Guverinoma yihaye ukwezi ku gukemura ikibazo cy’abakoraga muri mituweli mu turere batakaje akazi

Yanditswe na Ferdinand Maniraguha
Kuya 21 Ugushyingo 2017 saa 08:04
Yasuwe :
0 0

Guverinoma yatangaje ko uyu mwaka uzarangira yamaze guha imperekeza abari abakozi bakoraga ba mitiweli ikiri mu nshingano z’uturere nyuma bakaza kwisanga nta myanya bafite.

Guhera muri Nyakanga 2015, ubwisungane mu kwivuza bwa “Mituweli” bweguriwe gucungwa n’Ikigo cy’Igihugu gishinzwe Ubwiteganyirize (RSSB); abakozi bamwe bacungwaga n’uturere bagahembwa mu mafaranga yavuye mu misanzu batakaza akazi.

Ubwo mituweli yegurirwaga RSSB, abo bakozi bahawe amasezerano y’amezi atatu ararangira, RSSB ihitamo bamwe igomba gukomeza gukorana nabo abandi baguma aho batazi niba barasezerewe cyangwa niba hari akandi kazi bazahabwa. Hashize umwaka n’amezi atanu abo bakozi batari mu kazi kandi nta n’urwandiko rubasezerera barabona.

Uturere twavuze ko atari two twakwishyura abo bakozi kubera ko ibijyanye na mituweli byashyizwe muri RSSB, nayo ikavuga ko itakwishyura kandi atari yo yagiranye nabo amasezerano.

Kuri uyu wa Kabiri ubwo inzego zirimo Minisiteri y’imari n’igenamigambi; Minisiteri y’abakozi ba Leta n’Umurimo; Minisitiri y’Ubutegetsi bw’Igihugu na RSSB zitabaga Komisiyo y’Abadepite ishinzwe imibereho myiza y’abaturage, hatanzwe icyizere ko icyo kibazo kizakemurwa.

Minisitiri w’abakozi ba Leta n’Umurimo, Rwanyindo Fanfan, yavuze ko nyuma yo kubona ko inzego zose ziri kugaragaza impungenge, bafashe umwanzuro wo kwigira hamwe icyo kibazo.

Yagize ati “Mbere twavugaga ko Akarere ariko kagomba kwishyura hanyuma tuza kwemeza ko dukora ibintu byose hakurikijwe amategeko. Twaje gusanga atari uturere twakwishyura kuko umukoresha wa nyuma yabaye RSSB kandi amafaranga bishyurwagamo ni aya mituweli, bayimuriye muri RSSB. Turacyari mu biganiro rero tureba kuko abakoreraga mituweli siko bose bahawe akazi mu buryo bukurikije amategeko, hari n’abafite amasezerano atumvikana.”

Rwanyindo yavuze ko ubu bari no kureba niba nta bakoreraga mituweli bahawe akazi mu zindi nzego za Leta noneho abasigaye akaba aribo bahabwa imperekeza.

Minisitiri w’Imari n’Igenamigambi, Amb Gatete Claver, yavuze ko bitondeye iki kibazo kuko bashoboraga kugikemura binyuranyije n’amategeko bagahanwa.

Yagize ati “Twarabyitondeye kuko ushobora gukora amafuti noneho bikaza kuba ibibazo […] Ni ubwa mbere twari tugize imiterere imeze kuriya, niyo mpamvu twagize urujijo. Twaravuze tuti ‘reka tujye hamwe tubisuzumire hamwe, turebe amategeko ateganya iki’.”

Yakomje avuga ko ibiganiro barimo bigomba kuba byageze ku mwanzuro bitarenze Ukuboza 2017, ubundi muri Mutarama 2018 bagatangira kwishyura.

Yagize ati “Twihaye ukwezi k’Ukuboza kugira ngo tube turangije noneho amakuru yose ashyirwe hamwe, ugomba kubandikira amenyekane. Kwandikirwa birakorwa vuba noneho batangire kwishyurwa mu kwezi kwa mbere, tube tuzi ngo nibanishyurwa nta muntu ujya kuturega.”

Gatete yavuze ko mu biganiro bazanareba ku gihe gishize abo bakozi batarahabwa amabaruwa abasezerera kandi nta n’akazi bafite, yizeza ko bazagikemura ku buryo nta n’umwe uzaharenganira.

Abakozi bafite ikibazo cyo kuba barahoze bakorera mituweli ntibahabwe akazi cyangwa imperekeza ubwo yimurirwaga muri RSSB bagera ku 137.

Minisitiri w’Imari n’Igenamigambi, Amb. Gatete Claver

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza