Uko BDF yafashije Mutabazi kwiteza imbere akoresheje ubuhinzi bw’inyanya na ‘poivron’

Yanditswe na Ndayikunda Josué
Kuya 15 Nzeri 2019 saa 12:58
Yasuwe :
0 0

Mutabazi Innocent ni rwiyemezamirimo w’imyaka 25 warangije Kaminuza mu Ishami ry’Ikoranabuhanga mu Binyabuzima (Biotechnology) ahitamo kuyoboka inzira y’ubuhinzi bwamufashije kwiteza imbere no kudasabiriza iby’ingenzi akeneye mu buzima bwe.

Mutabazi agisoza kaminuza yisunze mugenzi we Mugabe Andrew, batangiza Gasabo Model Farm, aho bakora ubuhinzi bukorerwa we mu nyubako (Green House) bwibanda ku nyanya na poivron.

Aba bombi bakorera umushinga wabo mu Murenge wa Kinyinya mu Karere ka Gasabo.

Mu kiganiro yahaye IGIHE, Mutabazi yavuze ko mu gutangira umushinga wabo yari abayeho mu buzima bwo gusaba buri kimwe cyose ku babyeyi n’abandi bantu.

Yagize ati “Urumva ntaratangira gukora aha ngaha, nabaga ndi wa muntu usabiriza amafaranga, kuva ku yo guhamagara, nasabaga ababyeyi buri kintu icyo aricyo cyose ariko ubu sinabitinyuka.”

Mu kwagura ibikorwa byabo, Mutabazi na Mugabe bigiriye inama yo kugana Ikigega gitanga ingwate ku mishinga mito n’iciriritse, BDF, kibafasha kubona miliyoni 7 Frw bifashishije mu kunoza ubuhinzi bwabo.

Mutabazi yakomeje avuga ko mu mwaka umwe bamaze batangiye ubuhinzi biguriye moto ibafasha kugeza umusaruro ku bakiliya.

Ubu buhinzi kandi ngo nibwo bubatunze, bukabafasha no kwishyura abakozi, kugura imbuto n’imiti ndetse no gukemura ibibazo byo mu buzima bwa buri munsi.

Gasabo Model Farm ubu ifite abakozi batatu barimo agronome, umukozi ushinzwe kwita ku bihingwa no kubikorera n’umuzamu.

Nubwo bagihura n’ikibazo cyuko ingano y’umusaruro udahoraho, Mutabazi avuga ko uwo babonye bawubonera isoko mu Mujyi wa Kigali.

Mu myaka itanu iri imbere, Gasabo Model Farm ifite icyerekezo cyo kuzaba iri ku rwego rwo kubyaza umusaruro w’ibihingwa byabo, bikavamo ibindi bicuruzwa bitandukanye.

Mutabazi akomeje avuga ko “Mbere na mbere turashaka kwagura ubuhinzi bwacu ku buryo igihe cyose umukiliya azajya ashaka ikintu tuzajya duhita tukibona. Ikindi turi gutekereza uburyo twajya dufata poivron cyangwa urunyanya tukarukuramo ikindi kintu.”

BDF itanga serivisi zitandukanye zirimo ingwate, inkunga, gufasha udukiriro, gushora imari mu mishinga runaka, gutera inkunga imishinga y’urubyiruko ruri mu buhinzi, kongerera Sacco ubushobozi ndetse igatanga ubujyanama n’amahugurwa.

Iki kigega cyatangaje ko mu 2019 izatera inkunga imishinga iciriritse isaga ibihumbi 4000 izibanda cyane ku y’urubyiruko.

Umwaka ushize BDF yateye inkunga imishinga 2083 itangwaho asaga miliyari 11 na miliyoni zirenga 35 Frw. Uyu mwaka imishinga izaterwa inkunga izikuba kabiri igere ku 4827, itware miliyari 11 na miliyoni zirenga 500 Frw.

Ikorana n’ibigo by’imari bisaga 400 hirya no hino mu gihugu ari naho inyuza ingwate cyangwa inkunga iha abafite imishinga myiza.

Kuva mu 2011, BDF imaze gukora ishoramari rya miliyari zisaga 77 Frw yiganjemo ayatanzwe ku ngwate angana na miliyari 59. Imaze gufasha imishinga 26564 irimo iy’abagore 6600 (24%) n’iy’urubyiruko 8649 (32%).

BDF ivuga ko umwaka ushize amafaranga yinjiza yazamutseho 13%.

Mutabazi Innocent avuga ko ubuhinzi bwamukuye ku ngoyi yo gutegera abandi amaboko
Gasabo Model Farm ihinga poivron iteganya no gutangira kubyazamo ibindi biribwa
Uyu murima ufite umukozi wita ku bihingwa biwurimo umunsi ku wundi
Gasabo Model Farm ihinga inyanya ikoresheje ikoranabuhanga rigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza