Ibigo bitanu by’abanyamahanga byitabiriye Expo 2018 byafunguye amashami mu Rwanda

Yanditswe na Mugabo Jean d’Amour
Kuya 3 Kanama 2018 saa 07:30
Yasuwe :
0 0

Abakozi b’Ikigo cy’Igihugu cy’Iterambere (RDB) bakorera mu Imurikagurisha Mpuzamahanga rya 21 (Expo 2018) riri kubera i Gikondo, bamaze kwandika ibigo 40 birimo bitanu by’abanyamahanga bitabiriye iri murikagurisha ribera i Gikondo mu Mujyi wa Kigali.

Aganira na IGIHE, Umwanditsi Mukuru muri RDB, Kayibanda Richard yagize ati “Tumaze kwandika ibigo bitanu by’abanyamahanga bitabiriye expo bagahitamo no guhita biyandikisha kugira ngo bakorere mu Rwanda.”

Kayibanda yavuze ko ubusanzwe bifata amasaha atarenze atandatu kugira ngo umuntu abe yamaze kwandikisha ikigo no kubona icyangombwa ku biro bya RDB ariko muri expo bifata iminota itarenze 15 kugira ngo umuntu wese uhageze afite n’umwanya muto by’umwihariko abanyamahanga abashe gusiga yandikishije ikigo cye.

Umwanditsi w’ibigo muri RDB ukorera muri Expo 2018, Umurerwa Flora yavuze ko uretse ibigo bitanu by’abanyamahanga bimaze kwiyandikisha, hari n’ibindi byinshi byabegereye bigaragaza ko biziyandikisha kandi ko 40 bimaze kwiyandikisha nyuma y’icyumweru kimwe expo itangiye ari byinshi ugereranyije n’uko byiyandikishaga muri expo zahise.

Yagize ati “Ubusanzwe ibigo byitabiraga kwiyandikisha mu minsi nk’itanu ya nyuma ya expo ariko ubu byatangiye kwiyandikisha mu ntangiriro. Ubu umuntu arandikisha ikigo cye mu minota itarenze itanu ubundi tugahamgara ku biro bagahita bamukorera icyangombwa ku buryo byose biba birangiye mu minota itarenze 15. Abenshi barandikisha ubundi bakaba batembera muri expo maze bakatunyuraho batashye tukabaha icyangobwa cy’ikigo bandikishije.”

Umurerwa yavuze ko ibigo by’abanyamahanga byamaze kwiyandikisha byiganjemo iby’abacuruzi bakomeye bafite ibyo bikorera bakaba bashaka kujya babicuruza mu Rwanda ku buryo buhoraho.

Yongeyeho ko hari icyizere cy’uko haziyandikisha ibigo byinshi kuruta ibyiyandikishirije muri Expo 2017. RDB igaragaza ko yanditse ibigo 97 harimo 29 by’abanyamahanga muri Expo 2017 ariko iby’abanyamahanga byiyandikishije ku bwinshi mu minsi ya nyuma.

Expo 2018 yatangiye ku wa 26 Nyakanga izarangira ku wa 15 Nzeri ikaba yaritabiriwe n’ibigo 500 bituruka mu bihugu 23 byo ku migabane yose y’isi.

Abakozi ba RDB bakorera muri Expo 2018 bamaze kwandika ibigo 40 birimo bitanu by’abanyamahanga
Expo 2018 yitabiriwe n'abamurika baturutse ku migabane yose y'isi
Hari ibigo byinshi by'abanyamahanga byitabiriye Expo 2018
Ibiro bya RDB biri muri Expo 2018 byandika ikigo bigahita bitanga icyangombwa mu minota itarenze 15

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza