Ibyo Abanyarwanda bakwitega ku isoko rihuriweho mu bwikorezi bw’indege

Yanditswe na Cyprien Niyomwungeri
Kuya 12 Gashyantare 2018 saa 09:00
Yasuwe :
4 3

Mu nama y’Umuryango wa Afurika Yunze Ubumwe (AU) iherutse kubera i Addis Ababa, ibihugu 23 bya Afurika birimo n’u Rwanda, byatangije isoko rihuriweho mu gutwara abantu n’ibintu mu ndege (Single African Air Transport Market), nk’umwe mu mishinga ikomeye izatuma uyu mugabane ugera ku cyerekezo cyawo cya 2063.

Iri soko ribumbatiye amahirwe n’inyungu nyinshi ku Banyafurika zirimo; gufungurirana amarembo mu bijyanye n’ubwikorezi bwo mu kirere, kugabanya ibiciro by’ingendo, guhanga imirimo no guteza imbere ubuhahirane n’ubukerarugendo hagati y’abatuye uyu mugabane.

Mu kiganiro cyihariye IGIHE yagiranye n’Umunyamabanga wa Leta muri Minisiteri y’ibikorwa remezo ushinzwe ubwikorezi, Uwihanganye Jean de Dieu, yasobanuye ko iri soko rivuze byinshi ku Banyarwanda ndetse n’Abanyafurika muri rusange, kuko mbere na mbere rikuraho inzitizi zashyirwaga mu masezerano hagati y’ibihugu yerekeye gutwara abantu n’ibintu mu kirere.

Avuga ko amasezerano y’iri soko akuraho ibyari bisanzwe by’uko iyo sosiyete y’indege yo mu gihugu kimwe yashakaga kujya mu kindi muri Afurika cyangwa kuhagira icyicaro, yasabwaga ibyangombwa binyuze mu gusinya amasezerano atandukanye.

Yagize ati “Ubu noneho ntibizajya biba ngombwa kujya kongera gusinya ariya masezerano. Niba igihugu cyarasinye kikiyemeza kujya mu isoko rihuriweho, kizajya gitanga uburenganzira kuri sosiyete z’indege bwo gukorera ku kibuga no kuziha amasaha zikoreraho bitagombereye guca mu masezerano.”

Akomeza asobanura ko iri soko rihuriweho rikuraho n’inzitizi zashyirwaga mu masezerano nyir’izina hagati y’ibihugu. Izi zirimo inshuro z’ingendo sosiyete z’indege zikora, umubare w’abagenzi izo ndege zemererwa gutwara n’ibyerekeye ingendo indege ikora itwara abantu n’ibintu mu gihugu kimwe ariko ibakuye mu kindi gihugu.

Ati “Hari igihe bakubwiraga ngo nturenze eshatu cyangwa enye ariko ubu biroroshye mushobora kubyumvikanaho.”

Igihe cy’ingendo kizagabanuka

Igihe abagenzi bamaraga bakora ingendo mu kirere cya Afurika kizagabanuka, kuko byaterwaga n’uko hari ibihugu indege zitemererwaga kujyamo.

Wasangaga nk’umugenzi ushaka kuva mu Rwanda ajya muri Mozambique yabanzaga kunyura i Addis Ababa muri Ethiopia, akabona kujya muri Mozambique kuko nta ndege ya RwandAir ijya Mozambique.

Hari kandi n’abagenzi b’Abanyafurika babanzaga guca ku mugabane w’u Burayi kugira ngo babashe kugera mu bindi bihugu bya Afurika. Ibi bikazongera ubuhahirane mu buryo bugaragara.

Uwihanganye avuga ko iri soko rinasobanuye iterambere rya sosiyete z’indege za Afurika, iry’ibikorwa by’ubucuruzi, ubukerarugendo, igabanuka ry’ibiciro by’amatike y’indege kuko amasosiyete yazo aziyongera kandi agakorera ahantu henshi.

Yagize ati “Sosiyete z’indege zizafungura ingendo nshya aho zitajyaga zijya, imirimo izaboneka ku baturage ba Afurika bazakorera isosiyete z’indege zizagurira imirimo yazo mu byerekezo bishya.”

Bisobanuye ko sosiyete Nyafurika zikomeye nka; Ethiopian Airlines, Kenya Airways, RwandAir na South African Airlines, zizongera ibyerekezo bitume Afurika ibasha kwihuza.

Inyigo yakozwe n’Ikigo Mpuzamahanga gishinzwe iby’indege, ku bihugu 12 bya Afurika byafunguriranye ikirere, yerekanye ko byatumye ibyo bihugu byongera miliyari 1.3 z’amadolari kuri GDP, bigahanga imirimo 155,000, hakazigamwa miliyoni 500 z’amadolari mu matike, bikongera serivisi ku kigero cya 75%, kikanongera urwego rw’ubucuruzi no kugabanya igihe abagenzi bakoreshaga mu ngendo.

U Rwanda ni kimwe mu bihugu byafunguye ikirere cyarwo, bikaba byarakubye kabiri umusaruro w’ubukerarugendo n’abagenzi bakirwa ku kibuga cy’indege bakaba bageze mu 700 000 ku mwaka.

Umunyamabanga wa Leta muri Minisiteri y’ibikorwa remezo ushinzwe ubwikorezi, Uwihanganye Jean de Dieu

Impungenge kuri Tanzania na Uganda

Kugeza ubu ibihugu byatangije isoko rihuriweho mu gutwara abantu n’ibintu mu ndege ni; u Rwanda, Afurika y’Epfo, Benin, Côte d’Ivoire, Kenya, Botswana, Burkina Faso, Cape Verde, Repubulika ya Congo, Misiri, Ethiopia, Ghana, Gabon, Guinea, Liberia, Mali, Mozambique, Nigeria, Sierra Leone, Swaziland, Togo, Zimbabwe na Niger.

Tanzania, u Burundi na Uganda ni ibihugu byo mu muryango wa Afurika y’Iburasirazuba (EAC) bitarasinya aya masezerano, kubera impamvu z’uko amasosiyete y’indege yabyo adakora bakirimo kubishyira ku murongo.
Uwihanganye asanga kuba hari ibihugu byo mu karere bitarasinya biteye impungenge, ariko zidakanganye kuko hari intambwe imaze guterwa.

Yagize ati “Kuba hari ibihugu bitarabyemeza hano mu karere birumvikana hari impungenge ariko abakuru b’ibihugu barahuye babyumvikanaho barabitangiza kandi uko iminsi izagenda iza bizagenda byumvikana.”

Iri soko rusange ryitezweho kugabanya 25% by’igiciro cy’amatike y’indege ku bagenzi miliyoni 2.4 bo mu Karere ka Afurika y’Iburasirazuba.

Ubu abagenzi bagenda mu ndege muri Afurika 4% nibo batwarwa n’indege za Afurika, ni ukuvuga ko 96% batwara na sosiyete zo ku yindi migabane.

Uwihanganye asanga iri soko ritazaheza sosiyete z’indege zo ku yindi migabane nka Qatar Airways, Turkish Airways n’izindi, ahubwo ari uburyo bwo kunoza imikoranire. Ibi ngo bizatuma zibona abagenzi benshi zijyana mu bihugu bya kure sosiyete zo muri Afurika zitabasha kujyamo.

Uku kwihuza mu by’ubwikorezi bw’indege kwitezweho gufasha amasosiyete yo muri Afurika guhangana n’andi mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza