Inzobere zagaragaje ko Politiki yo guhangana muri Afurika ntacyo izageraho

Yanditswe na Ferdinand Maniraguha
Kuya 15 Gicurasi 2019 saa 06:22
Yasuwe :
0 0

Inzobere zitandukanye zagaragaje ko Politiki zishingiye ku guhangana ntacyo zizageraho muri Afurika kuko zitaberanye n’imikorere n’imiterere y’uwo mugabane.

Byatangajwe kuri uyu wa Gatatu ku munsi wa nyuma w’Inama yiga ku mutekano, yaberaga mu Ishuri Rikuru rya Gisirikare i Nyakinama mu Karere ka Musanze.

Mu kiganiro cyibanze kuri Politiki y’ubwumvikane ugereranyije na Politiki yo guhangana muri Afurika cyatanzwe n’Umwongereza Andrew Micthell wabaye umudepite mu Bwongereza, umunya-Kenya Prof PLO Lumumba na Minisitiri w’Ubutegetsi bw’igihugu Prof Shyaka Anastase, bagaragaje ko mu gihe ibihugu bya Afurika bitishatsemo imiyoborere ijyanye n’uko biteye, hazahora amakimbirane n’ubukene.

Prof Lumumba yavuze ko imiyoborere igaragara henshi muri Afurika ishingiye kuri politiki yo guhangana yavuye mu mahanga, iza itaje gukemura ibibazo bya Afurika.

Ati “Ni politiki yazanye amacakubiri, aho umwe iyo atabonye umwanya w’ubuyobozi ashaka uburyo yakwikiza uwabugiyeho. Agakiza karambye ka Afurika kazaturuka mu kwirinda izo politiki zo guhangana. Icyo abaturage bagaragaje ko bashaka ni ubuyobozi bagiramo uruhare, bwemera kubazwa ibyo bushinzwe.”

Lumumba yavuze ko bamwe mu bayobozi ba Afurika bibeshya ko kubaka imiturirwa cyangwa kuba nta ntambara ihari bisobanuye ko umutekano n’imiyoborere myiza biganje.

Ati “Abantu bagomba kumenya ko amahoro atari uko nta ntambara ihari ahubwo birenze ibyo. Iterambere ntabwo ari imiturirwa. Njye nzemera ko hari amahoro ninjya ku meza y’umuturage utuye mu cyaro nkabona hari ibyo kurya, yagera ku kigo nderabuzima akavurwa.”

Minisitiri Shyaka yavuze ko ubusanzwe ubuyobozi bwiza bwose bukwiriye kuba bushyira imbere abaturage, bitandukanye na Politiki yo guhangana.

Yavuze ko Politiki yo guhangana u Rwanda rwayinyuzemo guhera muri za 1959 kugeza mu 1994 nyamara ngo nta cyiza cyavuyemo atari urupfu.

Ati “Ubwo buryo bwatumye umutekano w’igihugu uburiramo kuko twatangiye kubara abapfuye mbere yo kubara amajwi yavuye mu matora. Imiyoborere nk’iyo ntabwo yari igamije iterambere. Baravugaga ngo ntabwo ubutegetsi bwanjye buzakomera kanaka naba akiriho, ngo nimwica nibwo ndabaho.”

Shyaka yavuze ko Guverinoma y’Ubumwe yagiyeho nyuma ya Jenoside yakorewe Abatutsi, yasanze politiki nziza ibereye abanyarwanda ari iyo kumvikana, imitwe ya politiki ikajya ihura ikaganira ku bibazo bihari aho guhangana.

Yavuze ko byatanze umusaruro kuko u Rwanda rumaze imyaka isaga 20 nta bibazo by’amahoro n’umutekano rufite.

Andrew Mitchell yavuze ko urebye uko Isi ihagaze ubu, guhangana no kwirebaho kw’ibihugu bikabije kandi aho biganisha atari heza.

Yavuze ko ari igihe “cyo kwisuzuma kuko Politiki igamije inyungu rusange yasenyutse, ukurikije ubuzima turimo nta wo kuyirengera uhari. Politiki iriho uyu munsi nta cyizere itanga ko ibyagiye biba mu gihe cyashize bitazongera kuba.”

Icyakora, Mitchell yavuze ko hari ibindi bikorwa bishimije cyane cyane muri Afurika, nk’ibiri gukorwa n’Umuryango wa Afurika Yunze Ubumwe byo guteza imbere ubuhahirane bw’ibihugu aho kwihugiraho.

PLO Lumumba yavuze ko mu gihe Afurika izakomeza gushyira imbere guhangana, bizakomeza guha urwaho abanyamahanga biteguye kuyibyaza umusaruro.

Ati “Tugomba gusubira ku bya kera tukabivanamo amasomo. Ubwiza bwose ibyavuye mu mahanga byaba bifite bugomba kubanza kugenzurwa ko bujyanye na Afurika.”

Abayobozi batandukanye haba mu ngabo no muri Guverinoma bakurikiye ibiganiro
Andrew Mitchell yavuze ko urebye uko isi ihagaze ubu, guhangana no kwirebaho kw’ibihugu bikabije kandi aho biganisha atari heza
Hatanzwe ikiganiro cyibanze kuri Politiki y’ubwumvikane ugereranyije na Politiki yo guhangana muri Afurika
Minisitiri Shyaka yavuze ko ubusanzwe ubuyobozi bwiza bwose bukwiriye kuba bushyira imbere abaturage, bitandukanye na Politiki yo guhangana.
Minisitiri w'Ingabo Maj Gen Albert Murasira asoza inama yiga ku mutekano yari iteraniye i Nyakinama
Prof Lumumba yavuze ko imiyoborere igaragara henshi muri Afurika ishingiye kuri politiki yo guhangana yavuye mu mahanga, iza itaje gukemura ibibazo bya Afurika
Shyaka yavuze ko Guverinoma y’Ubumwe yagiyeho nyuma ya Jenoside yakorewe Abatutsi, yasanze politiki nziza ibereye abanyarwanda ari iyo kumvikana
Umuyobozi w'Ishuri Rikuru rya Gisirikare, Maj Gen Jean Bosco Kazura yavuze ko ibyagiriwe i Nyakinama bizafasha mu gusigasira umutekano muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza