Abasaga 320 bahawe impamyabumenyi na UNILAK bahishurirwa ibanga ryo kuzibyaza umusaruro (Amafoto)

Yanditswe na Evariste Nsengimana
Kuya 11 Nyakanga 2019 saa 10:21
Yasuwe :
0 0

Kaminuza y’Abalayiki b’Abadiventisiti (UNILAK) yahaye impamyabumenyi abanyeshuri 322 barimo 64 basoje icyiciro cya gatatu (Masters) na 258 basoje icyiciro cya kabiri cya kaminuza, ibahishurira ibanga rizabafasha kuzibyaza umusaruro bakiteza imbere ubwabo n’igihugu muri rusange.

Izi mpamyabumenyi UNILAK yatanze ku nshuro ya 13 mu mashami arimo ayo kubungabunga ibidukikije, ubukungu n’icungamutungo, amategeko n’ikoranabuhanga, yazibashyikirije kuri uyu wa 11 Nyakanga mu birori byabereye ku cyicaro cyayo mu Mujyi wa Kigali.

Umuyobozi Mukuru Wungirije wa UNILAK, Dr Ngamije Jean yababwiye ko ibyangombwa nkenerwa kugira ngo bazabe ingirakamaro banagere ku ndoto zabo babihawe, imiryango yabo ikaba ibatezeho impinduka, aho batuye n’aho muzakorera’.

Yavuze ko nta gushidikanya, kugira ngo bashobore kusa ikivi batangiye bagomba gukoresha ubwenge n’ubumenyi bahawe bagashyira mu bikorwa ibyo bize, kugira ngo biteze imbere ubwabo, imiryango yabo n’igihugu.

Ati "Ubumenyi mukuye hano, buzabafasha kwikemurira ibibazo by’ubuzima harimo no kwifashisha amahirwe igihugu cyatanze kugira ngo mushobore guhanga imirimo no gutanga akazi. Ni ahanyu ngo mwubakire kuri uwo musingi ukomeye Leta y’ubumwe yubatse, mukora byinshi vuba kandi neza ku bw’ahazaza heza h’igihugu cyacu.”

Dr Ngamije yababwiye ko kugira ngo babigereho bagomba gukunda umurimo no kunoza ibyo bakora, ariko bakazirikana ku ndangagaciro z’umunyarwanda nk’uko babitojwe.

Umuyobozi wungirije w’inama y’ubuyobozi ya UNILAK, Murekatete Alphonsine, yashimiye uruhare iyi Kaminuza igira mu gutanga uburezi bufite ireme kandi bushingiye ku ndangagaciro za gikirisitu.

Yavuze ko muri gahunda ya guverimoma y’imyaka irindwi yiyemeje kwihutisha iterambere n’imibereho myiza by’abaturage, asaba abahawe impamyabumenyi n’abazihawe cyera gufatanya kugira ngo bigerweho.

Ati "Mugomba kureba uburyo bwo guhanga imirimo mishya ibyara inyungu mugamije kuzamura ubukungu no kurandura ubukene."

Umuyobozi mukuru wa UNILAK, Prof Dr Butera Alexis, yashimye umwete n’umurava abahawe impamyabumenyi bagaragaje mu myaka bamaze biga.

Ati “Mufite ibibazo imbere yanyu bitoroshye ariko byakemuka, muharanire guhindura Isi nziza kurusha uko mwayisanze. Dushaka ko mukorana umwete kugira ngo ahazaza h’igihugu cyacu hazarusheho kuba heza.”

Yavuze ko uyu munsi bahereweho impamyabumenyi usobanuye byinshi ariko hari izindi mpamyabumenyi z’agaciro bakwiye guharanira kubona nko guharanira gukorera hamwe, kwigira, kugira icyerekezo, kudacika intege, kwihangana n’ibindi, kUgira ngo bazabashe kugera ku ntego zabo.

Ati “Uyu munsi mubonye impamyabumenyi ariko muhawe ikaze mu Isi y’ubuzima bwo guhora wiga. Utabikoze ntabwo waba uri mu bazabasha guhindura abantu ku Isi. Hari ibibazo by’ubukene n’iby’ubuzima. Ni mwebwe bo kudufasha guhangana nbyo.”

Abahawe impamyabumenyi bashimiye abagize uruhare mu nzira ndende banyuzemo kugira ngo bazihabwe nk’uko byasobanuwe Rugaju Editha, wasoje icyiciro cya gatatu mu bijyanye n’amategeko (International criminal law).

Ati “Uyu munsi twahaweho impamyabumenyi ni intambwe ikomeye duteye mu bizimana bwacu, igaragaza intangiriro nshya y’urugendo rw’ubuzima bwacu. Mureke dukoreshe ubumenyi twahawe mu gukemura ibibazo byugarije umuryango wacu.”

Nduwayo Jean de Dieu urangije icyiciro cya gatatu mu mategeko ahana ibyaha mpuzamahanga, yagize ati “Ibyo umuntu yakwiga byose yakwihangira umurimo, akifasha ariko by’umwihariko ugabanyije n’umutwaro ku gihugu.”

Kaminuza ya UNILAK yashinzwe mu 1997 n’ababyeyi b’Abalayiki b’Abadiventisti. Ifite amashami i Kigali, i Nyanza na Rwamagana. imaze gushyira ku isoko abagera ku bihumbi 10 ariko abari kwiga basaga ibihumbi bitanu.

Abarangije amasomo bari mu mashami atandukanye
Abahawe impamyabumenyi babanje gukora umukimbagiro
Bari ku mirongo bitewe n'icyo umuntu arangije kwiga
Rtd Gen Sam Kaka yitabiriye ibi birori, nyuma y'uko muri Mutarama 2018 iyi kaminuza yamuhaye impamyabumenyi mu bijyanye n'amategeko mpuzamahanga
Abayobozi, ababyeyi n'inshuti z'abarangije amasomo bitabiriye ibi birori
Umuyobozi Mukuru Wungirije wa UNILAK, Dr Ngamije Jean yabwiye abarangije amasomo ko bahawe ibyangombwa nkenerwa bizabafasha kubyaza umusaruro ubumenyi bahakuye
Umuyobozi wungirije w’inama y'ubuyobozi ya UNILAK, Murekatete Alphonsine, yashimiye uruhare iyi Kaminuza igira mu gutanga uburezi bufite ireme kandi bushingiye ku ndangagaciro za gikirisitu
Murekatete yashimye abagize uruhare kugira ngo ibi birori bigende neza
Pasiteri Ezra Mpyisi yavuze isengesho risoza ibirori
Pasiteri Ruhangara Eric yasomye ijambo ry'Imana muri uyu muhango
Rugaju Edithe yavuze mu izina ry'abarangije amasomo muri UNILAK
Ababaye indashyikirwa bashimiwe
Akanyamuneza kari kose mu barangije amasomo
Abayobozi ba Kaminuza ya UNILAK bari kwemeza impamyabumenyi z'abarangije amasomo

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza