Col Byabagamba na Rtd Brig Gen Rusagara basabiwe kugumishirizwaho ibihano bahawe n’Urukiko rwa Gisirikare

Yanditswe na Akayezu Jean de Dieu
Kuya 13 Nzeri 2019 saa 03:39
Yasuwe :
0 0

Ubushinjacyaha bwa Gisirikare bwasabye Urukiko rw’Ubujurire kugumishaho ibyaha Rtd Brig Gen Frank Rusagara na Col Tom Byabagamba bahamijwe n’Urukiko Rukuru rwa Gisirikare bityo bagakomeza gufungwa.

Brig Gen Rusagara yakatiwe gufungwa imyaka 20, amaze guhamwa no kwamamaza nkana ibihuha no kugomesha rubanda arwangisha ubutegetsi buriho, gukora igikorwa kigamije gusebya Leta ari Umuyobozi ndetse no gutunga imbunda binyuranije n’amategeko.

Col Byabagamba we yakatiwe gufungwa imyaka 21, nyuma yo guhamwa n’icyaha cyo gukwiza nkana ibihuha agomesha rubanda arwangisha ubutegetsi, icyaha cyo gusebya leta, icyaha cyo guhisha nkana ibintu byagombye gufasha kugenza icyaha gikomeye hamwe n’icyaha cyo gusuzugura ibendera ry’igihugu cyangwa ibimenyetso biranga ubwigenge.

Muri Gicurasi 2019, bose bitabaje Urukiko rw’Ubujurire bagaragaza ko batanyuzwe n’icyemezo cy’Urukiko rwa Gisirikare rwabahamije ibi byaha mu 2016. Batangiye kuburana mu mizi ku wa 3 Nzeri 2019.

Iburanisha ryo kuri uyu wa Gatanu ryihariwe na Rt Brig Gen Rusagara wahakanye ibyaha byose aregwa avuga ko ari ibihimbano ndetse n’abatangabuhamya bagendeweho n’Urukiko Rukuru rwa Gisirikare ari aba ‘Fake’.

Yahereye ku cyaha cyo gutunga imbunda avuga ko yari afite imbunda ebyiri ariko abantu bagiye bazimuha mu bihe bitandukanye ndetse bakazimuha yagiye mu kazi yoherejwemo n’igihugu.

Ikosa yemera yakoze naryo avuga ko ryabarwa mu rwego rw’akazi ngo ni ukuba ataramenyesheje Umuyobozi Mukuru wa Polisi ko atunze imbunda ariko ngo abandi bayobozi bari babizi ndetse we yari aziko nta kibazo kuko yari azitunze atagamije kuzikoresha ikibi.

Yavuze ko icyaha cyo kwamamaza ibihuha nta kuntu yari kwamamaza ibihuha kandi nyuma y’uko asezererwa mu Gisirikare yarahawe inshingano zo kwigisha gahunda ya Ndi Umunyarwanda n’ibiro by’Umukuru w’Igihugu.

Yavuze ko nta kuntu yari kwamamaza ibihuha kandi yarazengurutse igihugu cyose akajya muri za Minisiteri n’ibigo bya Leta yigisha Ndi Umunyarwanda.

Yagarutse ku mutangabuhamya Steven Karyango avuga ko uyu nta wamwizera kuko yigeze kuba umucamanza mu Rukiko rwa Gisirikare nyuma aza kwirukanwa azira guca Urubanza nabi [Icyo gihe ngo we n’Inteko yari ayoboye bakimara guca urwo rubanza bahise birukanwa].

Yavuze ko amateka ye atamwemerera kuba umutangabuhamya wo kwizerwa.

Me Buhuru Celestin yavuze ko iyo akarengane kinjiye mu ngoro y’ubutabera kanyuze mu muryango, ukuri gusimbukira mu idirishya gukiza amagara. Avuga ko yemera ko atari ko bizagenda ahubwo Urukiko rw’Ubujurire ruzatanga ubutabera bugahura n’ukuri maze bagatesha agaciro icyemezo cy’Urukiko Rukuru rwa Gisirikare.

Yasoje asaba Urukiko rw’Ubujurire gutesha agaciro icyemezo cy’Urukiko Rukuru rwa Gisirikare bityo uwo yunganira agahita arekurwa agasubira mu buzima busanzwe.

Umushinjacyaha Capt Nzakamwita Faustin yahawe umwanya avuga ko abajuriye bafashe umwanya munini ndetse bavuga ibitari muri dosiye. Yavuze ko kuvuga ko abatangabuhamya badakwiye kwizerwa kuko basezerewe bidakwiye kuko abatangabuhamya bahoze ari abasirikare kandi basezerewe mu cyubahiro hamwe na Rt Brig Gen Rusagara.

Yavuze ko ku cyaha cyo guteza imvururu n’imidugararo muri rubanda uregwa n’umwunganira bakoze ikosa ry’uko kugeza ubu bakibyita ibihuha kandi atari ibihuha baregwa ahubwo ari uguteza imvururu n’imidugararo muri rubanda.

Capt Nzakamwita yibanze ku nyandiko zitandukanya zanditswe n’abarwanya leta , uyu Rt Brig Gen Rusagara yagiye yohereza abantu batandukanye.

Icyo gutunga imbunda, Capt Nzakamwita yavuze ko gutunga imbunda nta burenganzira yabiherewe n’Umuyobozi Mukuru wa Polisi. Ashimangira ko bidashobora kuba amakosa yakozwe mu rwego rw’akazi ahubwo ari icyaha gihanirwa n’amategeko.

Capt Nzakamwita yasoje asaba Urukiko rw’Ubujurire kugumisha kuri Rt Brig Gen Rusagara ibyaha byose n’igihano cyo gufungwa imyaka 20, nk’uko byategetswe n’Urukiko Rukuru rwa Gisirikare.

Umucamanza yongeye guha umwanya Rusagara asoza avuga ko "Icyo ngarukaho nta kindi ni ubutabera, ubutabera ni ubwacu kandi igihugu ni icyacu. Ubutabera ni umubyeyi ureberera abantu bose, nishimiye ko mufitemo icyizere ko ubutabera buzaboneka. Mwarakoze kutwihanganira ariko nizeye ko bwa butabera muzabutanga.”

Nyuma yo kumva impande zombi, Umucamanza Mukanyundo Patricia wari uyoboye inteko iburanisha yashimye ababuranyi uburyo bitwaye avuga ko icyemezo cy’urukiko kizasomwa ku wa 15 Ugushyingo 2019, saa tanu z’amanywa.

Rt Brig Gen Rusagara na Me Buhuru ubwo bageraga mu rukiko ku munsi wa mbere w'ubujurire
Col Tom Byabagamba na Me Gakunzi umwunganira mu mategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza