Ni iyihe mpamvu Angola ishaka kwinjira mu miryango ikoresha Igifaransa n’Icyongereza?

Yanditswe na David Eugène Marshall
Kuya 10 Kamena 2018 saa 07:35
Yasuwe :
0 0

Baca umugani mu Kinyarwanda ngo ‘Nta mugabo umwe’. Isi igeze mu gihe nta gihugu cyajya aho ngo cyiyemere ko cyihagije muri byose. Iyi kandi ni imwe mu mpamvu byinshi mu bihugu bikomeye bimaranira kuba hamwe n’ibindi mu miryango mpuzamahanga.

Ni muri uru rwego Perezida wa Angola, João Laurenco, aherutse gutangariza Euro News ko igihugu cye gifite umugambi wo kwiyunga ku muryango w’ibihugu bivuga Ururimi rw’Igifaransa (Francophonie) n’uw’ibikoresha Icyongereza (Commonwealth).

Aya magambo ya Laurenco kandi yanemejwe na Minisitiri w’Ububanyi n’Amahanga w’u Bwongereza, Boris Johnson, abinyujije ku rukuta rwe rwa Twitter.

Yagize ati “Birashimishije kuba Angola yifuza kwinjira mu muryango mugari wa Commonwealth”.

Boris yavuze ko u Bwongereza buzirikana uruhare rwa Laurenco mu mugambi wo kuvugurura ubutegetsi n’ubukungu bya Angola ndetse no kwishimira ko hari intambwe iri guterwa mu bijyanye n’iyubahirizwa ry’uburenganzira bw’ikiremwamuntu.

N’ubwo Angola iza ku mwanya wa kabiri mu bihugu bikize kuri Peteroli ku mugabane wa Afurika nyuma ya Nigeria, ibi ntibikuraho ko igaragara nka kimwe mu bihugu bifite ubwigunge hagendewe ku rurimi rw’abaturage bayo bakoresha ndetse n’izo ibihugu bituranye bikoresha.

Nta gihugu na kimwe gituranye na Angola gikoresha igi-portugal. Urugero, Repubulika Iharanira Demokarasi ya Congo, Congo-Brazzaville biri mu Majyaruguru bikoresha Igifaransa; Zambia na Namibia mu Majyepfo bikoresha Icyongereza. Ibi rero biri mu bituma iki gihugu cyibona nk’ikiri mu bwigunge.

João Manuel Gonçalves Lourenco yagiye ku butegetsi ku wa 26 Nzeli 2017 asimbuye José Edouardo Dos Santos wari utegetse iki gihugu imyaka 38 kuva cyabona ubwigenge.

Loni itangaza ko Peteroli yihariye 95% ry’ibyo Angola yohereza mu mahanga. Uyu mutungo kandi wihariye 80 % by’imisoro yose igihugu cyinjiza mu isanduku ya Leta.

N’ubwo bimeze gutyo ariko, Loni ikomeza ivuga ko bigoye kubona akamaro ubu bukungu bumariye umuturage usanzwe aho kubera amafaranga menshi yihariwe na bake, igiciro cy’ibintu ku masoko kiri hejuru cyane by’umwihariko mu Murwa Mukuru Luanda ubarirwa muri imwe mu mijyi ifite ubuzima buhenze cyane ku Isi.

Angola ituwe n’abaturage miliyoni 26. Yari isanzwe iri mu miryango itandukanye irimo n’iyo mu Karere nka ICGLR uhuriza hamwe ibihugu 12 birimo u Burundi, Congo-Brazzaville, RDC, Kenya, Uganda, Rwanda, Sudani, Sudani y’Epfo, Tanzania na Zambia.

Perezida wa Angola, João Laurenco, arashaka ko igihugu cye cyinjira muri Francophonie na Commonwealth

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza