00:00:00 IGIHE NETWORK KN KINYARWANDA EN ENGLISH FR FRANCAIS

Urumogi muri Gereza yo muri Afurika y’Epfo, Loni yitambitse hagati ya Kenya na Somalia, OMS ntikozwa urukingo rwa Gatatu rwa Covid-19… Avugwa mu mahanga

Yanditswe na Muhonzire Sylvine
Kuya 13 Ukwakira 2021 saa 12:13
Yasuwe :
0 0

Gereza yo mu mujyi wa Empangeni mu Ntara ya Kwa-Zulu Natal muri Afurika y’Epfo yavumbuwemo urumogi rufite agaciro k’amadorali 800 (arenga 800.000Frw), telefone 37, za chargeur zazo, ishyiga batekaho ariko rikoresha umuriro, imiti ya gakondo n’ibindi.

Ikinyamakuru cya leta muri iki gihugu SABC cyatangaje ko ibi byabonywe kuwa kabiri tariki 12 Ukwakira 2021 mu mukwabu wakorewe muri iyi gereza guhera saa cyenda z’ijoro.

Umuvugizi w’ishami rishinzwe amagereza, Singabakho Nxumalo, yavuze ko iyi gereza irimo ibibazo by’umutekano byinshi ndetse ko abafungwa bane baherutse kuyitorokamo, aho yatangaje ko hazakorwa imikwabu itategujwe mu yandi magereza yose mu gihugu.

Urumogi rwabonetse ni urufite agaciro ka 800$
Muri yo gereza hasanzwemo ibikoresho bitandukanye birimo n'urumogi

Loni yanze ikirego Kenya ishinjamo Somalia kuyitwarira agace kayo

Urukiko Mpuzamahanga rw’Umuryango w’Abibumbye, ICJ, rwanze kumva uruhande rwa Kenya mu kibazo cy’igihe kirekire ifitanye na Somalia ku bijyanye n’aho ibi bihugu byombi bigabanira mu Nyanjya y’u Buhinde.

Ibi bihugu byombi ntibyumvikana ku gace k’impande eshatu kari muri iyi Nyanja kangana na kilometero kare ibihumbi 100 bikekwa ko gakungahaye kuri peteroli na gaz, aho buri kimwe kivuga ko ari agace kacyo.

Iki kibazo kimaze igihe kinini gihanganishije ibi bihugu, aho Kenya ivuga ko ako gace ari akayo kuko kagomba kujyana n’umurongo iki gihugu kigabaniraho na Somalia mu gihe nayo ivuga ko agace kayo mu Nyanja y’u Buhinde kagomba kujyana n’uko ubutaka bw’iki gihugu bumeze.

Uru rukiko mu gukiza izi mpaka rwanze ikirego cya Kenya yireguraga ivuga ko yemeranyijwe na Somalia ko ako gace ari kayo, ruvuga ko nta gihamya cyerekana ko ako gace ari aka Kenya ndetse isaba ko buri gihugu kizirinda kuvogera ubusugire bw’ikindi, hakurikijwe amategeko mpuzamahanga.

Kenya yanze kwemera imikirize y’urubanza ivuga ko ICJ yabogamye. Mu gihe Somalia yo yishimiye intsinzi nyuma yo kwegukana agace kahoze ari kayo.

Aka gace ni ko Kenya ivuga ko ari akayo mu gihe na Somalia ivuga ko ari akayo gusa bivugwa ko gakungahaye kuri peteroli na gaz

Ibikoresho byari iby’icyihebe Al Capone byagurishijwe miliyoni 3$ muri cyamunara

Ibikoresho bitandukanye byari iby’ikihebe kabuhariwe muri Leta Zunze Ubumwe za Amerika, Al Capone, byagurishijwe akayabo ka miliyoni 3$ muri cyamunara yabereye muri Leta ya California.

Al Capone wapfuye mu 1947, yamenyekanye cyane mu bikorwa by’ubucuruzi bw’intwaro n’ibiyobyabwenge ndetse yari ayoboye itsinda ry’abahezanguni bivuganaga abantu.

Ibikoresho 174 byari bimaze imyaka 75 bibitswe n’umuryango we, birimo imbunda, amafoto ye, imitako yambaraga ndetse n’ibikoresho byo mu rugo nibyo byagurishijwe muri iyo cyamunara yari yateranyije abarenga 1000.

Muri ibyo bikoresho imbunda yakundaga cyane, yagurishijwe ibihumbi 860$ nk’uko Reuters yabitangaje.

Umwe mu buzukuru be batatu, Diane Capone, yavuze ko kugurisha ibyo bikoresho muri cyamunara, ari igitekerezo cya bashiki be babiri bashaje cyane.

Ibikoresho by'icyihebe Al Capone byagurishijwe miliyoni 3$ muri cyamunara

William Shatner agiye kuba umuntu ukuze wa mbere ugiye kujya mu isanzure

Umunya-Canada wamenyekanye cyane muri filime za Hollywood, William Shatner, w’imyaka 90 agiye kuba umuntu ukuze wa mbere ugiye kujya mu isanzure.

Uyu mugabo wakinnye nka Captain James T Kirk muri filime za Star Trek, ndetse n’izindi zitandukanye, azajyanwa n’icyogajuru cya Sosiyete Blue Origin y’umuherewe Jeff Bezos, iherutse gutangiza ubukerarugendo mu isanzure, aho azamarayo iminota icumi.

Shatner azajyana n’abandi bantu batatu, aho bazahagurukira mu butayu bwa Texas, bajye hejuru muri kilometero 100 uvuye ku Isi aho bazabasha kubona urufatiro rw’Isi barebeye mu idirishya ry’icyo cyogajuru.

Avuga ibyiyumviro bye ku rugendo azagirira mu isanzure yagize ati “Ndashaka kureba uko hameze, nshaka kureba Isi. Ndashaka kureba icyo dukeneye kugira ngo tuyicungure.”

Blue Origin imaze kujyana abantu batandukanye mu isanzure, bakajya gutemberayo mu minota mike baba bafite, aho umuntu wa mbere yajyanye ari nyirayo Jeff Bezos.

William Shatner agiye guca agahigo ko kuba umuntu wa mbere ukuze ugiye kujya mu isannzure

OMS yamaganye iby’urukingo rwa Gatatu rwa Covid-19

Ishami ry’Umuryango w’Abibumbye ryita ku buzima OMS, ryamaganye ibihugu biri gutanga urukingo rwa Gatatu rwa Covid-19 rwongera ubudahangarwa ‘booster shot’ mu gihe muri Afurika hari abaturage batarahabwa na rumwe.

Umuyobozi wa OMS, Dr. Tedros Adhanom Ghebreyesus, yavuze ko ibi bintu bidakwiriye na gato ndetse ko bigomba guhagarara, kuko bitumvikana ukuntu icyorezo cyahagarikwa ku Isi hose ariko umugabane umwe (wa Afurika) ugasigara, kuko udafite uruganda na rumwe rukora inkingo ndetse nta n’ubundi bushobozi ufite.

OMS yasabye ko ibi bihugu byahagarika gutanga izi nkingo kugeza igihe Isi izaba amaze gukingira abantu benshi bashoboka niyo baba bamaze guhabwa doze imwe y’urukingo rwa Covid.

Dr. Tedros yavuze ko ku mugabane wa Amerika yaba iy’Amajyaruguru n’Amajyepfo, u Burayi, Aziya ndetse na Oceanie, abantu barenga 50% bamaze guhabwa doze ya mbere y’urukingo, mu gihe muri Afurika abayihawe bangana na 7%.

Amerika niyo iherutse kwemerera abantu bamwe guhabwa urukingo rwa Gatatu ruzwi nka ‘booster shot’ rwongerera ubudahangarwa umubiri uwahawe urukingo.

Dr. Tedros yamaganye ibihugu bikize biri gutanga inkingo za gatatu mu gihe hari ibitarabona na doze za mbere zo guha abaturage babyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .