U Burundi bwatangiye gukingira abakozi bo mu nzego z’ubuzima Ebola

Yanditswe na Habimana James
Kuya 15 Kanama 2019 saa 03:27
Yasuwe :
0 0

Ishami ry’Umuryango w’Abibumbye ryita ku buzima, OMS, ryatangaje ko igihugu cy’u Burundi cyatangiye gukingira icyozero cya Ebola abakozi bakora mu nzego z’ubuzima, ku mipaka iki gihugu gihana na Repubulika Iharanira Demokarasi ya Congo.

OMS yavuze ko iri kingira ryatangiye ku wa Kabiri tariki 13 Kanama uyu mwaka mu gace ka Gatumba, ni hafi y’umupaka w’u Burundi na Repubulika Iharanira Demokarasi ya Congo.

OMS yatangaje ko u Burundi bwamaze kubona urukingo rwa Ebola rwitwa “rVSV-ZEBOV”, uru rukaba rwagaragaje ubushobozi bwo guhangana n’iki cyorezo muri Congo.

Ikinyamakuru The East African cyavuze ko uru rukingo ruzahabwa abafite ibyago byinshi byo kwandura iyi ndwara, aba barimo abakozi b’ubuzima begereye umupaka, abakora muri laboratwari ndetse n’abakora mu matsinda yo gushyingura abitabye Imana.

Dr Kazadi Mulombo uhagarariye OMS mu Burundi yagize ati “Gukingira abakozi b’ubuzima n’abandi bari ku mupaka, ni uburyo bwiza bwo kwitegura guhangana n’iyi ndwara.”

Uru rukingo rwabanje gukoreshwa mu 2013 muri Guinea, ubwo iki cyorezo cyari cyibasiye ibihugu byo muri Afurika y’Iburengerazuba.

Kugeza ubu Ebola imaze guhitana abantu 1900 muri Repubulika Iharanira Demokarasi ya Congo kuva muri Kanama 2018.

Kugeza ubu nta muntu uragaragaza ikimenyetso cya Ebola mu Burundi, ariko iki gihugu gishyirwa mu bihugu bishobora kwandura iyi ndwara kubera uburyo cyegeranye na Congo.

Abashakashatsi baherutse kugaragaza ko Ebola ishobora kuvurwa igakira, nyuma y’uko igerageza rimaze igihe ku miti ibiri muri RDC ryerekanye ko iha umurwayi amahirwe yo gukira ku kigero kiri hejuru, ugereranyije n’isanzwe.

OMS, n’Ikigo cy’Abanyamerika gishinzwe indwara zandura ni byo byateye inkunga igeragezwa ry’imiti mishya irimo REGN-EB3 na mAb114, irwanya virusi ya Ebola mu maraso.

Abakozi bo mu nzego z'ubuzima mu Burundi batangiye gukingirwa Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza