky Lab yabujijwe gukorera muri iki gihugu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza