Ibiciro by’ibikomoka kuri peteroli bishobora kuzamuka nyuma y’ibitero bya drones byagabwe muri Arabie Saoudite

Yanditswe na Bukuru JC
Kuya 15 Nzeri 2019 saa 12:58
Yasuwe :
0 0

Igitero cyifashishije indege zitagira abapilote cyibasiye inganda ebyiri zitunganya peteroli zo muri Arabie Saoudite, bituma umusaruro ushyirwa ku isoko n’icyo gihugu uhita ugabanukaho utugunguru miliyoni 5.7 ku munsi, ni ukuvuga hafi 6% bya peteroli ikenerwa ku Isi.

Igitero cyo kuri uyu wa Gatandatu, tariki ya 14 Nzeri 2019, cyibasiye inganda zo mu duce twa Abqaiq na Khurais, bituma umusaruro w’ibikomoka kuri peteroli utangwa na Arabie Saoudite ugabanukaho nibura kimwe cya kabiri, kandi ari igihugu cya mbere ku Isi mu bicuruza peteroli nyinshi.

Byahise bitera impungenge ko ibiciro by’ibikomoka kuri peteroli bishobora kuzamuka ku isoko mpuzamahanga guhera kuri uyu wa Mbere.

Nko muri Kanama, Arabie Saoudite yashyiraga ku isoko utugunguru miliyoni 9.85 ku munsi, tungana na 10% by’ibikomoka kuri peteroli bigurishwa ku Isi yose nk’uko ikinyamakuru The Washington Post cyabitangaje.

Iki gitero cyanagize ingaruka kuri gaz yatunganywaga nayo yagabanutseho 50 ku ijana.

Minisitiri w’Ububanyi n’Amahanga wa Leta Zunze Ubumwe za Amerika, Mike Pompeo, yashinje Iran kuba inyuma y’icyo gitero cyigambwe n’inyeshyamba z’aba-Houthi zo muri Yemen.

Mu butumwa yanyujije kuri Twitter, Pompeo yavuze ko Iran ari yo ibiri inyuma.

Yakomeje ati “Nubwo hakomeje gusabwa ko ibintu bitafafata indi ntera, Iran noneho yagabye igitero ku ruganda rwa mbere ku Isi runini mu bijyanye n’ingufu. Nta kimenyetso na kimwe kigaragaza ko igitero cyaturutse muri Yemen.”

Arabie Saoudite iyoboye ibikorwa bya gisirikare bigamije guca intege ibikorwa by’inyeshyamba z’aba-Houthis muri Yemen, guhera mu 2015. Gusa iyi ntambara ifatwa nk’iri hagati ya Arabie Saoudite na Iran itera inkunga izo nyeshyamba.

Pompeo yanasabye ibindi bihugu kwamagana Iran ndetse anatangaza ko Amerika izakora ibishoboka mu kongerera imbaraga urwego rw’ingufu ku Isi.

Ati “Leta Zunze Ubumwe za Amerika zizakorana n’abafatanyabikorwa kugira ngo isoko ry’ibijyanye n’ingufu rikomeze kwihaza kandi Iran iryozwe ubushotoranyi bwayo.”

Perezida Donald Trump yahamagaye Igikomangoma Mohammad bin Salman uyobora Arabie Saoudite, mu kumwihanganisha no kumwizeza ubufasha mu kurushaho kwirinda nk’igihugu.

Minisitiri ushinzwe Ingufu muri Amerika, Rick Perry, yavuze ko igihugu cye cyiteguye gushyira ku isoko ibikomoka kuri peteroli biri mu bubiko bwacyo, igihe isoko ryaba rihungabanye kubera iki gitero. Ngo gifite nibura utugunguru dusaga miliyoni 630 dushobora kwifashishwa.

Biteganyijwe ko ibikorwa byo gusana izi nganda ngo zisubirane ubushobozi bwazo bitangira mu minsi mike iri imbere.

Inganda ebyiri zitunganya peteroli zo muri Arabie Saoudite zasenywe n'ibitero byagabwe hakoreshejwe drones

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza