Imvo n’imvano ku makimbirane ya Meya wa Ngoma n’uwari umushoferi we umushinja kumukubita ‘mucako’

Yanditswe na Hakizimana Jean Paul
Kuya 3 Kanama 2018 saa 03:59
Yasuwe :
0 0

Hashize iminsi humvikanye inkuru ya Meya w’Akarere ka Ngoma wakubise ‘mucako’ uwari umushoferi we ndetse akamwirukana atamuhembye umushahara we w’amezi agera ku icumi n’imyenda yari amubereyemo byose birenga ibihumbi 900 Frw.

Amakimbirane y’uyu mushoferi witwa Rutsindintwarane Jean Bosco n’Umuyobozi w’Akarere ka Ngoma, Aphrodis Nambaje, ajya gutangira; ngo Meya yamushinjaga ko amukereza ku kazi hanyuma umunsi umwe ‘ngiye kumusobanurira impamvu akuramo mucako ayimponda ku gahanga’.

Aba bombi bari bakoranye imyaka igera kuri itanu ku buryo ngo bizeranaga ukwezi kwashira umushoferi ntahembwe, akumva nta kibazo dore ko yari afite ubundi buryo butuma abaho atarambirije ku mushahara.

Mu kiganiro uyu mushoferi yagiranye na IGIHE yagize ati “Umuntu mumaranye imyaka irenga ine, hageraho hakazamo kwizerana ku buryo anakugeramo ukwezi kumwe hakaza n’ukwa kabiri ukumva nta kibazo kuko uba uvuga uti ashobora no kuzayampera rimwe akaba aribwo angirira akamaro.”

Ibintu byarakomeje ukwezi kumwe kugashira, ukundi kukihirika umushoferi asanga aberewemo umwenda w’amafaranga agera ku bihumbi 900 Frw. Ngo byageze aho ashaka kureka akazi ariko yakwibuka amafaranga meya ahembwa n’ayo we amuhemba, akumva ko iteka n’iteka azishyurwa.

Tariki 31 Kamena 2018, umubano n’ukwizerana kw’aba bombi byajemo agatotsi ubwo umushoferi yajyaga gutwara shebuja, yamugeraho agasanga yarakaye akamubwira ko yamukerereje.

Uwo munsi ngo meya yari afite gahunda yo kujya gusura abaturage, aho yari yabwiye umushoferi ko amugeraho saa kumi undi akarenzaho iminota 20 kubera imbogamizi yari yahuye nazo mu nzira.

Kuri uwo munsi, uyu mushoferi ngo yagombaga kubanza kujya kogesha imodoka ariko kuko nta mafaranga shebuja yari yamuhaye, biba ngombwa ko ajya kuri banki gushaka aye ngo abe ariyo akoresha; bimuviramo gukererwa gutyo.

Ati “Yarambwiye ngo saa kumi hari ahantu ari bujye, njya kogesha imodoka. Mbanza kujya gushaka amafaranga kuri banki kuko we ntayo yari yampaye yo kuza kwishyura. Icyo gihe numvaga nampamagara mpita ngenda.”

“Yampamagaye saa kumi na 20 kuko ndabyibuka neza saa kumi n’igice ntabwo zari zakageze. Twahuriye imbere y’akarere arambwira ati tugiye Karama. Twavuyeyo hafi saa tatu, ajya muri St. Joseph [hotel] avayo nka saa tanu na 20 z’ijoro. Tugeze hafi y’iwe arambwira ngo ko itara ryatse imodoka isigaye inywa cyane? Nti none se ko ari wowe uyishyiramo nzi uko mwanyoye? Nti sinabasha kugusobanurira mu gihe atari njye washyizemo lisansi.”

Ngo bakomeje kubijyaho impaka meya abaza impamvu lisansi bigaragara ko igiye gushira, amubaza aho yari yagiye byanatumye akererwa kumugeraho ku manywa.

Mbere y’uwo munsi ngo nibwo imodoka yari yashyizwemo lisansi ariko Meya yari kumwe n’undi mushoferi aho bari bashyizemo iy’ibihumbi 20 Frw.

Meya ngo yakomeje kubaza umushoferi impamvu lisansi ishize vuba mu modoka, akamubaza niba aho yogesheje baba bayivomye cyangwa niba hari izindi ngendo yakoze.

Bombi bakomeje kujya impaka umushoferi avuga ko atazi ingano y’iyari yashyizwemo, Meya nawe avuga ko yakoreshejwe nabi ni uko ngo ahita ‘akuramo mucako ajya kuyinkangisha ayimponda ku gahanga’.

Umushoferi yakomeje agira ati “Yayinkubise ku gahanga, nshaka kuyimwaka, arasohoka nanjye ndasohoka tujya hanze y’imodoka.” Bombi bakomeje gushyamirana, ariko biza kurangira bikijije, umwe afata inzira ye aragenda undi nawe asigara mu rugo rwe.

Nyuma y’ibyumweru bibiri amwirukanye, Meya yatangiye kwishyura Rutsindintwarane amafaranga yose yari amurimo. Aya arimo imishahara n’andi ngo yajyaga akoresha ku modoka.

Uyu mushoferi yahamirije IGIHE ko ku wa Mbere tariki 16 Nyakanga ari bwo yishyuwe imishahara y’amezi icumi n’ayandi yari yaragiye aguriza uyu muyobozi w’Akarere mu bihe bitandukanye.

Bwa mbere ngo yamuhaye amafaranga ibihumbi 800 Frw ahwanye n’amezi icumi yari amurimo kuko yakoreraga ibihumbi 80 Frw ku kwezi.

Yungamo ati “Yananyishyuye n’andi nagendaga muguriza ku ruhande ahwanye n’ibihumbi 142 Frw. Aya ni ayo namuhaga tugiye nko kogesha imodoka, kuyikoresha n’ayo nari naramutije.”

Meya Nambaje ngo yishyuye uyu mushoferi mu byiciro bibiri, aho icya mbere yamuhaye ibihumbi 830 Frw tariki ya 12 Nyakanga, ku nshuro ya kabiri amuha ibihumbi 112 Frw ku wa 16 Nyakanga 2018.

Meya yemeye ko agendana mucako ariko ko atayikubise umushoferi

Umuyobozi w’Akarere ka Ngoma, Nambaje Aphrodis, yavuze ko icyatumye atandukana n’uyu mushoferi ari ukutubahiriza igihe no kumukerereza mu kazi.

Agaruka ku byabaye tariki ya 30 Kamena agira ati “Twari dutandukanye nka saa munani mubwiye ko yafata iminota mike akajyana imodoka mu kinamba kuko yasaga nabi, saa kumi akaza kumfata mu rugo nkajya gutanga ikiganiro mu ishuri rya Kigarama ku bari bari kurangiza inyigisho z’irondo ry’umwuga.”

“Ntiyaje kumfata nzamuka n’amaguru njya kureba icyo yabaye ngiye nsanga ari wenyine atari kumwe n’imodoka kandi nari naramubujije kuyisigira abanamba bonyine kuko bigeze kuyibamo telefoni. Yishe igihe cyanjye nari butangiremo ikiganiro bituma nkererwa.”

Meya ngo ako kanya ntiyahise amubaza impamvu yakerewe ahubwo yabimubajije mu gutaha. Ati “Uburyo yansobanuriye ntabwo byanyuze kuko nari narabimubujije kenshi kunsigira imodoka mu kinamba. Ni ukuvuga ngo nabyo yari yabirenzeho ndetse anankerereza mu kazi. Aya makosa yose yajyaga ayakora kenshi nkamubwira nti hari umunsi umwe tuzagira dutya tubipfe.”

Ku bijyanye no kumukubita mucako, Meya avuga ko bitigeze bibaho kuko umushoferi yasabwe gusohoka mu modoka ku neza agatanga imfunguzo; nawe nyuma yo kubitekerezaho ku nshuro ya gatatu abisabwa aza kubyemera arasohoka.

Gusa uyu muyobozi yemera ko koko mu modoka ye harimo mucako nk’igikoresho cya siporo kuko yakinnye karate akaba ari n’umuntu uyikunda mu gihe umushoferi we ayisobanura nk’igikoresho cy’ubwirinzi.

Ati “Ni agakoresho dukoresha siporo. Ni mucako ndanayifite n’ubu, turayifashisha muri siporo, ntabwo nkora siporo muri rusange, iyo umuntu yiherereye mu cyumba ashobora gukora pompage ashobora kunanura amaboko […] umuntu ashobora kuyifashisha mu rwego rw’imikino, ashobora guhura n’ikindi kintu kikamusagarira.”

“Kuyitwara mu modoka ni uko akenshi dukunda kujya mu mirima cyane mu masaha y’ijoro, ni ukuvuga ngo niba ugeze mu rutoki urimo utemberamo nimugoroba, ushobora gusakiranamo n’igisimba cyangwa n’ikindi kintu. Ntabwo tuyitwara kuko hari indi ntambara yindi tugiye kurema.”

Naho ku bijyanye no kuba yaratinze kumwishyura, ngo byatewe ahanini n’amahitamo y’umushoferi wamubwiraga ko yifuza ko amafaranga yazayahabwa icya rimwe ku buryo yagira icyo amumarira.

Ati “Yifuzaga ko nzamumbera rimwe amafaranga imbumbe nk’ibihumbi magana 800 cyangwa miliyoni kuko yifuzaga kugura ikibanza akubaka. Yajyaga ambwira ko iyo nyamuhaye ari ukwezi kumwe ntacyo amumarira kandi ko afite ubundi buryo bwo kubaho.”

Muri Kamena uyu mwaka ngo yashatse kumwishyura, undi aramubwira ngo nabe aretse azayamuhere rimwe muri Kanama.

Usibye ikibazo cyo kutubahiriza amasaha y’akazi, ngo nta kindi yigeze atumvikanaho n’uyu wari umushoferi dore ko na mbere y’uko bashwana kuri uriya munsi yari afite gahunda yo kumuganiriza ku mpamvu zituma amukereza mu kazi.

Umuyobozi w’Akarere ka Ngoma, Aphrodis Nambaje, yahakanye ko yigeze akubita uwari umushoferi we / Ifoto: Internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza