Gereza zo mu Rwanda zigiye gushyirwamo telefoni rusange

Yanditswe na Emma-Marie Umurerwa
Kuya 1 Kanama 2018 saa 09:23
Yasuwe :
0 0

Urwego rw’Igihugu rushinzwe imfungwa n’abagororwa (RCS) ruratangaza ko ruri kwiga umushinga wo gushyira telefoni rusange muri Gereza 13 zo hirya no hino mu gihugu, hagamijwe gufasha imfungwa n’abagororwa kumenya amakuru yo mu miryango yabo.

Umuvugizi wa RCS, SSP Hillary Sengabo, yabwiye IGIHE ko inyigo y’uyu mushinga yarangiye hasigaye kubona ikigo cy’itumanaho kizawukora mu buryo bwizewe.

Yagize ati “Turacyarimo kuganira n’Ibigo by’itumanaho harebwa uburyo babidukorera ku buryo bitahungabanya umutekano w’Igihugu. Umushinga urahari kandi ikibazo gihari si ingengo y’imari, ikibazo gisigaye ni uwabikora kandi neza”.

SSP Sengabo asobanura ko izi telefoni nizitangira gukoreshwa umugororwa azajya yishyiriramo ikarita iguzwe mu mafaranga abamusura bamusigira.

Ati “Umunsi zahageze rero kuri ya mafaranga abantu basura abagororwa basiga tukayandika mu ikayi n’umugorwa akaba afite ikayi ye yanditsemo amafaranga yasigiwe, niho hazajya hava ayo ashyirwa ku ikarita hanyuma avugisha abo mu muryango we”.

Avuga ko abadafite ababasura ngo babasigire ayo mafaranga ubuyobozi bwa gereza buzajya bubafasha.

Sengabo asobanura ko uyu mushinga nutangira gukora, uzajya ashaka guhamagara azajya ajya mu rwego rushinzwe imibereho y’abagororwa avuge uwo ashaka guhamagara n’icyo ashaka kumuhamagarira, hanyuma bamuhe telefoni ahamagare.

Yakomeje ati “Ubusanzwe muri gereza hari telefoni ngendanwa y’agateganyo, abagororwa bashakaga guhamagara abo mu miryango yabo baragenda bakayisaba bakayibaha ariko urumva ko itakora nk’uko telefoni rusange ikora”.

Iyi telefoni yakoreshwaga cyane n’abagororwa mpuzamahanga ariko nabo habanzaga kurebwa uwo bagiye guhamagara n’icyo bagiye kumuhamagarira.

Gushyira telefoni rusange muri gereza bizacyemura ibibazo bitandukanye hagati y’abagororwa n’imiryango yabo ndetse n’ikibazo cy’abajyaga bagerageza kwinjiza telefoni zigendanwa muri gereza kandi bitemewe.

Ibyo imfungwa n’abagororwa bemerewe kuvugira kuri telefoni

Nubwo muri gereza hagiye gushyirwa telefoni rusange, SSP Sengabo, avuga ko hari ibyo abazazivugiraho bemerewe n’ibyo batemerewe.

Ati “Ibyahungabanya umutekano w’igihugu ntabwo byemewe, guca igikuba nabyo ntibyemewe”.

Gusa kubaza amakuru y’abo mu muryango, iby’urukundo cyangwa kuvugana n’uwo ukunda biremewe.

Telefoni rusange muri gereza zizabanza zigenzurwe ku buryo bizashoboka kumenya abazivugiraho bashaka gukemura ibibazo byo mu miryango yabo n’abandi baba bazikoresha bashaka guhungabanya umutekano w’igihugu.

Muri gereza 13 zo mu Rwanda hagiye gushyirwamo telefoni rusange zizajya zifasha abafunzwe kuvugana n'abo mu miryango yabo n'abandi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza