Nigeria: Umuyobozi w’Urwego rw’Iperereza yirukanywe azira kubuza abadepite kwinjira mu Nteko

Yanditswe na Akayezu Jean de Dieu
Kuya 8 Kanama 2018 saa 10:14
Yasuwe :
0 0

Visi Perezida wa Nigeria ari nawe ufite inshingano z’Umukuru w’igihugu w’umusigire, Prof Yemi Osinbajo, yirukanye umuyobozi w’urwego rushinzwe iperereza, nyuma y’aho urwego ayoboye rwabujije abagize Inteko Ishinga Amategeko kwinjira ku ngoro yabo ku mpamvu zitaramenyekana.

Abantu bambaye impuzankano y’urwego rushinzwe iperereza imbere mu gihugu bagaragaye ku marembo y’ingoro y’Inteko Ishinga Amategeko mu murwa mukuru Abuja, kuri uyu wa Kabiri.

Baje kunganirwa na polisi, babuza abagize Inteko Ishinga Amategeko kwinjira mu gihe kingana n’isaha nkuko Reuters yabitangaje.

Umuvugizi wa Visi Perezida Osinbajo yatangaje ko umuyobozi w’urwego rushinzwe iperereza imbere mu gihugu, Lawal Musa Daura yahise yirukanwa.

Osinbanjo ni we uri kuyobora na Nigeria nka Perezida w’agateganyo mu gihe Muhammadu Buhari ari mu kiruhuko cy’iminsi icumi mu Bwongereza.

Itangazo ryasohowe n’ibiro bya Perezida rigira riti “Icyo gikorwa kinyuranyije n’amategeko cyakozwe Perezidansi itabizi, ni icyo kwamaganwa kandi ntigishobora kwemerwa.”
Iri tangazo ryavuze ko ari nko guhirika Inteko Ishinga amategeko binyuranyije n’amategeko.

Uku kubuza intumwa za rubanda kwinjira mu ngoro bije bikurikira bamwe mu basenateri n’abadepite basaga 50 baherutse kwivana mu ishyaka APC riri ku butegetsi, bakinjira mu ishyaka ritavuga rumwe n’ubutegetsi. Mu biyomoye ku ishyaka riri ku butegetsi harimo na Perezida wa Sena, Bukola Saraki.

Uku kwiyomora kwatumye ishyaka rya Buhari ritakaza ubwiganze muri Sena, bikaba bimushyiraho igitutu mu gihe ashaka kwiyamamariza manda ya kabiri mu matora azaba muri Gashyantare 2019.

Abenshi mu bitandukanyije n’ishyaka rya Buhari binjiye mu ishyaka People’s Democratic Party ryayoboye Nigeria guhera mu 1999 kugeza muri Gicurasi 2015 ubwo Buhari yatsindaga amatora.

Abashyigikye Saraki bavuze ko uko kubuza intumwa za rubanda kwinjira byari bigamije kumuhirika ku mwanya ariho. Saraki na we yamaganye icyo gikorwa, avuga ko ari igitero cyagabwe ku Nteko Ishinga Amategeko.

Ishyaka riri ku butegetsi ryavuze ko abari kurishinja kwihisha inyuma y’icyo gikorwa bari gukwirakwiza ibihuha.

Abashinzwe umutekano babujije intumwa za rubanda kwinjira mu Nteko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza