Kabila yohereje intumwa i Kigali mbere y’itangazwa ry’umwanzuro ku bujurire bwa Fayulu

Yanditswe na Rabbi Malo Umucunguzi
Kuya 21 Mutarama 2019 saa 09:59
Yasuwe :
0 0

Perezida wa Repubulika Iharanira Demokarasi ya Congo, Joseph Kabila, yohereje itsinda ryo kuganira na Perezida Paul Kagame unayoboye Umuryango wa Afurika yunze Ubumwe, AU, mbere y’uko urukiko rurinda Itegeko Nshinga rutangaza umwanzuro ku kirego cyatanzwe ku byavuye mu matora ya Perezida aheruka.

Mu ijoro ryo ku wa Gatandatu nibwo urukiko rurengera Itegeko Nshinga rwemeje ko Félix Tshisekedi yatsinze amatora ya Perezida, ngo asimbure Joseph Kabila wayoboraga icyo gihugu guhera mu 2001.

Amajwi y’agateganyo agitangazwa, umukandida wigenga Martin Fayulu yamaganye ibyayavuyemo ahita atanga ikirego ajurira, anasaba ko amajwi yongera akabarurwa.

Hahise havuka imyigaragambyo ndetse abayobozi b’ibihugu bimwe na za Guverinoma zigize AU, ibihugu bigize Umuryango w’Ubukungu bw’ibihugu bya Afurika y’Amajyepfo (SADC) n’ibihugu bya Afurika biri mu kanama k’Umuryango w’Abibumbye gashinzwe umutekano, bahuriye i Addis-Abeba mu nama nyunguranabitekerezo ku kibazo cya RDC.

Umwe mu myanzuro yafashwe wari uwo gusaba icyo gihugu kuba kiretse gutangaza ibyavuye mu matora mu buryo ntakuka, undi uba uw’uko kuri uyu wa Mbere, itsinda rya AU ryagombaga gukorera uruzinduko i Kinshasa rikaganira n’impande zirebwa n’ikibazo.

Gusa nyuma y’uko urukiko rwari rumaze gutangaza umwanzuro warwo ku byavuye mu matora, abaperezida benshi ba Afurika bahise bashimira Tshisekedi nka perezida watowe ndetse AU isubika uruzinduko rw’itsinda ryagombaga kujya i Kinshasa.

Nk’uko tubikesha Ijwi rya Amerika Perezida Kabila yohereje intumwa ze i Kigali zirimo Umuyobozi w’ibiro bye, Néhémie Mwilanya Wilonja; Umuyobozi w’Urwego rushinzwe Iperereza, Kalev Mutond n’Umujyanama we mu bya dipolomasi, Barnabé Kikaya Bin Karubi.

Gusa ntihatangajwe ibyavuye mu biganiro hagati y’impande zombi.

Ikinyamakuru Jeune Afrique giheruka gutangaza ko abakuru b’ibihugu bitabiriye inama i Addis-Abeba, bemeranyaga ko amajwi y’agateganyo yatangajwe na Komisiyo y’Amatora adahuye n’ukuri.

Umwe mu bayitabiriye yavuze ko abayobozi bose nta gushidikanya, bavuze ko uwatsinze amatora ari Martin Fayulu. Ngo ni nayo mpamvu mu itangazo basohoye, bavuze ko gutangaza amajwi ya burundu byaba bisubitswe.

Bemeranyije ko itsinda ryagombaga kujya i Kinshasa riba rigizwe na Perezida Paul Kagame uyobora AU, Perezida w’iyi Komisiyo ya AU, Moussa Faki Mahamat; Perezida wa Namibia, Hage Geingob; Edgar Lungu wa Zambia na Cyril Ramaphosa wa Afurika y’Epfo.

Amakuru avuga ko iri tsinda ryashoboraga gushyiraho amahitamo akomeye kuri Perezida Kabila, arimo ko Komisiyo y’Amatora, yemeza Martin Fayulu ko ari we watsinze cyangwa hakaba andi matora kandi ahuje abantu bose, abahunze igihugu nabo bakayitabira kandi agategurwa na leta y’inzibacyuho, ikayoborwa n’undi bemeranyijweho utari Kabila.

Ingengabihe ya Komisiyo y’amatora muri RDC igaragaza ko Tshisekedi azarahira ku wa 22 Mutarama 2019, agatangira kuyobora RDC muri manda y’imyaka itanu.

Nyuma y’umwanzuro w’urukiko, mu gihe SADC mbere yasabaga ko amajwi yongera kubarurwa, kuri iyi nshuro yashimiye Tshisekedi ndetse isaba inzego zose "Gushyigikira perezida watowe na Guverinoma ye".

Yashimangiye ko ifite icyizere ko perezida watowe azashyikirizwa ubutegetsi mu ituze.

Perezida Kagame ubwo yaganiraga na Kabila muri Kanama 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza