Abakorera mu gakiriro ka Gisozi mu bibazo nyuma yo kwangirwa gusana aho bakorera

Yanditswe na Thamimu Hakizimana
Kuya 9 Kanama 2018 saa 04:50
Yasuwe :
0 0

Abacuruza imbaho n’abazibariza mu gakiriro ka Gisozi mu Karere ka Gasabo, bavuga ko bakomeje guhura n’ibibazo birimo; ubujura, gukorera ahatujuje ubuziranenge, kutagira ubwiherero buhagije n’ibindi baterwa n’uko nta burenganzira barabona bwo gusana aho bakorera.

Aba bibumbiye muri Koperative ya Adarwa bagera ku 175, bavuga ko babujijwe gusana aho bakorera kandi ubuyobozi ari bwo bwahabimuriye mu myaka 16 ishize bubabwira ko ari ahantu heza bashobora kwagurira ibikorwa byabo.

Bamwe mu baganiriye na IGIHE, bavuga ko inzu bakoreramo zishaje cyane, kuko kuva bakwimukira muri uyu Murenge wa Gisozi batari bazivugurura, bikaba bibateye impungenge z’uko isaha iyo ari yo yose zishobora kubagwa hejuru bitewe n’amazi aturuka mu ngo z’abaturage no mu miturirwa y’andi mashyirahamwe aba muri ako gace.

Umucuruzi w’imbaho witwa Ndahimana Jotham, wahuye n’ibiza by’inkongi yamuhombeje agera kuri miliyoni eshanu kuri uyu wa Gatatu tariki ya 8 Kanama 2018, yemeza ko abakorera muri aka gakiriro ka Gisozi, bugarijwe n’uruhuri rw’ibibazo.

Yagize ati “Gukorera ahantu hatazitiye bituma bariya ba-marine bo mu gishanga bahora batwiba, ikindi kuko twaje aha hataraza inyubako nyinshi nta mazi yaduteraga nta ruhurura zahabaga. Nyuma y’uko haje iterambere amazi akayoborerwa aha, bituma ahora adutera akajya mu mbaho, hari n’abajya gutaha bakubika imashini zabo kugira ngo atajyamo.”

Umuyobozi wungirije w’iyi koperative ya Adarwa, Thadée Twagirayezu, avuga ko bamaze kwandikira inzego zibishinze kugira ngo zibahe icyemezo cyo gusana aho bakorera.

Yagize ati “Nibyo ibyo bibazo turabizi kuko twageze aha mu 2002, kandi uko twubatse muri icyo gihe ntibyari mu buryo burambye, rero ibyo twubatse bikeneye kuvugurura kuko imihanda twaciyemo yarangiritse nta modoka zikihinjira, tunugarijwe n’ubujura kubera ko nta buryo hacungirwa umutekano neza.”

Yakomeje avuga ko bamaze kwandikira ubuyobozi bw’umurenge n’ubw’umujyi wa Kigali babusaba icyangombwa cyo kuvugurura aho bakorera, kugira ngo babashe kwiteza imbere birushijeho.

Umunyamabanga Nshingwabikorwa w’Umurenge wa Gisozi, Niragira Théophile, nawe avuga ko iki kibazo acyizi ndetse akanemeza ko aba bacuruzi bamaze kubwirwa ko aho bakorera hagenewe ibikorwa by’igishanga.

Yagize ati “Nibyo koko basabye gusana ariko mbere bashatse kubikora mu ibanga turabibabuza nk’uko tubibuza n’abandi bose, twabasabye kwandikira akarere nako kabyoherereza Umujyi”.

Akomeza avuga ko aherutse kumenya ko umujyi wabasubije ko aho bakorera hagenewe ibikorwa byo mu gishanga, bakaba batemerewe gusana kandi n’abandi batuye mu bishanga barimo kuhimurwa kuko ari ibya Leta.

Yakomeje avuga ko uyu murenge wa Gisozi uri kuganira n’inzego z’Akarere ka Gasabo n’iz’Umujyi, kugira ngo barebe uko bafasha aba bacuruzi ariko mu buryo butica amategeko ndetse butanabangamira ibikorwa byabo.

Twagerageje guhamagara ubuyobozi bw’Umujyi wa Kigali kuri telefone kugira ngo butubwire icyo buteganyiriza aba bacuruzi ariko ntibwabasha kuboneka.

Gusa iyi Koperative ya Adarwa ikaba imaze kugera ku bikorwa byinshi cyane cyane ko yamaze no kubaka inzu y’igorofa yatwaye miliyari ebyiri na miliyoni 800 z’amafaranga y’u Rwanda.

Aho abacuruza imbaho bakorera
Aho bakorera hajemo ruhurura nyinshi zibangamiye imikorere yabo
Aho bakorera hari umwanda kuko babujijwe kuhasana
Ahazwi nko mu gakiriro ka Gisozi ho mu Karere ka Gasabo
Bamwe bakorera hejuru ya za ruhurura
Inzu y'icyitegererezo bubatsemo bifuza ko buri mucuruzi yayubaka ariko baza kubibuzwa
Ruhurura zayoberejwe mu gakiriro ka Gisozi
Umucuruzi w’imbaho witwa Ndahimana Jonathan, wahuye n’ibiza by’inkongi yamuhombeje agera kuri miliyoni eshanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza