Iterambere rikomeye ry’ubucuruzi bw’u Rwanda mu myaka itanu ishize

Yanditswe na Cyprien Niyomwungeri
Kuya 11 Nyakanga 2019 saa 08:32
Yasuwe :
0 0

Minisitiri w’Intebe Dr Edouard Ngirente, yagaragaje ko hari byinshi byagezweho mu rwego rwo kwagura no guteza imbere ubucuruzi bw’u Rwanda yaba imbere mu gihugu no mu mahanga, by’umwihariko ibyoherezwa mu mahanga bikaba byariyongereye bitewe n’ishyirwa mu bikorwa rya Politiki y’ibikorerwa mu Rwanda (Made in Rwanda).

Kuri uyu wa Kane nibwo Dr Ngirente yagejeje ku Nteko Ishinga Amategeko, Imitwe yombi ibikorwa bya Guverinoma mu rwego rw’Ubucuruzi.

Ubucuruzi bw’u Rwanda bugizwe n’ubw’ibikomoka ku buhinzi, inganda n’ubucuruzi bwa serivisi. Hari ubucuruzi n’amahanga burimo ibyoherezwa mu mahanga ari byo icyayi, ikawa, amabuye y’agaciro, indabo, imboga, matola n’ibindi n’ibitumizwa mu mahanga birimo cyane cyane ibikoresho by’ibanze bikenerwa buri munsi nk’ibiribwa, ibinyobwa, imyambaro n’ibindi.

Hari kandi ibikoreshwa mu bwikorezi nk’imashini zikora imirimo inyuranye, ibikoreshwa mu bwubatsi n’ibindi nka sima n’ibyuma bikoreshwa mu kubaka n’ibitanga ingufu cyane cyane ibikomoka kuri peteroli.

Igipimo mpuzamahanga cyerekana aho igihugu gihagaze mu rwego rwo kunoza ibikwa n’ihererekanywa ry’ibicuruzwa (World Bank logistic performance index - LPI) cyerekana ko mu 2018, ku bihugu 160 u Rwanda rwari urwa 57 ruvuye ku mwanya wa 62 muri 2016.

Iki gipimo kandi cyerekana ko mu rwego rwo kunoza ibikwa n’ihererekanywa ry’ibicuruzwa, mu karere u Rwanda ari urwa mbere.

Mu rwego rwo koroshya ubucuruzi n’ishoramari, Raporo ya Banki y’Isi yerekana aho igihugu gihagaze mu rwego rwo koroshya ubucuruzi n’ishoramari, igaragaza ko u Rwanda ari urwa mbere mu karere (EAC).

Iyo raporo kandi igaragaza ko u Rwanda ari urwa kabiri muri Afurika; rukaba n’urwa 29 ku Isi ruvuye ku mwanya wa 41 rwariho muri raporo y’umwaka ushize wa 2018.

Ibikorwa remezo mu bucuruzi byitaweho

Minisitiri w’Intebe Dr Ngirente yavuze ko mu guteza imbere ubucuruzi n’ibihugu bituranye n’u Rwanda, mu myaka itatu ishize hubatswe amasoko atanu agamije guteza imbere ubucuruzi bwambukiranya imipaka ari yo Cyanika, Rubavu, Karongi, Rusizi n’Akanyaru.

Hagamijwe kandi kunoza serivisi zihabwa abinjira n’abasohoka mu Rwanda, mu myaka 10 ishize ibiro by’imipaka bitandatu harimo; Rusumo, Kagitumba, Ruhwa, Nemba, Rubavu na Gatuna.

Mu gufasha abacuruzi n’abahinzi kubona aho babika ibicuruzwa byabo, hubatswe ububiko busanzwe 89 burimo ububiko bukonjesha 52. Ubu mu Rwanda hari amasoko yubatse 520. Hubatswe kandi amakusanyirizo y’amata 126. Mu 2018 hubatswe amakusanyirizo mato 100, ay’ibirayi 14, naho 29 azubakwa mu 2019/2020.

Mu rwego rwo koroshya ubuhahirane no kugeza ibicuruzwa ku isoko, Leta y’u Rwanda ikomeje gushyira imbaraga mu kubaka imihanda. Ubu, uburebure bw’imihanda yose mu gihugu ni kilometero 38803.4.

Ku birebana n’ingo zifite amashanyarazi, u Rwanda rwavuye kuri 20% muri 2013 rugera kuri 46.5% muri 2018, bingana n’izamuka rya 133%. Abanyarwanda bagerwaho na murandasi basaga 52%, 95% by’igihugu bigerwaho n’umuyoboro wa murandasi yihuta; mu gihugu hose hagera 4G, Abanyarwanda basaga 77% batunze telefoni zigendanwa.

Ishusho y’ubucuruzi ugereranyije 2013 na 2018

Agaciro k’ibyacurujwe mu rwego rw’inganda na serivisi mu 2018 ugereranyije na 2013, kiyongereye ku kigero kingana na 197%. Ku nganda gusa, ugereranyije 2018 na 2013, agaciro k’ibyacurujwe kiyongereyeho 76.5% bitewe nuko ibikorerwa mu nganda byiyongereye ku kigero cya 100.3%, ubwubatsi bwiyongereyeho 84.3%.

Muri serivisi, 2018 uyigereranyije na 2013, agaciro k’ibyagurishijwe muri serivisi kariyongereye ku kigero cya 105% cyane cyane bitewe n’ubucuruzi mu bwikorezi, ubucuruzi mu mahoteli, kuranguza no kudandaza byiyongereyeho 142%.

Mu 2018 ugereranyije na 2013, ishoramari riturutse hanze (FDI) ryiyongereye ku kigero cya 18.6% naho ishoramari rusange ryazamutse ku kigero cya 9.6%.

Ubucuruzi mpuzamahanga

Icyusho rusange mu bucuruzi gituruka mu bucuruzi bwanditse n’ubutanditse kingana na miliyari 1.6.

Minisitiri w’Intebe Dr Ngirente ati “Mu bucuruzi bwa serivisi cyatewe cyane n’uwikorezi bw’ibintu ku butaka, amakamyo yo hanze akodeshwa akura ibicuruzwa hanze ku byambu bya Mombasa na Dar es Salaam, ariko hari n’ubwikorezi bw’ibintu mu Nyanja, serivisi z’amato akodeshwa, hari ubwikorezi bw’ibintu mu kirere”.

Yakomeje avuga ko mu bucuruzi bw’ibintu icyuho ahanini gituruka ku itumizwa mu mahanga ry’ibikoresho bikoreshwa mu nganda, ubwubatsi n’ibiribwa mu ngo.

Agaciro k’ibyoherezwa mu mahanga kakomeje kwiyongera ku kigero cya 73.8%, bitewe n’uko hari ibishya byiyongereye mu byoherezwa mu mahanga byiyongereye ku kigero cya 337% uhereye mu 2013 kugera mu 2018. Ibitumizwa bikoherezwa mu mahanga byazamutse ku kigero cya 40%.

U Rwanda rwagize umurengera mu bucuruzi butanditse n’ibihugu by’ibituranyi ingana na miliyoni $105 muri 2018, ariko ibyoherejwe mu mahanga bigizwe ahanini n’ibikomoka ku buhinzi. U Rwanda kandi rufite umurengera ku bucuruzi bwa serivisi uturuka ku bukerarugendo na serivisi zitangwa na leta ariko hakaba icyuho mu bucuruzi bwa serivisi cyatewe n’ubwikorezi.

Ubucuruzi n’ibihugu byo mu karere ka EAC bwanditse, ni uko bufite 17.6% by’ibyo u Rwanda rwohereza mu mahanga byose. Rwohereza ibigizwe ahanini n’imboga, impu, amata, imodoka zakoreshejwe akenshi n’ikawa, rukurayo ibigizwe ahanini n’umuceri, ubunyobwa, imbuto n’imboga.

U Rwanda rwohereza cyane ibicuruzwa muri Aziya y’Iburasirazuba, EAC, U Burayi na RDC. Ibyo rwatumije hanze rwabikuye cyane muri Aziya, EAC n’u Burayi.

Minisitiri w'Intebe Dr Ngirente yavuze ko ubucuruzi bw'u Rwanda buhagaze neza mu myaka itanu ishize
Perezida wa Sena Bernard Makuza na Perezida w'Umutwe w'Abadepite Donatille Mukabarisa ubwo Minisitiri w'Intebe yabagezagaho imiterere y'ubucuruzi bw'u Rwanda
Abagize inteko ishinga amategeko imitwe yombi bagezwaho imiterere y'ubucuruzi bw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza