Amb. Mugambage yabeshyuje amakuru y’uko hari umunyarwanda warasiwe muri Uganda

Yanditswe na Bukuru JC
Kuya 7 Nzeri 2019 saa 02:11
Yasuwe :
0 0

Mu gisa n’umugambi wo gukomeza guharabika isura y’u Rwanda, ibinyamakuru byo muri Uganda byatangaje ko umwe mu bantu babiri barasiwe Entebbe ku wa Kane yari Umunyarwandakazi, nubwo byaje kugaragara ko cyari ikinyoma kuko abishwe bari abaturage ba Uganda.

-  Igihiriri cy’ibihuha ku Rwanda bicurirwa muri Uganda gikomeje kwiyongera

-  Umutekano muri Uganda usigaye ugerwa ku mashyi

-  Kugaragaza ko umwe mu barashwe ari umunyarwanda bifite icyo bihatse

- Amb. Mugambage yanyomoje ibyavuzwe n’ibinyamakuru bya Uganda

Nyuma y’iraswa ry’abo bantu babiri bari mu modoka ya Toyota Land Cruiser, ibinyamakuru byo muri Uganda birimo ikinyamakuru cya Leta y’icyo gihugu New Vision n’ibindi bitandukanye byatangaje ko uwarashwe ari Umunyarwandakazi wari kumwe n’umurinzi we [bodyguard].

Ku mbuga nkoranyambaga muri Uganda kuri uyu wa Gatanu tariki 6 Nzeri 2019 habanje gucicikana amakuru yemezaga ko uwo Munyarwandakazi wicanwe n’umurinzi we yari Kamikazi Rutagengwa Fiona, mu gihe hari abandi bavugaga ko uwishwe yitwa Sylvia Princess Kamikazi.

Aba bombi ni Abanyarwandakazi, gusa muri bo nta n’umwe wakandagiye mu gace iryo sanganya ryabereyemo kuri uwo munsi kuko yaba Princess cyangwa Fiona bombi bahise bifashisha imbuga nkoranyambaga mu kubeshyuza ayo makuru. Umwe yavuze ko yari i Kigali, undi na we yandika ahumuriza inshuti n’abavandimwe ababwira ko ari muzima.

https://www.facebook.com/kamikazi.sylvia

Gukwiza ibinyoma mu itangazamakuru n’imbuga nkoranyambaga byaje bikurikira amakuru yari yatanzwe na Polisi ya Uganda nyuma yo kugera ahari habereye buriya bwicanyi gusa yo yatangaje ko abarashwe ari Nteyireho Ruhengyera Joshua w’imyaka 38 basanze aryamye hanze y’imodoka, n’umugore witwa Tumukunde Merina w’imyaka 37 warashwe agapfa ariko akaguma mu modoka yicaye, akaba Umunya-Uganda ukomoka Mbarara.

Mu kiganiro na IGIHE ku murongo wa telefoni, Ambasaderi w’u Rwanda muri Uganda, Frank Mugambage, yatangaje ko abarashwe ntaho bahuriye n’u Rwanda nk’uko na raporo ya Polisi ya Uganda ibigaragaza.

Yavuze ko abakomeje gukwiza ibihuha ari “abagamije icengezamatwara bahimbye nkana imyirondoro y’abarashwe mu gukwirakwiza imigambi yabo mibi.”

Polisi yemeje ko kugeza ubu hataramenyekana impamvu yateye iraswa ry’aba bantu. Yatangaje ko umugabo warashwe yari inshuti n’umupolisi witwa Taremwa Davis wacungaga umutekano kuri Hidden Treasure Hotel i Entebbe ndetse ngo yamusabye kumuherekeza kuri Millennium Hotel iri ahitwa Zana, aho yagombaga guhura n’umuntu bagura imodoka, ibintu ngo ubusanzwe bitemewe.

Uko ari batatu ngo bagiye mu modoka, ariko ngo “Uko byagenze kuva kuri Millenium Hotel kugeza ku kiraro cya Nambigirwa aho iraswa ryabereye ntabwo birasobanuka.”

Kugeza ubu uwo mupolisi yatawe muri yombi mu gihe iperereza rikomeje.

-  Umutekano muri Uganda usigaye ugerwa ku mashyi

Muri iki gihe muri Uganda umutekano wabaye iyanga. Abantu bicwa hafi ya buri munsi hirya no hino mu gihugu. Inzego z’umutekano na zo zisigaye zarabigize umuco gukoresha iyicarubozo mu mabohero yazo.

Ibi bikorwa bibera mu bwiru biheruka gushyirwa ku mugaragaro n’abarimo Minisitiri w’Umutekano muri Uganda, Gen Elly Tumwine, weruye akavuga ukuri kw’ibyariho.

Uyu mugabo w’imyaka 65 muri Kanama uyu mwaka yabwiye Komisiyo y’Abadepite ishinzwe Uburenganzira bwa Muntu ko mu gihugu cye hari inzu zifungirwamo abantu zitazwi ndetse badashobora kwemererwa kuzisura kubera impamvu z’umutekano.

Tumwine yasubizaga ku birego by’iyicarubozo rikorerwa mu nzu zifungirwamo abantu zitazwi (Safe Houses).

Uganda yemeye ko ifite inzu zifungirwamo abantu zitazwi mu gihe ikomeje kotswa igitutu cyo guta abantu [biganjemo Abanyarwanda] muri yombi mu buryo butemewe n’amategeko no kubafungira ahantu hatazwi bagakorerwa iyicarubozo ndetse ntibanagezwe mu butabera.

Inashinjwa kandi ko binyuze mu Rwego rushinzwe Umutekano imbere mu gihugu (ISO), hakorwa imikwabu hagafatwa abasivili b’inzirakarengane bagatwarwa mu nzu zifungirwamo zitazwi bagakorerwa iyicarubozo.

Si Abanya-Uganda gusa bavuga ubunyamaswa bakorerwa n’inzego z’umutekano zibafungira ahatazwi, kuko hari n’abanyarwanda bashimuswe n’Urwego rw’Ubutasi mu gisirikare cya Uganda, CMI na ISO, bagafungirwa muri izo nzu bashinjwa kuba intasi z’u Rwanda.

Abenegihugu batagira ingano bamaze kubura ubuzima muri ibyo bikorwa. Mu bishwe harimo na

Inkuru yashenguye imitima ya benshi ni y’urupfu rwa Michael Kalinda wamamaye nka Ziggy Wine mu muziki. Uyu muhanzi yishwe urw’agashinyaguro nyuma yo kumara igihe atotezwa mu buryo bukomeye.

Uyu musore wabarizwaga mu itsinda rya Firebase yashimuswe n’abantu batigeze bamenyekana ari kwerekeza kuri studio ye iri ahitwa Kamwokya, ku wa 21 Nyakanga 2019, nyuma aza gusangwa ahitwa Mulago yakuwemo ijisho yanaciwe intoki ebyiri.

Ihohoterwa ntirikorerwa ibyamamare gusa ahubwo n’abaturage basanzwe ntibareberwa izuba kuko hirya no hino usanga inzego z’umutekano zidahwema guhonyora uburenganzira bwabo.

Kuba Uganda igerageza kwinjiza u Rwanda mu bibazo irimo, bamwe mu basesenguzi babifata nk’uburyo Museveni n’ibyegera bye babonye bwo kuyobya uburari no kubindikiranya abaturage biganjemo abarambiwe imitegekere mibi ya Museveni.

Yewe no gukwirakwiza ko uriya Mugandekazi wishwe ari Umunyarwanda abasesenguzi twagiranye na bo ikiganiro bifuje ko amazina yabo adatangazwa bavuze ko biri mu mugambi wa Uganda wo gukomeza kuyobya uburari, u Rwanda rugirwa urwitwazo mu kabi kose gateye muri kiriya gihugu.

-  Uganda ikomeje kongera imbaraga mu gukwiza ibihuha [fake news] bivuga ku Rwanda

Itangazamakuru rya Uganda kuva uyu mwaka watangira ryakajije umurego mu gutangaza ibinyoma agahiryi ku Rwanda. Yaba ibinyamakuru byahoze bikora kinyamwuga nka New Vision na The Monitor, usanga byarafashe umurongo umwe na ChimpReports, urubuga rutangaza amakuru rwabanjirije ibindi bitangazamakuru bikorera muri Uganda

Muri iki gihe kandi muri Uganda hagaragara imbuga nyinshi nshya usanga zitangaza amakuru y’ibinyoma n’aharabika u Rwanda. Muri izi mbuga harimo izitwa Command Post, Soft Power ya Sarah Kagingo ukora mu Biro bya Museveni n’izindi nyinshi usanga zisa n’izafunguriwe guhangana n’u Rwanda.

Amakuru yandi yizewe agera kuri IGIHE yemeza ko kandi hari itsinda ry’abasore n’inkumi ry’abarenga 60 ryashyizweho n’Urwego rwa Gisirikare rushinzwe Ubutasi muri Uganda [CMI], rihabwa inshingano zo guharabika u Rwanda no gukwiza ibinyoma hifashishijwe imbuga nkoranyambaga, aba bafunguye konti mu mazina mpimbano kuri Twitter na Facebook bakoresha muri ibyo bikorwa.

Ibi byose bigaragaza ko Uganda ikataje mu bikorwa by’agasomborotso ku Rwanda.

Gututumba k’umwuka mubi mu mubano w’ibihugu byombi kwafashe indi sura mu mwaka wa 2017 ubwo Uganda yatangiraga ku mugaragaro ibikorwa byo gushimuta Abanyarwanda babarizwa ku butaka bwayo, bagakorerwa iyicarubozo ndengakamere.

Mu kwezi gushize abakuru b’ibihugu byombi basinyiye amasezerano y’amahoro i Luanda muri Angola agamije gusubiza umubano ku murongo, gusa Leta ya Uganda ishinjwa kuyarengaho kuva ku isegonda rya mbere agishyirwaho umukono kuko yakomeje gutoteza Abanyarwanda, kubafunga binyuranyije n’amategeko no kubakorera iyicarubozo.

U Rwanda rushinja Uganda gukorana n’imitwe igamije kuruhungabanyiriza umutekano irimo RNC ya Kayumba Nyamwasa, FLN, FDLR n’indi. Muri Uganda kandi iyo mitwe yahawe rugari ari naho icurira imigambi yose igamije guhungabanya umutekano w’u Rwanda, yewe na Perezida Yoweri Museveni yiyemereye ubwe ko yagiranye inama na bamwe mu bagize RNC barimo Gasana Eugène Richard na Mukankusi Charlotte.

Ikinyamakuru cya Leta ya Uganda, New Vision cyanditse ko uwarashwe ari Umunyarwandakazi
Abarashwe bari mu modoka ya Toyota Land Cruiser

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza