Ingabire wa Transparency yavuze ku kibazo cy’abaribwa n’ingona bavoma Nyabarongo

Yanditswe na Evariste Nsengimana
Kuya 16 Kanama 2017 saa 05:34
Yasuwe :
0 0

Umuryango wita ku kurwanya ruswa n’akarengane, Transparency International Rwanda (TIR), wasabye ko Leta yashyiraho ingamba zihamye zo kurinda abaturage n’ibidukikije, kuko byose ari ibinyabuzima bikenewe bigomba kuzuzanya.

Mu minsi ishize, mu Murenge wa Mageragere mu Karere ka Nyarugenge havuzwe ikibazo cy’abaturage bariwe n’ingona bagiye kuvoma amazi yo gukoresha mu ngo ku mugezi wa Nyabarongo.

Abaturage baturiye uyu mugezi by’umwihariko abo mu Kagari ka Kavumu mu Murenge wa Mageragere, mu gace katagerwamo n’amazi meza bakunze kugaragaza impungenge z’iki kibazo bavuga ko kiri mu bituma hari abaribwa n’ingona.

Ubwo yatangizaga umushinga wo guhangana n’imihindagurikire y’ibihe wa miliyoni zisaga 90 y’u Rwanda kuri uyu wa 16 Kanama 2017, Umuyobozi wa TI-Rwanda, Ingabire Marie Immaculée, yavuze ko Leta ikwiye gukora ibishoboka byose ikarengera ibinyabuzima byose.

Yagize ati “Ubundi ingona nazo zirakenewe, ibinyabuzima byose birakenewe hakaza kuzamo ibintu by’ibidukikije bigomba kubungwabungwa. Ubundi icyo tubivugaho, ni uko Leta ikwiye gukora ibishoboka byose ikegereza abantu ibyo bakerera byose bituma batajya kugabangamira ibidukikije cyangwa ngo nabyo bibabangamire.”

Yakomeje avuga ko iyo bariya bariwe n’ingona mu minsi ishize baba bafite ahandi bavoma zitaba zarabariye kuko zabafashe bagerageza kuvoma muri Nyabarongo.

Abariwe n’ingona mu minsi ishize barimo umugabo wari mu kigero cy’imyaka 27 witwa Tugirimana Jean Pierre yishe ku wa 12 Kanama n’umugore w’imyaka 54 witwa Nyirampakaniye Sperata, ku wa 27 Nyakanga 2017. Aba bombi bari batuye mu Kagari ka Kavumu kataragerwamo n’amazi meza.

Ubuyobozi bw’Akarere ka Nyarugenge buheruka kwizeza abaturage ko ikibazo cy’amazi kiri hafi gukemuka burundu, bakareka kuvoma muri Nyabarongo cyane ko mu duce tumwe na tumwe twa Mageragere yatangiye kuhagera aturutse mu muyoboro wa WASAC.

Abaturage batuye ahatagera umuyoboro wa WASAC bazagezwaho amazi ku bufatanye na Kompanyi ya Water Access Rwanda yatangiye kubaka amavomero ku nkengero za Nyabarongo mu tugari twa Ntungamo, Kavumu na Runzenze.

Umuyobozi wa TI-Rwanda, Ingabire Marie Immaculée, yavuze ko Leta ikwiye gukora ibishoboka byose ikarengera ibinyabuzima byose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza