Ibihugu bigize COMESA birimo n’u Rwanda mu nyigo yo kugabanya ikiguzi cy’itumanaho

Yanditswe na Evariste Nsengimana
Kuya 12 Ukwakira 2017 saa 10:23
Yasuwe :
0 0

Abaminisitiri b’Ibikorwaremezo mu Muryango w’Ubucuruzi bw’Ibihugu bya Afurika y’Amajyepfo n’Uburasirazuba u Rwanda rubarizwamo (COMESA), batangaje ko hari kwigwa uko hagabanywa ikiguzi ababituye bakoresha bahamagarana, bandikirana ubutumwa bugufi n’icya internet, bigashyirwa ku giciro kimwe hose.

Ubu buryo bwiswe ’Roaming services’ bukoreshwa n’abakiliya b’ibigo bitanga serivisi z’itumanaho bakoresha mu gihe barenze imbibi z’ibihugu byabo mu guhamagarana, koherezanya ubutumwa no gukoresha internet bahawe uburenganzira n’ibigo by’itumanaho by’aho baherereye.

Daily Monitor yatangaje ko iki cyemezo cyafatiwe mu nama iheruka kubera i Lusaka muri Zambia mu mpera z’icyumweru gishize, yahurije hamwe abahagarariye ibihugu 15 muri 19 bigize uyu muryango, bavuga ko uyu mushinga ugamije kugabanya igiciro cy’ikoranabuhanga n’itumanaho ubu risigaye rihenze muri Afurika ugereranije n’ahandi ku isi.

Muri Afurika, abenshi bishyura amafaranga agera kuri 25% mu guhamagarana, ayingayinga ayo umuturage wabyo yinjiza ku kwezi, mu gihe mu bindi bihugu bikizamuka bikoresha 11%.

Aba baminisitiri batangaza ko mu gihe uyu mushinga uzaba ushyizwe mu bikorwa, uzarushaho koroshya ubuhahirane hagati y’ibihugu; kuri ubu umusaruro wabwo wazamutse kuva kuri miliyari eshatu z’amadolari ya Amerika mu 2000, ukaba ugeze kuri miliyari 20.9 nyuma yo koroshya ubucuruzi.

Ubushakashatsi bwakorewe muri bimwe mu bihugu bigize COMESA, bwagaragaje ko umuturage muri Malawi akoresha amadolari asaga 12 ku kwezi kuri telefone, arenga ½ cy’imari yinjiza, ibintu abaminisitiri bavuga ko bikabije guhenda.

Aba baminsitiri basobanura ko COMESA ikwiye kwigana ibindi bihugu byashyizeho uburyo bwo koroherezanya mu itumanaho, aho batanga urugero ku bigize umuryango wa Afurika y’Iburasirazuba (EAC) n’uw’Ibihugu by’i Burayi (EU) byatangije ubu buryo.

Imyanzuro yashyizwe hanze igaragaza ko ubu buryo bushoboka kandi bworoshye mu gihe ibihugu byashora imari itubutse mu kubaka imiyoboro y’itumanaho kugira ngo birusheho gutanga itumanaho ryiza kandi rihendutse.

Aba baminisitiri bavuze ko muri rusange, abakoresha internet muri COMESA ari 37% by’Abanyafurika, mu gihe muri Afurika, abayikoresha bangana na 7% by’abayikoresha ku isi; ibi bisobanuye ko abatuye COMESA bakoresha internet bangana na 2.5% by’abayikoresha ku isi.

Muri Afurika y’Iburasirazuba, Kenya, Uganda n’u Rwanda byamaze guhuza uburyo bwo guhamagarana no koherezanya ubutumwa bugufi binyuze mu mushinga uhuriweho n’ibihugu bigize Umuhora wa Ruguru, u Burundi na Tanzania byo ntibirinjiramo.

Ubu guhamagara hagati y’u Rwanda na Uganda, bifata amashilingi 350 ku munota, mu gihe ku bihugu by’u Burundi na Tanzania bitarashyiraho ubwo buryo ari hagati y’amashilingi 875 na 1050.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza