Abakobwa barenga 400 barihiwe na FAWE Rwanda basabwe kuba umusemburo w’iterambere

Yanditswe na Evariste Nsengimana
Kuya 12 Kanama 2018 saa 03:19
Yasuwe :
0 0

Abanyeshuri b’abakobwa 486 barihiwe na FAWE Rwanda ku bufatanye na MasterCard Foundation bigaga ku bigo bitandukanye mu gihugu, basoje amahugurwa bungukiyemo ubumenyi buzabafasha kuba intangarugero mu gukora ibyo umuryango nyarwanda ubakeneyeho n’ibiganisha ku iterambere.

Ubwo yasozaga amahugurwa y’ibyumweru bitandatu yahabwaga abanyeshuri barihiwe na FAWE barangije amashuri yisumbuye uyu mwaka, kuri uyu wa Gatandatu, Umuyobozi Nshingwabikorwa wa FAWE muri Afurika, Hendrina Chalwe Doroba, yabashimiye ubwitange n’ubushake bagaragaje bakurikirana ayo masomo, abasaba kuba umusemburo w’iterambere.

Ati “Dutewe ishema no kuba murangije aya ahugurwa, dutegereje kureba uko ubumenyi mukuyemo mubukoresha mu gutanga umusanzu wanyu ku bo muturanye n’aho mutuye. Twizeye neza ko muzafasha abakobwa bagenzi banyu n’abahungu mu gutangiza imishinga igirira akamaro abaturanyi banyu.”

Umuyobozi Ushinzwe amasomo y’ubumenyi ngiro mu Nama nkuru y’amashuri makuru na Kaminuza mu Rwanda, Dr. Marie Christine Gasinzigwa, yababwiye aba bahuguwe ko bahanzwe amaso mu bikorwa by’iterambere.

Ati “Uwahawe byinshi nawe agomba kugira byinshi atanga. Mugomba gusubiza amaso inyuma aho mwakuwe na Mastercard Foundation. Ntimukwiriye gutamaza uwabagiriye icyizere kandi icyizere cya mbere ni ukucyigirira [...] mwahawe byinshi niyo mpamvu tubasaba gutanga umusanzu, ibyo mukorewe mukabikorera abandi.”

Amwe mu masomo bahawe avuga ku buringanire yabafashije kwigarurira icyizere bumva ko hari byinshi bashoboye bishobora kugirira igihugu akamaro, avuga ku buzima bw’imyororokere, ku kwihangira imirimo, kuvugira mu ruhame n’ibindi bibafasha kuzavamo abantu babereye igihugu.

Mukangamije Pelagie wo mu Karere ka Karongi yavuze ko ubumenyi bakuye mu mahugurwa basoje y’ibyumweru bitandatu, ari ingirakamaro.

Ati “Nk’uko duhora tubishishikarizwa, ni uko twongera kugira icyo tumarira abandi kuko bose ntibagize amahirwe yo kuza aha. Niyo mpamvu tugomba kujya hariya dutuye, harimo n’abatarigeze biga, tukagerageza kubabwira ibyo dukuye aha kugira ngo tubashe gufashanya dutange umusanzu wacu mu iterambere.”

Irakoze Eliane utuye mu Karere ka Bugesera we yabwiye IGIHE ko yashimishijwe n’amasomo bahawe.

Ati “Baduhaye buri kimwe cyose dukeneye. Ni ibintu twari dukeneye kandi nk’uko badusaba natwe kuzagira ibyo dukorera abandi, turabizeza kubikora kuko babidutoje.”

FAWE ifatanyije n’Umuryango MasterCard, imaze gufasha abana barenga ibihumbi 35 muri Afurika kwiga amasomo n’izindi ndangagaciro bigamije kubatoza kuzavamo abayobozi beza b’ahazaza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza