Abadepite bagaragaje impungenge ku ngano y’imirimo leta ivuga ko ihanga buri mwaka

Yanditswe na HABIMANA James
Kuya 10 Kamena 2019 saa 04:36
Yasuwe :
0 0

Abadepite bagize Komisiyo y’Imibereho y’Abaturage bavuze ko hagomba kubaho gushishoza ku mibare itangwa y’imirimo mishya ihangwa buri mwaka mu Rwanda.

Kuri uyu wa Mbere Minisitiri w’Abakozi ba Leta n’Umurimo (Mifotra), Rwanyindo Kayirangwa Fanfan yitabye iyi Komisiyo mu gikorwa cyari kigamije kumenya aho politiki yo guhanga imirimo mishya mu Rwanda igeze ishyirwa mu bikorwa no kumenya niba itegeko rigenga umurimo mu Rwanda ryubahirizwa mu nzego zitandukanye.

Kimwe mu bibazo byagaragajwe n’abadepite ni uko mu turere bagiyemo, basanze umuntu umwe ahanga umurimo, yatanga akazi ku bantu runaka ba bantu yahaye akazi bagatangirwa raporo ku rwego rw’Igihugu ko nabo bahanze imirimo kandi atari byo.

Muri Gicurasi 2018, Minisitiri w’Imari n’Igenamigambi, Dr Uzziel Ndagijimana, yatangaje ko mu 2019 Leta yiyemeje guhanga imirimo igera ku 216 217 binyuze mu gukomeza gahunda y’Igihugu igamije kwihutisha ihangwa ry’imirimo izwi nka Kora Wigire.

Gahunda ya Guverinoma y’imyaka irindwi (2017-2024) igamije kwihutisha ubukungu iteganya ko kugira ngo ubukungu buzagerweho ku gipimo cyifuzwa hazakorwa ibikorwa by’ingenzi birimo guhanga imirimo mishya ibyara inyungu igera nibura kuri miliyoni 1.5.

Abadepite bagaragaje ko hashobora kubaho kwibeshya, kuko bitumvikana uburyo umushoramari ashobora guha akazi abaturage bamwubakira inzu, ba bantu nabo bagashyirwa mu mibare ko bahanze umurimo ndetse bikagenderwaho.

Perezida wa Komisiyo y’Imibereho y’Abaturage, Muhongayire Christine yagize ati “Mu ihangwa ry’umuri twasanze harimo kubyitiranya, umuntu abona akazi na we bikwitwa ko yahaze umurimo. Urugero niba umuntu ashinze salon yogosha agaha akazi abandi, nibyo baba babonye akazi ariko ntabwo ari umurimo bahanze ahubwo babonye akazi.”

Yakomeje agira ati “Twasanze abayobozi batanga raporo babivanga, bagafata uwahanze umurimo n’ababonye akazi, bagahita bohereza raporo ngo twahanze imirimo ibihumbi runaka kandi wajya kureba ba bantu babonye umurimo ugasanga bazamaramo amezi abiri cyangwa atatu nyuma bakagenda.”

Yavuze ko ari nako bibarwa muri gahunda ya VUP, abakozemo bagafatwa nk’abahanzi akazi kandi bagahawe, igihe runaka kizagera bakavamo.

Ati “Muri VUP naho usanga abantu babonyemo akazi babarwa mu bahanze umurimo, niba VUP yahaye akazi abaturage 150 bakora umuhanda, warangiza ugasanga nabo babashyize mu mubare w’abantu bahanze umurimo. Yego yabonye akazi ariko uwo muhanda uzarangira mu mezi abiri bagende .”

Depite Uwanyiligira Gloriose we yagize ati “Turebye nabi twazasanga twaribeshye tukibwira ko hari aho twageze kandi atari byo. Hari aho twageraga tugasanga intego akarere kari karihaye karamaze kuyirenza ariko nidukomeza kugendera muri ibyo tuzagera aho dusange twaribeshye.”

Minisitiri w’Abakozi ba leta n’Umurimo, Rwanyindo Kayirangwa Fanfan we asa nk’uteramenya n’ibyo aba badepite bagaragaje.

Yagize ati “Niba umuntu yashize salon uwo ni umushinga ushobora kubyara umurimo kandi bariya bantu bahakora nabo bahabwa akazi, reka tuvuge niba uruganda nka Volkswagen ruhaye akazi abantu 1000, tubara ya mirimo yabonetse, ikibazo abantu bareba ni ukureba igihe iyo mirimo imara niba idasenyuka.”

Rwanyindo yavuze ko iyo habarwa imirimo yahanzwe, habarwa abantu bakora kuko ni nacyo kigaragaza abafite akazi n’abatagafite mu gihugu.

Imibare y’Ikigo cy’Igihugu cy’Ibarurishamibare yo mu 2017 igaragaza ko abanyarwanda bagejeje igihe cyo gukora badafite akazi ari 16.7 %.

Mu 2019 Leta yiyemeje guhanga imirimo igera ku 216 217 binyuze mu gukomeza gahunda y’Igihugu igamije kwihutisha ihangwa ry’imirimo izwi nka Kora Wigire.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza