Abanyamahanga bitabiriye Expo 2018 bashimye uko yateguwe, bamwe bifuza kuguma mu Rwanda

Yanditswe na Mugabo Jean d’Amour
Kuya 7 Kanama 2018 saa 07:06
Yasuwe :
0 0

Abahagarariye ibigo by’abanyamahanga byitabiriye Imurikagurisha Mpuzamahanga rya 21 (Expo 2018) banyuzwe n’imitegurire yaryo n’umutekano uhari ku buryo bakora batikanga ikibi, haba ku manywa cyangwa nijoro.

Imibare y’Ikigo cy’Igihugu cy’Iterambere (RDB) igaragaza ko ibigo 40 byari bimaze kwiyandikishiriza ku biro byacyo muri expo mu cyumweru cya mbere cyayo, harimo bitanu by’abanyamahanga, mu gihe mu myaka yashize batangiraga kwiyandikisha mu cyumweru cya nyuma.

Ronald Athanase Rutagengwa, umukozi wa Fubisun Company yo muri Malaysia, yabwiye IGIHE ko amaze kwitabira imurikagurisha mu bihugu byinshi byo ku isi harimo ibihugu byose muri Afurika y’Iburasirazuba, ariko asanga u Rwanda ruri ku isonga mu karere mu gutegura neza expo kandi hakaba umutekano w’abamurika n’ibyabo.

Yongeyeho ko ashyira u Rwanda ku mwanya wa kabiri inyuma ya Kenya mu kugira expo zinjiza agatubutse.

Yagize ati “Ku mitegurire u Rwanda ruri ku mwanya wa mbere muri aka karere. Ibyangombwa byose dukenera babiduha ku gihe, umutekano ucunzwe neza, turishyira tukizana haba ku manywa na nijoro nta kiduteye ubwoba.”

Fubisun Malaysia icuruza ibikoresho byo mu rugo bigezweho birimo utumashini dukora umutobe mu mbuto, imikoropesho, ipasi, ibyuma bifura imyenda, ibigorora imitsi (massage) n’ibindi byinshi.

Rutagengwa yavuze ko nubwo abaguzi bari bake mu minsi ibanza bagenda biyongera ku buryo afite icyizere ko azagurisha cyane mu minsi ya nyuma y’ imurikagurisha nk’uko byakunze kugenda mu myaka yashize.

Robert Dossou, Umuyobozi Mukuru wa Centre de Pharmacopée Bénin Tisane witabiriye imurikagurisha mu Rwanda ku nshuro ya mbere, yavuze ko yakunze imitegurire yaryo ndetse ko arimo gutekereza kuzashinga ishami rihoraho mu Rwanda.

Uyu mugabo akomoka muri Bénin ariko ikigo cye gitanga ubuvuzi gakondo mu bihugu byinshi birimo Cameroun, Burkina Faso, Mali, Senegal, Guinea Equatorial, Gabon, Chad, Congo Brazzaville na RDC.

Yagize ati “Nazanye mu Rwanda imiti ikomoka ku bimera ikorwa n’abahanga mu buvuzi gakondo bagera kuri 42 bahuriza hamwe ubumenyi bagakora imiti ivura n’ikumira indwara zitandukanye.”

“Tuvura indwara z’imitsi no kuvura kw’amaraso, kugabanya ibinure mu mubiri n’umwijima, kuyungurura amaraso, ibiheri ku ruhu, kubyimba k’ubugabo n’ibindi. Mfite ubunararibonye muri ubu buvuzi kuko nabutangiye mu 1983.”

Bénin ni kimwe mu bihugu umunani byitabiriye expo mu Rwanda ku nshuro ya mbere.

Dossou yavuze ko expo igitangira abaguzi bari bake ariko ubu yakira benshi buri munsi, akaba agamije kugeza ubuvuzi bwe muri Afurika yose no kwereka abantu ko ubuvuzi gakondo ari ingirakamaro kandi ntaho buhuriye n’ubupfumu, uburozi cyangwa amayobera nk’uko bamwe babitekereza.

Evas uhagarariye Yvonne Exclusive Design, ikigo cy’imideli cyo muri Ghana yavuze ko ku nshuro ye ya mbere yitabiriye expo i Kigali yahasanze umwuka mwiza ariko ko kugurisha bikiri ikibazo kuri we kuko abantu bavuga ko imideli ye ihenze ariko we akemeza ko idahenze akurikije ubwiza bwayo yemeza ko bwihariye.

“Njye ndi umunyamideli, dukora imideli y’abagore n’abagabo. Nashimye cyane umutekano no gukorera ku gihe nasanze hano ariko abaguzi baracyari bake. Abantu bibwira ko iyi myenda ihenze ariko nk’umunyamideli, nita cyane ku gukoresha ibikoresho byiza aho gutanga ibiciriritse bibi. Iyi ni inshuro ya mbere njye nje muri iyi expo ariko mama wanjye yitabiriye inshuro eshatu mu myaka yashize.”

Evas yongeyeho ko nabona abaguzi biyongera azahita afungura iduka muri Kigali kuko n’ubundi bahoze barifite muri Kigali City Tower ariko bakarifunga nyuma yo kubona abaguzi ari bakeya.

Yongeyeho ko muri expo agabanya ibiciro aho buri mwenda ubusanzwe ugura hagati y’ibihumbi 25 na 90 Frw.

Yagize ati “Iyi expo ningendekera neza, nzafungura ishami muri Kigali ariko nintabona abakiliya urumva nawe ko ngomba gusubira iwacu. Dusanzwe dufite amaduka muri Ghana, Sierra Leone na Liberia. Twikorera imyenda duhereye ku bitambaro byiza, ubundi tukagurishiriza kuri internet ariko ubu muri expo tuba dushaka kunguka abakiliya bashya tukagura isoko.”

Umwanditsi Mukuru muri RDB, Kayibanda Richard, yavuze ko kugeza ku wa Kane w’icyumweru gishize bari bamaze kwandika ibigo bitanu by’abanyamahanga bitabiriye Expo 2018 bishaka gufungura amashami mu Rwanda.

Muri rusange RDB yari imaze kwandika ibigo 40 ku ishami ryayo rikorera muri expo ikomeje kubera i Gikondo kuva ku wa 26 Nyakanga ikazarangira ku wa 15 Kanama 2018.

Expo 2018 yitabiriwe n’ibigo 500 bituruka mu bihugu 23 byo ku migabane yose y’isi harimo 300 byo mu Rwanda na 200 byavuye mu mahanga.

Abakozi ba RDB bakorera muri Expo 2018 bamaze kwandika ibigo 40 birimo bitanu by’abanyamahanga
Evas ni umunyamideli ukomoka muri Ghana akaba amurika muri Expo 2018 imideli y'ikigo cya mama we cyitwa Yvonne Exclusive Design
Evas yemeza ko afite imideli myiza cyane ku buryo abantu badakwiye gukangwa n'igiciro iriho ahubwo bakwita ku bwiza bw'imyambaro abaha
Robert Dossou (iburyo) asobanurira abakiliya imiti gakondo yazanye kumurika ku nshuro ya mbere mu Rwanda
Rutagengwa, ukorera Fubisun Company yo muri Malaysia, asanga u Rwanda ruri ku isonga mu gutegura neza imurikagurisha muri Afurika y'Iburasirazuba
Yvonne Exclusive Design, ikigo cy'imideli gikomoka muri Ghana cyitabiriye Expo 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza