Tanzania: Umudepite agiye gusaba ko imyaka ya manda ya Perezida yongerwa

Yanditswe na Herve Ugirumukunda
Kuya 13 Ukwakira 2017 saa 12:33
Yasuwe :
0 0

Depite Juma Nkamia wo muri Tanzania yatangiye inzira yo gusaba ko imyaka ya manda y’Umukuru w’igihugu yakongerwa kugira ngo harengerwe amafaranga agenda mu gukoresha amatora.

Juma Nkamia wahoze ari Minisitiri wungirije w’Itangazamakuru, yavuze ko agiye gusaba ishyaka riri ku butegetsi, Chama Cha Mapinduzi (CCM), ko iyo myaka yongerwa ikava kuri itanu igashyirwa kuri irindwi.

Nk’uko tubikesha Bloomberg, iri shyaka niribyemeza uwo mudepite ateganya kwandikira Inteko Ishinga Amategeko ayisaba ko iganira kuri iyo ngingo nk’uko .

Yagize ati “Dutakaza amafaranga menshi mu matora. Kuki tutakongera umubare wa manda ?”

Anashaka ko amatora y’inzego rusange n’ay’abadepite yajya abera rimwe kugira ngo amafaranga ayagendaho agabanuke.

Umunyamabanga wungirije ushinzwe ingengabitekerezo n’ibikorwa byo kwamamaza muri CCM, Humphrey Polepole, yavuze ko ishyaka ridateganya kuganira kuri iyo ngingo vuba.

Ati “Ishyaka ntirirabiganiraho kandi nta nubwo biri kuri gahunda y’inama ziri hafi zaryo.”

Pius Msekwa, Visi-Perezida wa CCM wahoze ari n’Umuyobozi w’Inteko, yabwiye Azam TV ko iryo shyaka ryigeze kuganira ku ngingo yo kongera umubare wa manda Perezida yemerewe kuyobora ariko icyo gitekerezo kikamaganwa.

Msekwa avuga ko nta kabuza ko n’ibyo Depite Juma Nkamia ashaka bitazamushobokera.

Kuri ubu abadepite 275 muri 391 mu Nteko Ishinga Amategeko ya Tanzania ni abo muri CCM. Muri Kamena, Ali Hassan Mwinyi wahoze ari Perezida w’icyo gihugu yavuze ko iyo hatabaho manda z’Umukuru w’igihugu yari kwifuza ko Perezida John Pombe Magufuli akomeza kuyobora kugeza apfuye.

Ubwo yasuraga abaturage mu gace ka Tanga, Magufuli yavuze ko atakwemera kuguma ku butegetsi igihe manda ze zizaba zirangiye. Icyo gihe nabwo umwe mu badepite yavuze ko akwiye kuguma ku butegetsi nibura imyaka 20.

Perezida Magufuli yatangiye kuyobora Tanzania mu mpera za 2015, atsinze amatora ku majwi 58 %.

Yahise atangiza gahunda zidasanzwe muri icyo gihugu zo kurwanya ruswa, kurengera umutungo w’igihugu agabanya amafaranga agenerwa abayobozi bakuru no kongera inganda mu gihugu.

Depite Juma Nkamia wifuza ko manda ya Perezida wa Tanzania yava ku myaka itanu ikaba irindwi
Perezida wa Tanzania, John Pombe Magufuli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza