Abanyarwanda baba mu Busuwisi n’abitegura kuba ba ofisiye bato muri Polisi bishyuriye mituweri abatishoboye 1200

Yanditswe na Hakizimana Jean Paul
Kuya 6 Kanama 2018 saa 07:48
Yasuwe :
0 0

Abanyarwanda baba mu gihugu cy’u Busuwisi bishyuriye mituweri abaturage batishoboye 1000 bo mu murenge wa Gishari mu Karere ka Rwamagana, naho abanyeshuri bitegura kuba ba ofisiye bato muri Polisi y’u Rwanda bari mu ishuri rya polisi i Gishari bishyurira abaturage 250 bakomoka mu miryango 60.

Iki gikorwa cyabaye ku wa Gatandatu tariki 05 Kanama 2018 cyahuriranye no gutaha ku mugaragaro inzu y’ubakiwe Muhundaza Clotilde warokotse Jenoside yakorewe Abatutsi muri Mata 1994 wabaga mu nzu yishyurirwaga n’ubuyobozi bw’umurenge.

Iyi nzu igizwe n’ibyumba 3 n’uruganiriro y’ubatswe n’abakozi ba sosiyete ya Dong il isanzwe yubaka inyubako zitandukanye mu ishuri rya Polisi rya Gishari.

Visi Perezida w’Ihuriro ry’Abanyarwanda baba mu Busuwisi, Dr. Bucagu Maurice yavuze ko iki gikorwa bagitekereje mu rwego rwo gushyigikira abaturage bari mu Rwanda.

Ati "Nk’Abanyarwanda nubwo tuba mu mahanga, ntabwo twirengagiza Abanyarwanda bene wacu bari mu Rwanda tugomba gufatanya kugira ngo turusheho kubaka igihugu cyacu. Ni muri urwo rwego natwe twishyize hamwe kugira ngo dutange umusanzu wacu mu guteza imbere igihugu cyacu dutangira mitiweri kuri bamwe."

Umuyobozi w’Ishuri rya Polisi rya Gishari CP Nshimiyimana Vianney yagarutse Ku bufatanye burangwa hagati y’abaturage na polisi, anashimangira ko Polisi y‘u Rwanda ishyira imbaraga mu mutekano wa muntu kuko utatekana ubayeho nabi.

Yagize ati “Umutekano ukwiye kugendana n’imibereho myiza y’abaturage, ntiwavugako umutekano ari mwiza mu gihe hari abaturage badafite aho baba, ibyo kurya, amashuri adahagije cyangwa hari abo ibikorwa by’ubuvuzi bitageraho.”

Mahundaza Clotilda w’imyaka 75 y’amavuko washyikirijwe inzu yubakiwe, yabwiye IGIHE ko afite ibyishimo yatewe no kuba Polisi imwubakiye inzu.

Ati "Ndishimye cyane pe, nabaga mu nzu ya kera yo mu 1973 ejo bundi iba iraguye umurenge unkodeshereza iyo kubamo. Polisi iba iraje indwanaho iranyubakira, ndabashimira cyane kuko bayubatse mu gihe gito."

Dative Mukarutesi, umupfakazi w’abana 5 umwe mu bahawe ubwishingizi bwo kwivuza yavuze ko we nabagenzi be bashimira aba banyeshuri kubwo kuba baramutekerejeho we na bagenzi be bakabishyurira ubwisungane mu kwivuza.

Yagize ati “Ndashima imiyoborere myiza iranga igihugu cyacu, bigatuma abato bakurana umuco wo gufasha abatishoboye bityo buri wese iterambere rikamugeraho.’’

Mukamutesi asoza avuga ko ubwishingizi bahawe buzabafasha kutarembera mu rugo, ngo go azahazwe n’indwara kuko asabwa gusa kugera ku kigo nderabuzima igihe yumvuse mu mubiri atameze neza.’

Guverineri w’Intara y’i Burasirazuba Mufulukye Fred yashimiye cyane abanyarwanda baba mu Busuwisi ndetse na Polisi Ku bikorwa bakoze byo gufasha abaturage, asaba abaturage kugira umutima wo gufashanya hagati yabo

Yakomeje agira ati "Aba banyarwanda baba hanze si uko bafite byinshi na Polisi kubafasha, si uko bafite byinshi ahubwo ni uko bafite umutima wo gufasha, namwe niwo mbifurije ko niba umuturanyi wawe aba ahantu hadasa neza mufashe kuhagira heza umuhe umuganda muhubake, muhakurungire muhagire heza, uzaba ukoze neza."

Si ubwambere ibikorwa byo guharanira iterambere n’imibereho myiza y’abaturage bikozwe muri iri shuri rya Polisi, kuko mu byiciro byose by’abanyeshuri batorezwa mu ishuri rya Gishari buri mwaka bagira igikorwa cyo gufasha abatishoboye bakorera abaturage baturanye n’iri shuri.

Urugero n’aho umwaka ushize abanyeshuri biteguraga kuba ba ofisiye bato muri Polisi y’u Rwanda ku bufatanye n’ubuyobozi bw’ishuri rikuru ry’igisha imyuga n’ubumenyi ngiro rya Gishari (IPRC Gishari) bwatanze amashanyarazi akomoka ku mirasire y’izuba kumiryango 166 yo mu mudugudu w’Agatare, akagari ka Gati mu Murenge wa Gishari.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza