RDC: Kabila ntaziyamamaza, ishyaka rye ryatanze uwabaye minisitiri w’umutekano nk’umukandida

Yanditswe na Mathias Hitimana
Kuya 8 Kanama 2018 saa 04:10
Yasuwe :
0 0

Ku munsi wa nyuma wo gutanga kandidatire mu matora ya Perezida wa Repubulika Iharanira Demokarasi ya Congo (RDC), habonetse umukandida w’ishyaka riri ku butegetsi Emmanuel Ramazani Shadary, bivana igihu ku rujijo rumaze iminsi hibazwa niba Joseph Kabila azongera kwiyamamaza.

Emmanuel Ramazani Shadary w’imyaka 57 ni Umunyamabanga Uhoraho w’ishyaka riri ku butegetsi, PPRD, mu Ukuboza 2016 kugeza muri Gashyantare 2018 akaba yaragizwe Minisitiri w’Intebe wungirije akaba na Minisitiri w’Umutekano wa RDC.

Kuri uyu wa 8 Kanama 2018 ni wo munsi wa nyuma Komisiyo y’Amatora muri RDC yakiraho ibyangombwa by’abashaka kwiyamamariza kuyobora igihugu mu matora ateganyijwe ku wa 23 Ukuboza 2018.

Kugeza ubu Kabila yari ataremeza niba ataziyamamaza, gusa akavuga ko azubahiriza itegeko nshinga. Umuvugizi wa Guverinoma Lambert Mende akaba n’umwe mu bagize ihuriro ry’amashyaka ari ku butegetsi (FCC), kuri uyu wa Gatatu nibwo yatangaje ko Ramazani azahagararira iri huriro.

Yagiye ku butegetsi mu 2001 nyuma y’urupfu rwa Se, Laurent-Desire Kabila wayoboraga icyo gihugu. Yaje gutorwa binyuze mu matora ya demokarasi mu 2006, ari nayo matora ya mbere yari abaye muri RDC kuva yabona ubwigenge mu 1960.

Yaje gutorerwa manda ya kabiri mu 2011 ari nayo ya nyuma mu kuko itegeko nshinga rya RDC rigena ko Perezida wa Repubulika ayobora manda ebyiri gusa, irangira mu 2016, ariko amatora ntiyahita aba ku buryo bamwe bamushinjaga gushaka kwiyongeza izindi manda.

Perezida Joseph Kabila ntaziyamamariza kuyobora RDC
Emmanuel Ramazani Shadary w'imyaka 57 watanzwe nk'umukandida w'ishyaka riri ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza