Kudus yegukanye Tour du Rwanda ya 2019, agira ati ‘u Rwanda rubaye imuhira ha kabiri’ (Amafoto)

Yanditswe na Ngabo Roben
Kuya 3 Werurwe 2019 saa 05:19
Yasuwe :
0 0

Isiganwa mpuzamahanga ry’amagare rizenguruka u Rwanda ryageze ku musozo ryegukanwa na Merhawi Kudus Ghebremedhin akoresheje 24:12’37’’, aho nyuma yo gushyikirizwa ibihembo yemeje ko u Rwanda rubaye igihugu cye cya kabiri inyuma ya Érythrée avukamo.

Kuva tariki 24 Gashyantare kugera kuri iki Cyumweru tariki 3 Werurwe 2019, intara zose z’u Rwanda zagezweho n’iri siganwa ryahuje abakinnyi 78 bavuye mu makipe 16.

Uduce umunani tw’iri siganwa twegukanywe n’Umutaliyani Alessandro Fedeli ukinira Delko Marseille Provence yo mu Bufaransa, Umunya- Érythrée Merhawi Kudus wa Astana Pro Team wegukanye tubiri, Umunya-Colombia Edwin Alcibiades Ávila Vanegas wa Israel Cycling Academy, Umunya-Érythrée, Biniyam Ghirmay, Przemysław Kasperkiewicz ukomoka muri Pologne ukinira Delko Marseille Provence, Debesay Yakob wa Érythrée n’umunya-Colombia ukinira Astana Pro Team, Rodrigo Contreras Pinzón wasoje atsinze agace ka Munani.

Muri aka gace ka munani kahagurutse i Kanombe mu Murenge wa Nyarugunga, abasiganwa basoreje kuri Tapis Rouge i Nyamirambo babanje kuzenguruka ibice bitandukanye by’Umujyi wa Kigali birimo umuhanda w’amabuye w’aho bita kwa Mutwe, Rodrigo Contreras Pinzón yasize abandi muri aka gace gasoza utundi kari gafite ibilometero 61.7.

Uyu mugabo w’imyaka 25 yakoresheje 01:33’10’’, akurikirwa na mugenzi we Merhawi Kudus bakinana wakoresheje 01:34’16’’, naho ku mwanya wa Gatatu haza Alessandro Fedeli wakoresheje 01:34’16’’.

Umunyarwanda waje hafi ni Ndayisenga Valens wasoreje ku mwanya wa 10 asigwa umunota n’amasegonda 12 n’uwa mbere kuko yakoresheje 01:34’22’’. Yakurikiwe na Areruya Joseph wakoresheje 01:34’33’’ aza ku mwanya wa 12.

Ku rutonde rusange rwa Tour du Rwanda ya 2019 yari ifite ibilometero 953.6, haje Merhawi Kudus wakoresheje 24:12’37’’. Yakurikiwe n’umunya-Estonia ukinira Direct Energie, Rein Taaramäe wakoresheje 24 :12’47’’.

Umunyarwanda waje hafi ni Areruya Joseph wa Delko Marseille Provence yo mu Bufaransa wakoresheje 24 :19’47’’ asoza arushwa na Kudus wegukanye isiganwa iminota irindwi n’amasegonda.

Nyuma y’iri suganwa Kudus yabwiye IGIHE ko yishimiye uko isiganwa ryagenze.

Ati ‘‘Ndishimye cyane. Ndashimira na bagenzi banjye bambaye hafi kuva ku munsi wa mbere w’isiganwa. Sinemeranya n’abavuga ko ikipe y’igihugu ya Érythrée yamfashije kuko nabo batsinze uduce tubiri. Bifuzaga kwitwara neza ntabwo bari kumfasha.’’

‘‘Nishimiye buri kimwe hano mu Rwanda. Iki gihugu ni igitangaza. Abantu bakira neza ababagana, imihanda ni myiza, imisozi yorohereza abakinnyi bazamuka nkatwe, ni byinshi navuga ariko muri rusange nishimiye u Rwanda cyane. Kuri njye ubu ni imuhira ha kabiri.’’

Nyuma yo kwegukana umwenda w’umuhondo, Kudus yahembwe amadolari 4 000 $ angana asaga miliyoni eshatu n’igice.

Ibihembo byatanzwe nyuma y’isiganwa

-  Umwenda utangwa na Skol uhabwa uwegukanye agace: Rodrigo Contreras Pinzón (Astana Pro Team)

-  Umwenda w’Umuhondo utangwa na Minispoc uhabwa uri imbere ku rutonde rusange: Merhawi Kudus (Astana Pro Team)

-  Umwenda utangwa na Cogebanque uhabwa urusha abandi guterera imisozi: Debesay Yakob (Érythrée)

-  Umwenda w’urusha abandi Sprint utangwa na SP: Du Plooy Rohan (Pro-Touch)

-  Umwenda w’umukinnyi ukiri muto witwaye neza utangwa na Prime Insurance Ltd: Debesay Yakob (Érythrée)

-  Umwenda w’urusha abandi guhangana utangwa na Rwanda Tea: Mugisha Moise (Team Rwanda)

-  Umwenda w’umunyafurika uri imbere uhembwa na RwandaAir: Merhawi Kudus (Astana Pro Team, Érythrée)

-  Umwenda w’umunyarwanda uri imbere ku rutonde rusange utangwa na RDB: Areruya Joseph (Delko Marseille Provence)

-  Ikipe yahize izindi yahembwe umwenda w’Inyange Industries: Érythrée

Uko bakurikiranye ku rutonde rusange

1. Kudus Merhawi (Astana pro team): 24:12’37’’

2. Taaramae Rein (Direct Energie): 24:12’47’’

3. Badilatti Matteo (Israel cycling Academy): 24:12’55’’

4. Aguirre Caipa Hernan Ricardo (Interpro Cycling Academy): 24:13’08’’

5. Tesfom Sirak (Érythrée): 24:16’41’’

6. Lozano Riba David (Team novo nordisk): 24:17’27’’

7. Debesay Abreham Yakob (Érythrée): 24:19’28’’

8. Kangangi Suleiman (Kenya) : 24 :19’42’’

9. Areruya Joseph (Delko Marseille Provence) : 24 :19’47’’

10.Contreras Pinzon Rodrigo (Astana pro team ): 24:19’48’’

Uko Abanyarwanda bitwaye muri iri siganwa

9.Areruya Joseph (Delko Marseille Provence): 24 :19’47’’

13. Ndayisenga Valens (Team Rwanda) : 24:25’22’’

18. Mugisha Samuel (Dimension Data for Qhubeka): 24:27’56’’

21. Manizabayo Eric (Benediction Excel energy): 24:31’03’’

22. Munyaneza Didier (Benediction Excel energy):24:31’38’’

32. Byukusenge Patrick (Benediction Excel energy): 24:52’26’’

39.Nsengimana Jean Bosco (Benediction Excel energy) : 25:02’24’’

40.Mugisha Moise (Team Rwanda):25:05’24’’

49.Ruberwa Jean Damascène (Team Rwanda) : 25:32’49’’

52. Uwizeyimana Bonaventure (Benediction Excel energy) : 25:44’26’’

Kanda hano urebe andi mafoto

Ibyishimo byasaze abanya-Érythrée
Du Plooy Rohan yahembwe na SP nk'urusha abandi Sprint
Ikipe yahize izindi yahembwe umwenda wa Inyange Industries ni Érythrée
Ku munsi wa nyuma Debesay Yakob niwe wahembwe nk'urusha abandi mu misozi
Kudus yahembwe na RwandAir nk'Umunyafurika witwaye neza kurusha abandi
Mugisha Moise yahembwe na Rwanda Tea nk'urusha abandi guhatana
Iyo bamanuka umuvuduko uba uri mwinshi ku kigero cy'ibilometero 92 ku isaha
Hari ubwo bisaba gushinyiriza
Bonaventure Uwizeyimana niwe munyarwanda waje inyuma ku rutonde rusange (52)
Du Plooy Rohan ukinira Pro-Touch yo muri Afurika y'Epfo niwe warushije abandi Sprint kuva isiganwa ryatangira
Areruya Joseph ahangana n'urukuta rwa Kigali
Kudus na bagenzi be bazamuka kwa Mutwe
Manizabayo Eric bita Karadiyo w'imyaka 19 gusa ari mu bakinnyi batunguranye
Rodrigo Contreras azamuka kwa Mutwe agana ku ntsinzi
Ruberwa Jean Damascène wa Team Rwanda ntabwo yagendekewe neza n'iri siganwa
Rodrigo Contreras Pinzón niwe wegukanye agace ka nyuma ka Tour du Rwanda
Kudus asatira umurongo wo gusorezaho i Nyamirambo
Mu buryo butangaje, Kudus yishimiye intsinzi hamwe n'abakinnyi ba Érythrée kandi bari mu bo bari bahanganye
Kudus yavanye mu Rwanda ishema
Byari ibirori mu gusoza iri siganwa
Cogebanque niyo muterankunga mukuru w'iri rushanwa

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza