Abadepite batesheje agaciro ‘akarengane’ kavugwa n’abaforomo batsindwa ibizamini bibinjiza mu rugaga

Yanditswe na Evariste Nsengimana
Kuya 31 Nyakanga 2018 saa 01:18
Yasuwe :
0 0

Inteko Ishinga Amategeko umutwe w’Abadepite, yatesheje agaciro ubusabe bwa bamwe mu bize ibijyanye n’ubuforomo, bayitakambiye ko bashyirwaho amananiza mu bizamini bibemerera kwinjira mu rugaga rugenga umwuga wabo mu Rwanda.

Iki kibazo cyakunze kugaragazwa n’abize ubuforomo basanzwe ari abakozi bize mu buryo bw’iya kure, bavuga ko ikizamini bakoreshwa kugira ngo bakirwe mu rugaga kidahuye n’amasomo bize, ko bashyirirwaho inota fatizo rihanitse ndetse bagashyirwaho n’andi mananiza mu gihe cyo kwiyandikisha kugikora.

Imibare igaragaza umusaruro w’abatsinda ibi bizamini uri hasi, urugero nko mu Ugushyingo 2016, abagera kuri 387 muri 557 bari bagikoze baratsinzwe naho muri Kamena 2017, Abaforomo n’ababyaza 171 mu barenga 1200 bari bagikoze ni bo gusa batsinze.

Kuri uyu wa Mbere ubwo Komisiyo y’Uburezi, Ikoranabuhanga, Umuco n’Urubyiruko yamurikiraga Inteko rusange umutwe w’Abadepite raporo ku bibazo by’abaturage, yasobanuye ko icyo kibazo yagisuzumye igasanga nta karengane karimo.

Perezida wa Komisiyo, Mukazibera Agnès, yavuze ko Komisiyo yaganiriye n’urugaga rw’abaforomo kuri icyo kibazo igasanga abavugaga ko barenganywa atari byo.

Ati “Komisiyo yaganiriye n’umuyobozi w’urwo rugaga avuga ko abo bantu bize bakoresheje uburyo bw’iyakure, ko nk’uko n’ahandi hose bikorwa, urugaga rwabahaye ikizamini, benshi muri bo baratsindwa bitewe n’uko bize nabo badafite ibyangombwa bihagije bijyanye no kwiga iyakure.”

Muri abo baforomo bavugaga ko bize iyakure nyamara nta mudasobwa bagira cyangwa banayigira ugasanga nta interineti bagira n’ibindi bitabemereraga gukurikirana amasomo mu buryo bw’iyakure.

Yakomeje agira ati “Ku buryo rero ikibazo atari integanyanyigisho idahura n’ibyo bize ahubwo ari uko batize neza bigatuma batsindwa ibyo bakabaye batsinda iyo baza kuba barabyize ku buryo bunoze. Nyuma yo kuganira n’ubuyobozi bw’urugaga, Komisiyo isanga nta karengane kabayeho kubera ko ikizamini bahawe cyateguwe hashingiwe ku bisanzwe bishingirwaho.”

Komisiyo yagaragaje ko gutsindwa byaturutse ku mpamvu zabo bwite, naho amafaranga yishyurwa mu rugaga, rwabasobanuriye ko ari aya serivisi bahabwa kuko nta handi rukura ingengo y’imari.

Abadepite bamwe bavuze ko ikibazo cy’abaforomo kimaze kurambirana mu gihe ingaga zishyirwaho gukemura ibibazo zikananoza n’imitangire ya serivisi, basaba ko Minisiteri y’ubuzima n’iy’uburezi zashyira hamwe zikagishakira igisubizo.

Visi Perezida w’Inteko Ishinga Amategeko, Umutwe w’Abadepite, Mukama Abbas, yavuze ko abantu bakwiye kumva ko kwiga ari ikintu kimwe ariko no kugaragaza icyo yize binyuze mu kubishyira mu bikorwa ari ikindi.

Ati “Ahantu hose bakora ibizami ugasanga benshi batsinzwe, ikibazo tukirebere mu myigire y’abana [...] Hari ingero nyinshi zibigaragaza ko ushobora guhamagaza nk’abantu 1000 hagatsinda umwe cyangwa babiri. Abo bake bo se ko batsinze? Wowe wajya kuvura umuntu udafite ubushobozi? Tuve mu marangamutima! Murumva ibyo bintu bifite ubusobanuro?”

Depite Nyabyenda Damien yavuze ko urugaga rufite akamaro mu guteza imbere imigendekere myiza y’ubuzima mu Rwanda.

Ati “Ahubwo nkanasaba ko haba gukurikirana aba baforomo, bagakurikira integanyanyigisho neza ku buryo badatsindwa ari benshi ariko ku bwanjye numva gutsindwa kwabo ntabishyira ku rugaga kuko babahawe impamyabumemyi badashoboye kandi dushaka gukora twigereranya ku rwego mpuzamahanga, numva bitaba aribyo.”

Nyuma yo kujya impaka kuri iki kibazo, abadepite bemeje raporo ya komisiyo ariko bongeraho ko biro yayo yasuzumye icyo kibazo n’iy’Umutwe w’abadepite zizafatanya zikayitegura neza.

Abadepite banenze ubushobozi bw'abakora ibi bizamini, bashimangira ko nta karengane bagiriwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza