Icyangombwa cy’uko umuntu yakatiwe cyangwa atakatiwe n’inkiko cyatangiye gutangwa binyuze ku Irembo

Yanditswe na Iradukunda Serge
Kuya 9 Nzeri 2019 saa 03:05
Yasuwe :
0 0

Urwego rw’ubushinjacyaha bwatangaje ko bworohereje Abanyarwanda bakeneraga icyangombwa cy’uko umuntu yakatiwe cyangwa atakatiwe n’inkiko, kuko ubu bagiye kujya bagisaba ndetse bakagihabwa hifashishijwe urubuga rwa Irembo.

Mu busanzwe umuntu yasabaga iki cyangombwa akoresheje ikoranabuhanga ariko ubu azajya anagihabwa mu buryo bw’ikoranabuhanga, nk’uko byatangajwe mu kiganiro ubushinjacyaha bwagiranye n’itangazamakuru kuri uyu wa Mbere.

Ubu muntu wese ufite telefone igezweho cyangwa mudasobwa ifite internet anyuze ku rubuga rwa Irembo, ashobora gusaba ndetse agahabwa iki cyangombwa hifashishijwe ikoranabuhanga atiriwe agana ubushinjacyaha ngo bukimuhe mu ntoki.

Umushinjacyaha Mukuru Mutangana Jean Bosco, yavuze ko ubu buryo bw’ikoranabuhanga buzaruhura Abanyarwanda mu ngendo zitandukanye bakoraga, bubarinde gutonda umurongo aho uru rwego rukorera bashaka iki cyangombwa ku mpamvu zitandukanye.

Yagize ati “Hari imbogamizi nyinshi zishingiye ku itangwa ry’icyangombwa cy’uko umuntu yakatiwe n’inkiko cyangwa atakatiwe kuko mwabonaga ukuntu abantu baza bagatonda umurongo ahangaha ari abasaba akazi, ari abakenye ibindi byangombwa bisaba ko icyo cyemezo baba bagifite”.

Yongeyeho ko iki kije nk’igisubizo kuko Abanyarwanda bagiye bagaragaza ko inzira binyuramo ngo babone iki cyangombwa zigoranye kandi zitinda.

Ati “Byagendaga gahoro ndetse rimwe na rimwe abaturage bakabyinubira bakandika kuri za Twitter n’ahandi, turagira ngo tubabwire ko ubungubu icyo kibazo gikemutse kandi kigiye gutangira gutangwa mu buryo bw’ikoranabuhanga”.

Umuyobozi Mukuru wa Irembo, urubuga ruzajya rutangirwaho iki cyangombwa Keza Faith, yavuze ko uretse kuba ubu buryo bw’ikoranabuhanga buzorohereza abaturage buzanafasha leta kwirinda ikibazo cy’ibyangombwa byiganwa.

Ati “Icyo bivuze ntago ari ugufasha umuturage gusa ahubwo ni n’umutekano w’icyo cyangombwa kuko icyangombwa twandika hano tugaha umuntu biroroshye cyane ku cyigana bivuze ko undi muntu nawe ufite ubuhanga ashobora gushushanya ibyo ashaka akigana wa mukono yabonye ku cyangombwa cy’undi cy’undi akabona icyo yashakaga”.

Keza yongeyeho ko abaturage batuye mu bice by’icyaro badakwiye kubona iri koranabuhanga nk’imbogamizi kuko hari abakozi bakorana na Irembo babegereje bashobora kubafasha igihe bo baba batabashije kubyikorera.

Uzajya usaba iki cyangombwa azajya akibona mu minsi itatu nk’uko byari bisanzwe gusa ubushinjacyaha butanga icyizere ko uko iminsi izagenda iki gihe gishobora kugabanuka.

Ubuyobozi bwa Irembo buvuga ko ku bufatanye na Minisiteri y’ikoranabuhanga n’itumanaho buzakomeza gukorana n’inzego n’ibigo bya leta kugira ngo serivisi bitanga zijye mu buryo bw’ikoranabuhanga mu rwego rwo kugabanya ikoreshwa ry’impapuro kuko zangiza ibidukikije kandi kuzigana bikoroha.

Umushinjacyaha mukuru Mutangana Jean Bosco asanga ubu buryo bw'ikoranabuhanga buzaruhura abaturage gutonda umurongo n'ingendo bakoraga
Umukozi wa Irembo Rwagasana Leila yerekana inzira z'ikoranabuhanga umuntu azajya anyuramo kugira ngo ahabwe iki cyangombwa
Umuyobozi Mukuru wa Irembo, yavuze ko iri koranabuhanga rizafasha mu gukumira ibyangombwa by'ibyiganano
Abayobozi b'urwego rw'ubushinjacyaha n'ab'urubuga Irembo mu kiganiro n'Abanyamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza