Dr Léon Mugesera agiye gusubira mu rukiko aburana ku byaha bya Jenoside

Yanditswe na Rabbi Malo Umucunguzi
Kuya 9 Ukwakira 2019 saa 02:09
Yasuwe :
0 0

Dr Léon Mugesera uheruka gukatirwa gufungwa burundu kubera ibyaha bya Jenoside, ategerejwe imbere y’Urukiko rw’Ubujurire nyuma yo kutishimira igifungo yakatiwe nyuma yo guhamwa n’ibyaha.

Ingengabihe y’Urukiko rw’Ubujurire igaragaza ko Dr Mugesera azitaba urukiko ku wa 21 Ukwakira, nyuma y’iminsi ibiri Pasiteri Jean Uwinkindi na we baregwa ibyaha bimwe akazitaba uru rukiko, na we akaba yarakatiwe gufungwa burundu.

Kuri uyu wa 15 Mata 2016 ni bwo Urukiko Rukuru rwasomye urubanza Dr Léon Mugesera wari umaze igihe kirekire aburana ku byaha bya Jenoside n’ibyibasiye inyokomuntu.

Mu byaha bitanu yaregwaga n’Ubushinjacyaha, bitatu muri byo ni byo byamuhamye, maze akatirwa igihano gikuru kurusha ibindi hagendewe ku mategeko agenga iburanisha ry’imfungwa zoherejwe n’Urukiko Mpuzamahanga Rwashyiriweho u Rwanda.

Dr Mugesera yahamwe n’ibyaha birimo gushishikariza Abahutu mu buryo butaziguye kwica Abatutsi, gutoteza nk’icyaha cyibasiye inyokomuntu no kubiba urwango rushingiye ku moko n’inkomoko.

Ni ibyaha Ubushinjacyaha bwagiye bugaragariza urukiko ko bigomba guhama Dr Mugesera hagendewe ku butumwa bukubiye mu ijambo yavugiye ku Kabaya mu 1992, buvugako ryuje ingengabitekerezo n’amagambo atoteza, asebanya, byose bigamije umugambi wa Jenoside.

Kuva Urubanza rwatangira kuburanishwa mu mizi muri Mutarama 2013, Dr Mugesera ntiyegeze na rimwe yemera ibyo ashinjwa nk’ibyaha hagendewe ku ijambo yavugiye ku Kabaya, kuko we yakomeje guhamiriza urukiko ko atemera neza ko ari ryo yavuze, asobanura ko uwarivuze yari agamije guhangana n’amashyaka ya politiki kubera ko ngo igihugu cyari cyamaze guterwa n’icyo yise umwanzi.

Dr Léon Mugesera yagejejwe mu Rwanda yoherejwe na Canada ngo akurikiranwe ku byaha bya Jenoside n’ibyibasiye inyokomuntu.

Dr Léon Mugesera agiye gusubira mu rukiko aburana mu bujurire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza