Ibikenewe kugira ngo umukandida wa mbere wigenga atorerwe kujya mu Nteko Ishinga Amategeko mu Rwanda

Yanditswe na Ferdinand Maniraguha
Kuya 10 Kanama 2018 saa 07:55
Yasuwe :
0 0

Inshuro zibaye eshatu haba amatora y’abagize Inteko Ishinga Amategeko nyuma ya Jenoside yakorewe Abatutsi mu 1994, ariko nta na rimwe haraboneka umukandida wigenga watorewe kwicara muri uwo mwanya.

Tariki ya 2 na 3 Nzeli hazaba amatora ya kane ariko nabwo icyizere ni gike ko hazagira ubasha kubona amajwi 5% asabwa. Mu matora yo muri Nzeri 2003, mu bakandida 230 hataniraga imyanya 53 itorerwa mu Nteko bwo nta wigenga wagaragayemo.

Muri Nzeri 2008, andi matora y’abadepite yarabaye, Harerimana Jean Marie Vianney wari wiyamamaje nk’umukandida rukumbi wigenga yabonye amajwi 0.6%. Mu 2013, Mwenedata Gilbert yabonye 0.42%, Mutuyimana Leonille agira 0.15%, Ganza Clovis agira 0.19% naho Bizirema Venuste abona 0.16%.

Ukurikije ayo mateka, ibyo kwinjira mu Nteko Ishinga Amategeko uri umukandida wigenga bijya gusa nka bya bindi byo muri Bibiliya, by’umukire ushaka kwinjira mu bwami bw’ijuru.

Mu mwaka wa 2016, Ishyaka Democratic Green Party, ryasabye ko itegeko rigenga amatora ku ngingo irebana n’abakandida bigenga ryavugururwa kuko bikomeye kuba umukandida wigenga yasabwa amajwi 5% angana n’ay’umutwe wa politiki, risubizwa ko nta bimenyetso bigaragaza ko itegeko ribangamye.

Ikibazo ni itegeko cyangwa ni abakandida bigenga?

Umwarimu wigisha politiki mpuzamahanga muri Kaminuza y’u Rwanda, Dr Ismael Buchanan, yabwiye IGIHE ko abakandida bigenga bakwiye kwishimira no kuba bemerewa guhabwa umwanya wo kwiyamamaza hamwe n’andi mashyaka ya politiki, ngo kuko hari ibihugu bigoye kwiyamamaza uri umukandida wigenga.

Buchanan ntahakana ko amajwi abakandida bigenga basabwa ari menshi ariko avuga ko hari ibyo bagakwiye kuba bakora kugira ngo batsinde badakora.

Yagize ati “Ubushobozi bw’umukandida ni ikintu kitagomba kurebwa gutyo gusa. Kugira ngo ibyo byose ubigereho bisaba ubushobozi. Biba bisaba ko umukandida agera ahantu hose hashoboka kugira ayo majwi ayabone ariko kubera kutitegura usanga igihe kigera ataragera aho hose. Kwiyamamaza bisaba ubushobozi n’umwanya.”

Ubushobozi Dr Buchanan avuga ni amafaranga. Avuga ko umakandida akwiye kujya kwiyamamaza afite ubushobozi butuma agera mu duce twose tw’igihugu kugira ngo abaturage bamumenye nkuko amashyaka abigenza.

Ati “Birasaba kwitegura neza no kumva ko igihe cyose uzajya mu matora, ugomba kubanza kubyitegura kugira ngo igihe kitakurangirana utarabona ibisabwa. Biriya bikorwa byo kwamamaza umukandida, amafoto amanikwa byose biterwa n’ubushobozi umukandida afite.”

Mpayimana Philippe umwe mu bakandida bigenga yabwiye IGIHE ko amenshi mu mafaranga y’abakandida bigenga ashirira mu gushaka imikono 600 basabwa na Komisiyo y’amatora ku buryo biba bitaboroheye mu gihe cyo kwiyamamaza.

Yagize ati “Ni ibintu bikomeye cyane kuko igice kinini cy’ingengo y’imari gishirira mu gushaka imikono kandi gushaka imikono ho nta mbabazi, uba ugomba kwigisha abaturage bakumva bakagusinyira, aho ngaho iyo tubonye uharangije turongera tukiyubaka bundi bushya.”

Yakomeje agira ati “Ikindi gikunze kumbabaza ni uko Abanyarwanda batamenyereye gushyigikira abakandida bigenga nk’uko batanga imisanzu mu mashyaka. Urumva ko ikibazo cy’ubushobozi ni ukongera guhangana nubwo buba ari buke ariko tuba twabyiyemeje dukoresha ubushobozi buke dufite kugeza turangije.”

Umunyamabanga Nshingwabikorwa wa Komisiyo y’Amatora (NEC), Charles Munyaneza muri Mutarama uyu mwaka yabwiye IGIHE ko iby’amajwi asabwa abakandida bigenga biteganywa n’Itegeko, kubihindura bikaba bisaba ko itegeko naryo rivugururwa.

Ati “Biriya bya 5% ni ibintu biri mu Itegeko Nshinga, iyo bashaka ko bihinduka baba baratanze ibitekerezo byabo mu gihe ryavugururwaga na byo bikavugururwa. Sinzi ko Itegeko Nshinga ryakongera kuvugururwa, ryavuguruwe ejo bundi kandi bari bahari bose.”

Munyaneza yongeraho ko atiyumvisha uko umuntu yabura amajwi 5% ngo ahagararire abaturage mu Nteko Ishinga Amategeko.

Ati “Iyo bavuga ngo ni menshi sinzi aho bahera, iyo ufashe 5% ntabwo birenga 350 000 muri miliyoni zirenga zirindwi z’abatora. Ni gute umuntu ushaka kuba Perezida cyangwa Umudepite yabura amajwi 350 000 muri miliyoni zirindwi zirenga, urumva na ho haba harimo ikibazo.”

Dr Buchanan avuga ko abakandida bigenga bakwiye guhindura amayeri bakoresha biyamamaza niba bashaka kubona amajwi basabwa ngo binjire mu Nteko Ishinga Amategeko.

Yemeza ko igihe ibyo byose byageragejwe bikagaragara ko bidashoboka ari bwo bashobora gusaba ko Itegeko rigenga amatora rihinduka, Leta ikabisuzuma ifite ibyo ishingiraho.

Abakandida bane nibo bemejwe na Komisiyo y’amatora kuziyamamaza mu matora y’abadepite. Barimo Ntibanyendera Elissam Salim, Sebagenzi Ally Hussein, Mpayimana Philippe na Nsengiyumva Janvier.

Kugeza ubu u Rwanda ntirurabasha kugira umudepite watowe nk'umukandida wigenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza