Abanyarwanda barenga ibihumbi 300 biganjemo abo mu byaro bagiye guhabwa amazi

Yanditswe na Evariste Nsengimana
Kuya 10 Kanama 2018 saa 04:16
Yasuwe :
0 0

Minisiteri y’Ibikorwa Remezo (Mininfra), yatangaje ko muri uyu mwaka w’ingengo y’imari 2018/2019, abaturage barenga ibihumbi 300 biganjemo abo mu bice by’icyaro batari bafite amazi meza bazayagezwaho, bakaba bakubye inshuro eshatu abayagejejweho mu mwaka ushize.

Mu muhango wo gusinya imihigo y’umwaka wa 2018/19, hagati ya Mininfra n’ibigo biyishamikiyeho kuri uyu wa Gatanu, iyi Minisiteri yatangaje ko abaturage ibihumbi 330 batuye mu bice by’icyaro bazahabwa amazi meza muri uyu mwaka.

Raporo ya Mininfra y’ibyagezweho mu 2017/2018, igaragaza ko abanyarwanda bagejejweho amazi meza ari ibihumbi 133 965, inganda ziyatunganya zari zifite ubushobozi bwo gutanga metero kibe 237,120 ku munsi zivuye kuri 183,120 mu mwaka wawubanjirije.

Ubwo bushobozi bwiyongereye bitewe n’inganda zavuguruwe zirimo nk’urwa Nzove rwongerewe ubushobozi bwo gutanga metero kibe ibihumbi 55.

Umunyamabanga uhoraho muri Mininfra, Christian Rwakunda, yavuze ko muri uyu mwaka, abaturage bahawe amazi bazikuba inshuro eshatu.

Ati “Tuzakuba gatatu abantu bazagira amazi bashyashya, tugere kuri 335, 306 ariko tuzanongeza n’ayo dukora angana na metero kibe ibihumbi bitatu ku munsi.”

Izo metero kibe ziziyongeraho, zizatangwa n’uruganda rutunganya amazi rwa Kanyonyomba.

Mininfra ivuga ko uretse abo ibihumbi 330 batuye mu bice by’icyaro bazahabwa amazi meza, hari n’abandi 20 157 batuye mu mijyi bazayahabwa. Ingano y’amazi inganda zo mu gihugu zishobora gutanga ku munsi izagera kuri Metero kibe 242 120.

Uko kongera umubare w’abaturage bahabwa amazi meza, bizagerwaho bitewe n’amasezerano u Rwanda ruheruka kugirana na Banki Nyafurika Itsura Amajyambere (AfDB) ya miliyoni zirenga 250$ azashorwa mu bikorwa byo gukwirakwiza amazi, isuku n’isukura.

Minisitiri w’ibikorwa remezo, Amb Claver Gatete, yavuze ko mu gukwirakwiza amazi mu baturage, imbogamizi za mbere ziba zishingiye ku miturire, kugira ngo abagereho mu buryo bworoshye.

Ati “Iyo imiturire ibaye myiza, biratworohera bikanahenduka kugira ngo tugeze amazi ku baturage ariko ni ugukora ibishoboka, dukurikije amikoro yacu.”

Amb Gatete yanavuze ko uretse ingamba leta yashyizeho zigamije kunoza imitangire y’amazi meza zirimo nko gushyiraho ikigo kibishinzwe WASAC n’abakiyobora, gushaka inkunga zitera imishinga yo kuyakwirakwiza, gukurikirana imitangire yayo mu buryo burambye no kuzongerera ubushobozi.

Yunzemo ati “No mu byaro, dufite amasoko agiye atandukanye. Ubu turimo turareba ni ayahe manini ashobora kuba yakwagurwa.”

Ubwo Minisitiri w’Intebe, Dr. Edouard Ngirente, yagezaga ku bagize Inteko Ishinga Amategeko gahunda ya Guverinoma y’imyaka irindwi (2017-2024), yavuze ko manda ya gatatu ya Perezida Kagame izasiga abanyarwanda bose bagerwaho n’amazi meza.

Yagize ati “Abanyarwanda bose bazagezwaho amazi meza bavuye kuri 85%, ibi bizagerwaho hubakwa kandi hanasanwa imiyoboro y’amazi yo mu mujyi wa Kigali, indi mijyi no mu cyaro, hazongerwa ingano y’amazi atunganywa ku munsi akazava kuri metero kibe 182 120 akagera kuri metero kibe 303 120.”

Mu 2010 abanyarwanda 74.2% nibo bari bafite amazi meza, bariyongera bagera 84.8% mu 2015 naho mu 2017 barenganga gato kuri 85%.

Minisitiri w'ibikorwa remezo Gatete Claver yavuze ko hazakoreshwa amikoro ahari amazi meza akagezwa ku baturage
Minisiteri y'ibikorwa remezo n'ibigo biyishamikiyeho basinyanye imihigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza