Imaramatsiko ku myiteguro y’inama ya Commonwealth izabera i Kigali

Yanditswe na Cyprien Niyomwungeri
Kuya 13 Gicurasi 2019 saa 12:04
Yasuwe :
0 0

Tariki 20 Mata 2018, ni umunsi utazibagirana ku Rwanda, kuko ari bwo bwa mbere mu mateka yarwo byemejwe ko ruzakira Inama y’Abakuru b’Ibihugu byo mu Muryango w’Ibikoresha Ururimi rw’Icyongereza (Commonwealth) yo mu 2020.

Iyo nama izwi nka CHOGM (Commonwealth Heads of State and Government Meeting) iba buri myaka ibiri, iteganyijwe kubera mu Rwanda umwaka utaha mu gihe iheruka yakiriwe n’u Bwongereza ari nabwo buyoboye uwo muryango ubu.

U Rwanda nk’igihugu kimaze kwandika izina mu kwakira neza inama mpuzamahanga, gikomeje kwitegura n’iya Commonwealth, ngo izagende neza kandi itange umusaruro nk’uko byagenze ku zindi nama zikomeye rwakiriye zirimo n’iy’Abakuru b’Ibihugu bya Afurika yunze Ubumwe (AU).

Kugira ngo iyi nama itegurwe neza, u Rwanda rwashyizeho akanama k’Abaminisitiri gakurikirana imirimo y’akanama k’abatekinisiye kagizwe n’abanyamabanga bahoraho ba za Minisiteri n’izindi mpuguke zirimo kuyitegura.

Aka kanama kagabanyijemo kabiri aho hari igice kireba ibijyanye n’aho inama zizabera, amahoteli, gutwara abantu, kwiyandikisha, gutegura za Website n’ibindi. Hari kandi n’abategura ibyo abakuru b’ibihugu bazaganiraho muri iyo nama.

Mu kiganiro cyihariye IGIHE yagiranye na Amb. James Kimonyo ufatanyije na Ambasaderi w’u Rwanda mu Bwongereza, Yamina Karitanyi, mu gutegura by’umwihariko ibizaganirwaho n’abakuru b’ibihugu, yavuze aho u Rwanda rugeze rwitegura.

IGIHE: Commonwealth ni umuryango ugizwe n’ibihugu 53, hagendewe kuki ngo u Rwanda ruhabwe kwakira inama nk’iyi?

Amb. Kimonyo: Ntabwo babyuka ngo bahe igihugu kwakira inama hari byinshi bareba, kuko hari ikimeze nk’Itegeko Nshinga rya Commonwealth, harimo ibintu byinshi bareba ibihugu bigomba kuba byujuje.

Iyo usuzumye u Rwanda aho ruvuye n’ibyo rugezeho, usanga mu ngingo zitandukanye z’amahame remezo y’umuryango, rwujuje ibyangombwa byinshi cyane ku buryo n’igihe bashyigikiraga ko rwakira inama bavugaga ko nta mpamvu babona u Rwanda rutakwakira inama kuko ingingo zose yaba ari umutekano, guteza imbere abaturage barwo, imiyoborere myiza, guteza imbere ubukungu, ishoramari n’ubucuruzi, basanze rubikwije.

IGIHE: Muri Werurwe impuguke za Commonwealth zatangaje ko u Rwanda rugeze aheza rwitegura inama ya CHOGM 2020, ni ibiki bishimiye bimaze gushyirwa ku murongo?

Amb. Kimonyo: Impuguke zo mu bunyamabanga bwa Commonwealth zaradusuye zisanga mu rwego rw’amahoteli, ikibuga cy’indege cya Kanombe, aho inama zizabera basanga u Rwanda ruhagaze neza nta mpungenge bafite ko ruzashobora kwakira iyo nama.

Bageze mu Rwanda basanze uhereye kuri Kigali Convention Centre, amahoteli mashya n’ibindi basanga iyo nama tuzayakira. Ariko hari ibindi tugomba kunoza nko kongera umubare w’ibyumba, twongere imihanda aho tubona ubucucike bw’imodoka, ibi Minisiteri y’Ibikorwa Remezo irimo kubikora kugira ngo iyo nama tuzajye kuyakira twiteguye neza.

Nta mpungenge dufite kuko twakiriye n’inama ya Afurika yunze Ubumwe (AU), kandi ni ibihugu 54 n’uyu muryango ufite 53 urumva ko bidatandukanye cyane.

Inama iheruka ya Commonwealth yabaye ku wa 19 Mata 2018

IGIHE: Ibijyanye n’ibyo iyi nama izaganiraho bigeze he bitegurwa dore ko ari cyo gice cy’ingenzi cy’inama?

Amb. Kimonyo: Ubundi mu nama zitegurwa n’iyi miryango mpuzamahanga, usanga ubundi bateguye ibyigwaho twebwe tukakira inama ariko mu muryango w’ibihugu bikoresha Icyongereza ntabwo ari ko bimeze, kuko igihugu cyakira ni nacyo gitegura ibizigwaho.

Twebwe nk’igihugu twahisemo ibintu bitanu bizigwaho. Hari ibijyanye n’imiyoborere myiza n’uburenganzira bwa muntu, ikoranabuhanga na Inovasiyo, urubyiruko, ibidukikije n’ubucuruzi n’ishoramari.

Uretse kureba ko ibi bintu bifitiye akamaro igihugu cyacu, twabanje no kureba niba n’ibindi bihugu bigize uyu muryango izo ngingo ari ingingo zibashishikaje bitewe n’akarere igihugu kirimo. Usanga nka biriya bihugu bya turiya turwa duto duto usanga bashishikajwe cyane n’ibintu bijyanye n’ibidukikije, kubera ibibazo bijyanye n’imyuzure no kuma kw’inyanja.

Tugenda tureba n’ibindi bihugu icyo bishaka. Mu bijyanye n’ubucuruzi ibihugu nk’u Buhinde, za Bangladesh, usanga nabo bashaka ko byaganirwaho. Impamvu ni uko izo ngingo zose iyo uziteguye ntizumvikanweho n’ibihugu ni ukuvuga ko inama ntakiba kiri buvemo kuko mugomba kugira ingingo abakuru b’ibihugu bafataho imyanzuro izashyirwa mu bikorwa.

Inyandiko ya mbere twarayiteguye tuyishyikiriza akanama ngishwanama k’abaminisitiri, kuri 28 Gashyantare twayohereje mu bunyamabanga bukuru bw’umuryango i Londres, kugira ngo bayisuzume kuko baba bafite impuguke nyinshi kandi bamaze imyaka myinshi bakurikirana imitegurire y’iyi nama, ku buryo basuzuma inyandiko bakagira ibitekerezo bongeramo bashingiye ko baba bazi icyo buri gihugu cyifuza.

Barayisuzumye bashyiraho ibitekerezo barayitwoherereza igera mu Rwanda kuwa 25 Mata, icyo turimo gukora ni uko ibitekerezo byatanzwe turimo kubyongera muri iyo nyandiko nibirangira iganirweho n’akanama ngishwanama k’abaminisitiri yongere koherezwa i Londres, inozwe kugira ngo yohererezwe ibihugu byose uko ari 53.

Bitewe n’uko ibi bihugu byose bihagarariwe i Londres, ubunyamabanga bukuru bwa Commonwealth buzayohereza mu bihugu binyuze muri izi ambasade, ibihugu byose biyiganireho muri za Minisiteri zabyo, batange ibitekerezo bayigarure i Londres, bisubizwe u Rwanda rurebe ibyongewemo.

Ibitekerezo bizaba byajemo, muri Nzeri hazaba hari inama y’Umuryango w’Abibumbye, mu gihe izaba iba hazabaho inama yihariye y’Abaminisitiri b’Ububanyi n’Amahanga b’ibihugu bya Commonwealth, bayiganireho.

Muri Kamena kugeza Nzeri, u Rwanda ruzaba ruganira n’ibihugu ndetse hari ibyo Minisitiri w’Ububanyi n’Amahanga azasura, kugira ngo baganire niba ibyo twateguye tubyumvikanaho kuko amateka atwereka ko byagiye bigorana iyo mutabiteguye kare ngo munabiganireho, mugera mu nama ugasanga igihugu kirifashe, ikindi kirifashe kuko mutashatse umwanya hakiri kare ngo izo mpaka zigibwe mu nyandiko hajyemo ibyo mwemeranyaho.

Nyuma ya Nzeri inyandiko y’ibizaganirwaho mu nama imaze kuganirwaho na ba Minisitiri b’Ububanyi n’Amahanga izasubizwa u Rwanda. Kuva muri Nzeri kugeza Gicurasi umwaka utaha, hazabaho ikusanyabitekerezo ku byo abantu bifuza.

Tuzaba tuganira tureba uko twakoroshya ubucuruzi hagati yacu, dufite isoko ry’abantu miliyari 2.8, ariko ugasanga haracyarimo inzitizi z’imigenderanire n’uburyo ibicuruzwa bigera kuri iryo soko.

Hagati muri Gicurasi nibwo hazaba habonetse inyandiko ya nyuma izavamo imyanzuro abaperezida bazafata icyo gihe mu nama izaba kuwa 22-27 Kamena 2020.

IGIHE: Mu gutegura ibizaganirwaho, u Rwanda rurarebwaho mu buhe buryo?

Amb. Kimonyo: Nubwo tuzakira inama umwaka utaha, nyuma yo kuyakira Perezida Kagame azaba umuyobozi wa Commonwealth imyaka ibiri ikurikira ni ukuvuga kugeza 2022, aho azahererekanya ububasha n’ikindi gihugu kizakira inama izakurikiraho ari cyo Samoa.

Inama nirangira, iyo myanzuro hari ibizavamo bishyirwe mu bikorwa, nk’u Rwanda turabireba mu buryo bwacu busanzwe bimeze nk’imihigo kuko Perezida wacu azaba ayoboye imyaka ibiri, iyo myanzuro izaba yafashwe ni nkaho azaba abibazwa kuko agomba gutanga raporo y’ibyakozwe mu nama izaba ikurikira.

Turashaka gufata imyanzuro y’ibintu bifatika bizashyirwa mu bikorwa bigahindura imibereho y’abaturage bo muri uwo muryango ariko natwe tureba niba ibyo dusanzwe dukeneye gukorera abaturage bacu bizaba bikubiye muri ibyo.

Amb. James Kimonyo ari mu bashinzwe gutegura iyi nama

IGIHE: Inama izaba mu buhe buryo, iziyishamikiyeho zo biteganyijwe gute?

Amb. Kimonyo: Iriya nama kuko izatangira kuri 22-27, ni icyumweru cyose, ntabwo abakuru b’ibihugu baba bicaye icyumweru cyose ahantu hamwe. Habanza inama z’amahuriro ane; iy’ubucuruzi, urubyiruko, abagore n’ihuriro rya za sosiyete sivile.

Aya mahuriro aba ari manini cyane afite abantu 1500, izindi 1000, ku buryo zimara iminsi ibiri cyangwa itatu ziganira ku ngingo zizireba. Imyanzuro yazo nayo igezwa ku nama y’abakuru b’ibihugu itangira kuwa Kane kugeza kuwa Gatandatu.

IGIHE: Biteganyijwe ko u Rwanda ruzamurika ryari ibijyanye n’inama byose ku buryo uwashaka no kuyitabira yakwiyandikisha?

Amb. Kimonyo: Mu Ukwakira uyu mwaka hazabaho gutangiza ku mugaragaro aho u Rwanda ruzerekana Logo, ikirangantego cy’inama, website, ushaka kwiyandikisha ni aha ajya, ushaka kugira icyo abaza, amahoteli n’ibindi.

Turashaka kubikora mbere nibura tube dufite amezi umunani imbere n’ahantu hari icyo twumva tutanogeje tube dufite umwanya wo kubikoraho kugira ngo ntibidutungure.

IGIHE: Ni izihe nyungu u Rwanda rwakwitega kuvana muri iyi nama?

Amb. Kimonyo: Igihugu cyacu ukurikije aho cyavuye, hari ababa bakivuga uko kitari, hari ibyandikwa bitari byo. Iyi nama izamenyekanisha izina ry’u Rwanda n’ibyo rugezeho n’aho ruhagaze ku ruhando mpuzamahanga kuko izaba irimo abantu bakomeye nka bariya bo mu bwami bw’u Bwongereza, ibinyamakuru mpuzamahanga.

Nubwo hari ibizigwaho mu nama, hari ibyateganyijwe by’uko abazaza muri iyi nama hari n’ibindi byiza nyaburanga u Rwanda rufite bazasura, kuko hazaza n’abanyamakuru bazerekana za pariki zacu, ibihangano byacu n’ibindi.

Turateganya kwakira abantu bari hagati ya 5000 na 8000, ukurikije uko u Rwanda ruzwi n’uko bagenda barusura. Birumvikana ko ari abacuruzi, amahoteli, restaurant, gutwara abantu, mbese abantu bose bari muri za serivisi.

Iki cyumweru cyose gifite abantu bangana gutya, ari muri za serivisi, abacuruza ibihangano, abafite amahoteli, imodoka n’ibindi bakora, icyo gihe byanze bikunze hari amadevize azasigara mu gihugu.

Biriya abakuru b’ibihugu bazaganiraho bagafataho n’imyanzuro bivamo za gahunda n’imishinga. Iyo igihugu kibaye inkwakuzi kikihuta kivanamo imishinga kandi iyo igejejwe kuri abo bagize imiryango y’abaterankunga usanga bayibonera amafaranga.

IGIHE: Abantu hagati ya 5000 na 8000 ni benshi, u Rwanda rwiteguye neza ku bijyanye n’amahoteli n’ibindi?

Amb. Kimonyo: Icyashimishije cyane n’abavuye i Londres muri Commonwealth, ni uko basanze ubushobozi dufite ufashe amahoteli manini, za motel, amacumbi ari ku rwego rwo hejuru (nk’ayari ahahoze Radiyo Rwanda), iyo bayashyizemo basanga nta kindi cyumba kiyongereyeho iyo nama twayakira.

Hari n’abantu batanga inzu (Villa), inzu y’ibyumba bitanu cyangwa birindwi, ariko ibyo ntabwo turabigeraho kuko abo mu kigo cy’igihugu gishinzwe gutegura inama (RCB), bavugaga ko ibi ubyiyambaza iyo ubona umubare ugiye kukurengana ariko uko bimeze ubu dufite ubushobozi bwo kwakira uyu mubare ukurikije umubare w’ibyumba dufite udashyizemo ibindi birimo bizamuka uyu munsi.

Dufite icyizere rwose nta bwoba dufite bwo kwakira iyi nama. Dufite aho gukorera inama, hari Kigali Convention Centre niho inama nkuru izabera, hari Kigali Conference&Exhibition Village, Marriot Hotel, Serena Hotel, hose hazajya hakira inama.

IGIHE: Abanyarwanda barasabwa iki ngo iyi nama izagende neza?

Amb. Kimonyo: Nk’uko bisanzwe mu muco wacu, iyo ugize umushyitsi nawe ugira agashya. Ni ugusaba ko tugira akarusho uri muri serivisi wese, uri muri hoteli, utwara imodoka, muri restaurant, tugire ibintu byiza ku buryo n’abashyitsi bacu basanga twiteguye koko.

Ikindi ni ukumva akamaro k’uyu muryango n’ibizaba byaganiriweho abaturage bakabitangaho ibitekerezo kuko tuzagira ibiganiro mbwirwaruhame, kugira ngo twumve icyo abaturage bacu batekereza. Bazadufashe kwitabira ayo mahuriro, ibiganiro no kwakira abashyitsi neza.

Inama ya Commonwealth yitabirwa n'abayobozi bakomeye baturuka mu bice bitandukanye by'Isi
Ubwo Perezida Kagame yitabiraga inama ya Commonwealth muri Mata 2018
Ni ibintu bikomeye kuba u Rwanda rwaragiriwe icyizere cyo kwakira inama ya Commonwealth mu 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza