Amahirwe adasanzwe ku Rwanda na Afurika mu imurikagurisha rigiye kubera i Kigali

Yanditswe na Rabbi Malo Umucunguzi
Kuya 14 Gicurasi 2019 saa 08:43
Yasuwe :
0 0

Amarenga y’ibidasanzwe mu bucuruzi ku mugabane wa Afurika yagaragaye ku wa 21 Werurwe 2018, ubwo ibihugu bihuriye mu Muryango wa Afurika yunze Ubumwe, AU, byakoraniye i Kigali bikemeza amasezerano ashyiraho isoko rusange rya Afurika, AfCFTA.

Kugeza uyu munsi ibihugu 22 byari bikenewe ngo biyemeze burundu abone gushyirwa mu bikorwa byarabonetse, ndetse azatangira kubahirizwa ku wa 30 Gicurasi.

Kuri uyu wa Kabiri nibwo i Kigali hasinyiwe amasezerano ahesha u Rwanda kwakira imurikagurisha nyafurika, Intra-Africa Trade Fair 2020, hagati ya Banki Nyafurika y’Ibitumizwa n’Ibyoherezwa mu mahanga, Afreximbank, AU na Guverinoma y’u Rwanda.

Perezida wa Afreximbank, Prof Benedict Oramah, yavuze ko muri iri murikagurisha rizaba ku nshuro ya kabiri ku wa 1-7 Nzeri 2020, u Rwanda ruzubakira ku byakozwe na Misiri iheruka kuryakira rikaba ryiza kurushaho.

Ati “Dufatanyije n’abafatanyabikorwa bacu, Afurika yunze Ubumwe na Guverinoma y’u Rwanda, twihaye intego y’uko hazaba hari abantu 1000 bamurika ibyo bakora, hagakorwa amasezerano agera kuri miliyari 40 z’amadolari ndetse hakitabira abantu 10000 barimo abaguzi n’abazitabira inama bo mu bihugu bisaga 50.”

Iri murikagurisha ryabereye mu Misiri mu mwaka ushize ryasize hasinyiwe amasezerano ya miliyari zisaga 32 z’amadolari mu bucuruzi n’ishoramari.

Amasezerano n’u Rwanda yasinyiwe muri Kigali Convention Centre ahateraniye inama ya Transform Africa. Abayobozi bavuze ko nta hantu heza yari gusinyirwa harenze ahateraniye urubyiruko rugishakisha amahirwe yo gutera imbere no guhanga imirimo.

Komiseri muri AU ushinzwe Ubucuruzi n’Inganda, Amb. Albert Muchanga, yavuze ko hari abacuruzi benshi muri Afurika bagaragaza ko batabona ishoramari rihagije cyangwa ngo bahuzwe n’amasoko uko babyifuza.

Ati “Imurikagurisha nyafurika ni urubuga rw’amakuru mu bijyanye n’ubucuruzi rigomba gukemura icyo kibazo cyo kubura amakuru. Iri murikagurisha kandi ni urubuga rwo guhuriza hamwe abaguzi n’abacuruzi, rizakemura icyo kibazo cy’imari.”

Minisitiri w’Ubucuruzi n’Inganda, Soraya Hakuziyaremye, yavuze ko aya ari amahirwe adasanzwe kuko azatuma abanyafurika barushaho gukorana ubucuruzi hagati yabo.

Ati “Iri murikagurisha rigamije gushishikariza Abanyafurika guhahirana, nk’uko byagiye bigaragara ni uko ibihugu bya Afurika bidahahirana bihagije, haracyarimo imbogamizi aho usanga ibihugu bya Afurika bihahirana hagati yabyo ku kigereranyo ya 18% kandi wareba nko mu bihugu by’i Burayi ugasanga bihahirana ku kigero cya 63%. Bivuga ko hakiri imbogamizi mu bucuruzi hagati y’ibihugu bya Afurika.”

Minisitiri Hakuziyaremye yavuze ko kubera umubare minini w’abaguzi n’abamurika ibyo bakora bazaba bari mu Rwanda, ari uburyo bwiza rubonye bwo kugaragaza amahirwe y’ishoramari rufite.

Ati “Ikindi cy’ingenzi ni ukugira ngo abashoramari baba abo muri Afurika, baba abo mu bindi bihugu bashaka gushora imari muri Afurika, na bo bazaba bateganyirijwe umwanya muri iryo murikagurisha, ku buryo twumva nk’u Rwanda, ari amahirwe yo kubona aho tuzagaragaza ibikorwa byinshi by’u Rwanda bikeneye abafatanyabikorwa cyangwa abashoramari.”

“Mu gihugu cya Misiri umwaka ushize bashoboye kubona amasoko cyangwa abashoramari kuri miliyari zirenga 30 z’amadolari. Ku bufatanye bwa Afreximbank n’Umuryango wa Afurika yunze ubumwe twizera ko mu Rwanda tuzarushaho, ku buryo duteganya ko twabona abashoramari byaba mu mishinga yo mu Rwanda cyangwa no muri Afurika, ku kigereranyo kirenga miliyari 40 z’amadolari.”

Afreximbank iteganya n’uburyo bushya bwo kwishyurana

Nyuma y’ibikorwa birimo gutangiza isoko rusange, hateganywa ibindi birimo uburyo bwo gukurikirana ubucuruzi no kugaragaza ahabaye ikibazo ngo gikurikiranwe, gukuriranaho amahoro n’ibindi, ariko hateganywa n’uburyo bwo kwishyurana bwihariye bwa Afurika.

Ubwo buryo Afreximbank yise ‘Pan African Payment Settlement Platform’ buzagabanya uburyo ibihugu bya Afurika bigendera ku idolari rya Amerika n’andi mafaranga y’amahanga mu bucuruzi hagati yabyo, aha bikazajya byifashisha amafaranga yabyo asanzwe.

Ni uburyo buzamurikirwa abakuru b’ibihugu mu nama ya AU izabera i Niamey muri Niger muri Nyakanga.

Prof Oramah yakomeje ati “Turimo gukorana n’Umuryango w’Ubumwe bwa Afurika ngo tuvaneho imbogamizi zose zikigaragara, kugira ngo abantu babashe kwishyurana byoroshye hagati y’ibihugu, gufungura isoko gutya ni ukuvuga ngo niba mbonye umuguzi ni gute tuzishyurana, imbogamizi zo kwishyurana nazo turimo kuzivanaho.”

Biteganyijwe ko amasezerano ashyiraho isoko rusange azahuriza ibihugu bigize uyu mugabane ku isoko ry’abaturage bagera kuri miliyari 1.2 batuye Afurika, n’ibihugu 55 bifite umusaruro mbumbe wa miliyari 2500 z’amadolari ya Amerika.

Amb Muchanga, Minisitiri Hakuziyaremye na Prof Oramah basinya ku masezerano
Minisitiri Hakuziyaremye asinya ku masezerano
Bahererekanyije inyandiko bishimira intambwe yatewe
Komiseri Amb. Albert Muchanga yavuze ko iri murikagurisha ari igikorwa gikomeye kuri Afurika\
Minisitiri Hakuziyaremye yahawe impano nyuma y'ikiganiro n'abanyamakuru
Umunyamabanga Uhoraho muri Minisiteri y'Ubucuruzi n'Inganda, Michel Minega Sebera, ni we wayoboye isinywa ry'aya masezerano
Umuyobozi Mukuru Wungirije w'Ikigo cy'Igihugu cy'Iterambere, RDB, Emmanuel Hategeka yitabiriye isinywa ry'aya masezerano

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza