RDC: Katumbi yasabye uburenganzira bw’uko indege ye yagwa ku kibuga cya Lubumbashi

Yanditswe na Mukaneza M.Ange
Kuya 31 Nyakanga 2018 saa 08:48
Yasuwe :
0 0

Nyuma y’imyaka isaga ibiri ari mu buhungiro, Moïse Katumbi utavuga rumwe n’ubutegetsi buriho muri Repubulika Iharanira Demokarasi ya Congo, RDC, yasabye uburenganzira bwo gukoresha ikibuga cy’indege cya Lubumbashi.

Muri Gicurasi 2016 nibwo Katumbi yavuye muri RDC avuga ko agiye kwivuza, kuva icyo gihe ntiyigeze agaruka mu gihugu. Yakatiwe gufungwa imyaka itatu adahari azira kuba yaragurishije nta burenganzira inzu y’umugereki witwa Alexandros Stoupis.

Yanashyiriweho kandi impapuro zimuta muri yombi kubera ibyaha byo kwinjiza mu gihugu abasirikare b’abacancuro baturutse muri Leta Zunze Ubumwe za Amerika, urubanza rwe ruzaburanisha n’Urukiko rw’Ikirenga tariki ya 10 Ukwakira.

Kuri uyu wa Mbere nibwo yanditse ibaruwa asaba Ubuyobozi bw’Ikigo kigenzura indege za gisivili muri RDC kumwemerera gukoresha ikibuga cy’Indege cya Lubumbashi.

Muri iyi baruwa, Katumbi yagaragaje urutonde rw’abantu batandatu bazaba bari kumwe nawe mu ndege bwite barimo umuvugizi we, Olivier Kamitatu; bateganya kugera Lubumbashi tariki ya 3 Kanama.

Aganira na AFP, Katumbi yavuze ko ari i Johannesburg muri Afurika y’Epfo kandi yiteguye gukoresha inzira yo ku butaka anyuze muri Zambia, igihe cyose yaba yimwe uruhushya yasabye.

Azaba ajyanywe no gutanga kandidatire ye ku mwanya w’umukuru w’igihugu, igikorwa giteganyijwe kurangira tariki ya 8 Kanama, mu gihe amatora azaba mu Ukuboza uyu mwaka.

Katumbi wahoze ari inshuti ikomeye ya Perezida Joseph Kabila, yitandukanyije nawe muri Nzeri 2015 nyuma yo gusezera ku mwanya yariho wa Guverineri w’Intara ya Katanga.

Katumbi ubwo yari i Kigali mu Rwanda yitabiriye inama yari yateguwe na Mo Ibrahim Foundation

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza