Emmanuel Ramazani Shadary ushobora kuzasimbura Kabila ni muntu ki?

Yanditswe na David Eugène Marshall
Kuya 10 Kanama 2018 saa 04:49
Yasuwe :
0 0

Itariki ya 8 Kanama 2018, ni umunsi utazibagirana muri Repubulika Iharanira Demokarasi ya Congo (RDC), ubwo hasakaraga inkuru yari itegerejwe na benshi y’uko Joseph Kabila Kabange, ataziyamamariza kongera kubayobora muri manda itaha izatorerwa kuwa 23 Ukuboza 2018.

Kuri uwo munsi w’amateka, Ihuriro ry’amashyaka ya politiki ashyigikiye ubutegetsi buriho muri iki gihugu (FCC), ryatoranyaga Emmanue Ramazani Shadary, kuzarihagararira muri ayo matora.

Shadary w’imyaka 58 yavukiye mu Ntara ya Maniema ahitwa Kilungay, mu Karere ka Kabambare, akaba mu mabyiruka ye yarakuze abwirwa ko azaba umuhanga n’umuntu ukomeye. Ibi byagaragariye ku kuntu yagiye yiga atsinda mu bihe bitandukanye ndetse no mu myanya ikomeye yagiye agira mu ruhando rwa politiki.

Mu mwaka wa 1974, nibwo Shadary yashoje umwaka w’amashuri, atsinda ikizamini kimwemerera kujya mu mashuri yisumbuye n’amanota 84%.

Amashuri yisumbuye yayashoreje mu bijyanye n’inderabarezi (ubwarimu), ku manota 73% ari uwa mbere, ahita abona buruse imujyana muri Kaminuza ya Lubumbashi mu ishami ry’ubumenyi mu bijyanye na Politiki.

Shadary kubera gutsindira ku manota yo hejuru, bagenzi be bari baramuhimbye ’Igitego ku kindi’, kubera intsinzi ze mu mashuri zisukiranyaga. Yakomereje icya gatatu muri Kaminuza ya Kinshasa asoza amasomo ye mu 2015.

Shadary avuga neza Igifaransa, Igiswahili, Ikiruba kandi ashobora no kugerageza Icyongereza. Yashakanye na Wivine Paipo Ngweji bafitanye abana umunani.

Shadary muri politiki

Hagati ya 1998-2000, Shadary yabaye umuyobozi mukuru wungirije ushinzwe amashuri makuru na za kaminuza muri Minisiteri y’Uburezi, yabaye kandi umwe mpirimbanyi ziharanira kurengera uburenganzira bwa muntu mu ntara avukamo ya Maniema, yanabereye uwungirije umuyobozi wayo.

Ni umwanya yavuyeho aba Guverineri wuzuye wa Maniema mu 2001, ubwo hari ku butegetsi bwa Laurent Désiré Kabila.

Kubera umubano n’ubutoni yagiriye kuri Kabila se wa Joseph Kabila, mu 2002 ari mu bashinze Ishyaka ry’abaturage riharanira demokarasi no kwiyubaka bushya, PPRD, mu magambo ahinnye y’Igifaransa.

Nyuma y’imyaka itatu iri shyaka rishinzwe, hari mu 2005, Shadary yabaye Umunyamabanga Nshingwabikorwa mu ishyaka ushinzwe ibikorwa by’amatora, ndetse akanabifatanya n’inshingano zo gucunga ikinyabupfura muri iryo shyaka, iyi myanya yombi isanzwe itanoroshye, akaba yarayimazeho imyaka icumi kuva mu 2005 kugeza mu 2015.

Shadary kandi yakuriye itsinda ryari rishinzwe kwamamaza Kabila mu matora yo 2011 mu ntara ya Maniema, kandi mu gihe cyavuzwe haruguru, uhereye mu 2006, yari Visi Perezida w’Akanama gashinzwe ubutegetsi n’ubutabera mu Nteko ishinga amategeko ya Congo.

Yayoboye itsinda ry’urugaga rw’abadepite bo mu ruhande ruvuga rumwe na Leta mu Nteko ya Congo ari nawo mwanya n’ubu yari akiriho.

Mu 2015, Shadary yagizwe umunyamabanga wungirije w’ishyaka PPRD rya Joseph Kabila Kabange, mu mwaka wakurikiyeho ku itariki ya 19 Ukuboza 2016, agirwa Minisitiri w’Intebe wungirije akaba na Minisitiri w’Umutekano w’imbere mu gihugu kugeza kuwa 22 Gashyantare 2018.

Nkuko biri mu nshingano z’utegerejweho kuba Perezida w’igihugu, ibigwi bya Shadary Ramazani ntibyerekana ubumenyi mu by’umubano mpuzamahanga.
Nkuko bigaragara, nta hantu yigeze akora imirimo ifite aho ihuriye na Dipolomasi mpuzamahanga kandi Congo Kinshasa ari igihugu gikunze kugaruka mu ruhando mpuzamanga mu buryo bumwe cyangwa ubundi.

Emmanuel Ramazani Shadary arahabwa amahirwe menshi yo gusimbura Kabila

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza