Abagabo bibukijwe ko nabo barebwa na serivisi zo kuboneza urubyaro

Yanditswe na Akayezu Jean de Dieu
Kuya 14 Gicurasi 2019 saa 03:10
Yasuwe :
0 0

Ubwiyongere bukabije bw’abaturage ni kimwe mu bibazo bihangayikishije Isi ndetse umunsi ku wundi hafatwa ingamba zo guhangana nacyo harimo nko gushishikariza abaturage kwitabira serivisi zo kuboneza urubyaro, kurwanya inda ziterwa abangavu n’ibindi.

Imibare iheruka y’Ikigo cy’Igihugu cy’Ibarurishamibare, NISR, igaragaza ko u Rwanda rutuwe n’abaturage basaga miliyoni 12.

Leta y’u Rwanda ibinyujije muri Minisiteri y’Ubuzima, Imbuto Foundation n’abandi bafatanyabikorwa bateguye ubukanguramba bwiswe ‘Baho Neza’ buzamara imyaka itatu hagamijwe guhangana n’ibibazo byugarije umuryango nyarwanda birimo ubwiyongere bw’abaturage.

Muri ubu bukangurambaga Abanyarwanda bashishikarizwa kwitabira serivisi zo kuboneza urubyaro bakanazegerezwa, bagashishikarizwa kurwanya inda ziterwa abangavu, imirire mibi, kwibutsa ababyeyi uruhare rwabo mu burere bw’abana babo n’ibindi.

Kuri uyu wa 13 Gicurasi 2019, ubu bukangurambaga bwakomereje mu Murenge wa Gataraga mu Karere ka Musanze ahahurijwe hamwe ibihumbi by’abaturage baturutse muri uyu Murenge n’iyo bihana imbibi.

Imibare itangazwa n’Akarere ka Musanze igaragaza ko abagera kuri 52% aribo bamaze kuboneza urubyaro mu gihe muri uyu Murenge wa Gataraga abamaze kwitabira izi serivisi ari 38%.

Umuyobozi w’Akarere ka Musanze wungirije ushinzwe imibereho myiza y’abaturage, Uwamariya Marie Claire, yavuze bimwe mu bivogera umutekano w’umuryango ari imibereho mibi kandi akenshi iyo mibereho iterwa no kubyara abo badashoboye kurera.

Yagize ati “Mu mibereho myiza y’umuryango ni uko ugomba kubaho utekanye ufite umutekano usanzwe n’uwo mu muryango. Bimwe mu bihungabanya umutekano wo mu muryango harimo kubyara abana benshi bityo ubwisanzure bukabura n’umutekano ukaba wabura.”

Mu bukangurambaga bukomatanyije bwa Baho Neza, abayobozi muri Minisiteri y’Ubuzima, Imbuto Foundation n’inzego zitandukanye batanga ubutumwa bukangurira abaturage kwitabira serivisi zo kuboneza urubyaro, kurwanya inda ziterwa abangavu, kugana serivisi zitangwa n’abajyanama b’ubuzima n’ibindi.

Abitabiriye ubu bukangurambaga bahabwa serivisi zo kuboneza urubyaro ku buntu, hatangwa ubutumwa bwifashisha imikino itandukanye, imivugo n’imbyino byose bigaruka ku cyafasha Abanyarwanda kugira umuryango mwiza, utekanye ndetse ubayeho neza.

Ku munsi w’ubukangurambaga bwa Baho Neza mu Murenge wa Gataraga abagera kuri 70 bahawe serivisi zo kuboneza urubyaro barimo abagera kuri 27 bafashe uburyo bw’amezi atatu, ubw’imyaka itatu ni 18, naho ubw’imyaka itanu ni batanu mu gihe abagera kuri 20 bahawe udukingirizo.

Umukozi wa Imbuto Foundation mu ishami rishinzwe ubuzima, Isabelle Kalisa yavuze ko intego y’ubu bukangurambaga ari uguhindura imyumvire ku byatuma bagira umuryango mwiza.

Yagize ati “Abanyarwanda turacyumva ko kuboneza urubyaro ari inshinge, ibinini kandi bitangirira ku kumva, urabona iyo wumva uko uteganyiriza umuryango wawe ahazaza bisaba kumva ko ugomba kuboneza urubyaro.”

“Aha hantu wumvise ubucucike buhari, ubutaka ntibwiyongera kandi umubare w’abaturage uriyongera urumva ni ikibazo gikomeye ariko bisaba kwigisha kugira babanze bumva akamaro ko kuboneza urubyaro ari nayo ntego y’ubu bukangurambaga.”

Abagabo baracyumva kuboneza urubyaro ari iby’abagore

Muri rusange abamaze kuboneza urubyaro mu Rwanda bangana na 52% muri bo abagera kuri 48% bakoresha uburyo bugezweho burimo inshinge n’ibinini.

Ku rundi ruhande ariko mu gihugu hose habarurwa abagabo bagera kuri 3500 gusa bamaze kwitabira serivisi zo kuboneza urubyaro.

Isabelle Kalisa yavuze ko n’abagabo bashishikarizwa kwitabira serivisi zo kuboneza urubyaro bakamenya ko inshingano z’umuryango ari iz’umugabo n’umugore.

Uwamahoro Emelyne witabiriye serivisi zo kuboneza urubyaro, yavuze ko yabikoze nyuma yo kujya inama n’umugabo we. Kuri ubu bafite abana babiri umwe ufite imyaka 14 undi icyenda.

Yagize ati “Icyatumye njya kuboneza urubyaro nabivuganyeho n’umugabo wanjye mubwira ko nta butaka dufite, naragiye mfata urushinge rw’imyaka itanu kandi nta kibazo byigeze bintera.”

Ubu bukangurambaga bukomatanyije bwa ‘Baho Neza’ buzamara imyaka itatu aho buzajya bumara amezi atatu nyuma hashira andi mezi atandatu bukongera bugatangira bukamara andi mezi atatu.

Abanyempano batsinze mu irushanwa rya ArtRwanda-Ubuhanzi nibo bifashishwa mu gutanga ubutumwa babinyujije mu ndirimbo
Abaturage baba bakurikiye ubutumwa butangwa mu bukangurambaga bwa Baho Neza
Abayobozi batandukanye bitabiriye ubukangurambaga bwa Baho Neza mu Karere ka Musanze
Hifashishwa imikino irimo ubutumwa bukangurira ababyeyi kuboneza urubyaro no kwita ku bana babo
Mu bukangurambaga bwa Baho Neza, serivisi zitangwa n'ibitaro ziba zegerejwe abaturage
Mu bukangurambaga bwa 'Baho Neza', abana bahabwa amata mu rwego rwo kurwanya imirire mibi n'igwingira
Umukozi wa Imbuto Foundation mu ishami rishinzwe Ubuzima, Isabelle Kalisa, yavuze ko kwigisha abaturage akamaro ko kuboneza urubyaro aribyo bizatuma babyitabira
Umunyamabanga Nshingwabikorwa w'Umurenge wa Gataraga, Sebashotsi Jean Paul yavuze ko abaturage baboneza urubyaro bakiri bake
Uwamahoro Emelyne yavuze ko yatanze ubuhamya bw’uburyo ubuzima bwahindutse nyuma yo kuboneza urubyaro
Visi Meya w'Akarere ka Musanze, Uwamariya Marie Claire, yasabye ubufatanye hagati y'abagabo n'abagore kugira ngo u Rwanda rugire umuryango utekanye

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza