Leta ya New York yajyanye mu nkiko ikigo cya Weinstein ukekwaho guhohotera abagore

Yanditswe na Mukaneza M.Ange
Kuya 12 Gashyantare 2018 saa 08:08
Yasuwe :
0 0

Nyuma y’ubuhamya bwagiye butangwa n’abagore batandukanye bavuga ko mu myaka yashize Harvey Weinstein uri mu nkingi za mwamba muri sinema Nyamerika yabahohoteye, abashinjacyaha bo muri Leta ya New York bajyanye ikigo cye mu nkiko bagishinja kunanirwa kurinda abakozi iri hohoterwa.

Weinstein wafatanyije n’umuvandimwe we gushinga Miramax Films mu 1979, nyuma bagashinga The Weinstein Company, akekwaho gukora ihohotera rishingiye ku gitsina ririmo no gufata ku ngufu, ibintu ahakana akavuga ko ntawe bigeze bakorana imibonano mpuzabitsina batabyumvikanyeho.

BBC dukesha iyi nkuru ivuga ko Intumwa Nkuru ya Leta ya New York, Eric Schneiderman, ku Cyumweru aribwo yatangaje ko yareze mu nkiko Ikigo gitunganya filim cya the Weinstein Company ndetse na Harvey n’umuvandimwe Robert bafatanyije kugishinga.

Muri iki kirego Schneiderman yasabye impozamarira zigenewe abagore bivugwa ko bahohotewe bagasambanywa ku gahato na Weinstein, ubwo bari abakozi b’ikigo cye.

Abayobozi bakuru b’iki kigo barimo Robert Weinstein nabo bashinjwa kunanirwa guhagarika ibi bikorwa bibi kabone nubwo babaga bashyikirijwe ibimenyetso.

Iki kirego gitanzwe nyuma y’iperereza ryamaze amezi ane rikubiyemo bimwe mu byo Weinstein akekwaho birimo gutera abakozi ubwoba ababwira ko azabica, gusaba abagore kumuherekeza mu bikorwa bitandukanye agamije kubasambanya, kubasaba kuryamana nawe abasezeranya kubazamura mu ntera n’ibindi.

Umwunganizi mu mategeko wa Weinstein, Ben Brafman, yavuze ko n’ubwo imyitwarire y’umukiliya we atahamya ko ari shyashya, ariko ngo ntacyo yakoze kinyuranyije n’amategeko. Yahamije ko ahubwo iki kirego kizashimangira uburyo uyu mugabo yagiye ashyira abagore mu myanya ifata ibyemezo kandi hatabayeho ivangura.

Iki kirego cyatanzwe na Leta ya New York gishobora kugira ingaruka zikomeye ku igurishwa rya Weinstein Company ifite ibibazo by’ubukungu, aho bivugwa ko cyatumye umuherwe Maria Contreras-Sweet wifuzaga kuyigura miliyoni 500 z’amadolari ahagarika ibiganiro.

Abagore basaga 50 barimo bafite amazina akomeye muri sinema nka Lea Seydoux, Kate Beckinsale, Ashley Judd na Rose McGowan bagiye bagaragaza ko Harvey Weinstein yabakoreye ihohoterwa rishingiye ku gitsina, abanze gukora ibyo ashaka akababuza amahirwe yo guteza imbere umwuga wabo.

Harvey Weinstein akekwaho guhohotera abagore benshi bo mu ruganda rwa sinema muri Amerika

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza