Minisitiri Kabarebe yamaganye ubwicanyi bukorerwa inzirakarengane muri Sudan y’Epfo

Yanditswe na Evariste Nsengimana
Kuya 28 Nyakanga 2018 saa 10:17
Yasuwe :
0 0

Minisitiri w’Ingabo w’u Rwanda, akaba n’Umuyobozi w’Inama y’Abaminisitiri b’Ingabo n’Umutekano bo mu mutwe wa EASF, Gen. James Kabarebe, yamaganye ubwicanyi bukomeje gukorerwa abaturage bo muri Sudan y’Epfo bazira ubusa, asaba abayobozi bo mu Karere icyo gihugu giherereyemo gushyiraho ingamba zihamye hakaboneka amahoro n’umutekano.

Yabivugiye i Kigali ku wa 26 Nyakanga 2018, atangiza Inama ya 24 ihuza ba Minisitiri b’Ingabo n’Umutekano bo mu muryango w’Ingabo zishinzwe gutabara aho rukomeye mu karere ka Afurika y’Iburasirazuba (EASF).

Kuri ubu abantu babarirwa mu bihumbi muri Sudan y’Epfo barimo abana n’abakuru baricwa umunsi ku wundi, abandi benshi bagahunga intambara imaze imyaka isaga itanu, ishyamiranije ingabo za Perezida Salva Kiir na Riek Machar utavuga rumwe n’ubutegetsi.

Minisitiri Kabarebe yibukije abo bayobozi ko ari ikibazo gikomeye cyane gikwiye gufatirwa ingamba zihamye.

Ati “Mu buryo bugaragaza neza amakimbirane ari muri Sudan y’Epfo, ndashaka kongera kugaragaza ko mbona ikibazo cyo muri kariya gace gihangayikishije [..] namaganye ubwicanyi bw’inzirakarengane butagize icyo bushingiyeho, buri gukorerwa abaturage n’ubugizi bwa nabi buri gukorerwayo.”

Iki gihugu kivutse vuba ku mugabane wa Afurika nyuma yo kwiyomora kuri Sudan yari ihatse ibindi mu bunini, amakimbirane akirimo ateye inkeke ku bihugu bituranye bigize EASF birimo Ethiopia, Kenya na Uganda, kuko bishobora gutuma umutekano mu Karere biherereye utaba mwiza.

Ibiganiro bigamije kugarura amahoro muri Sudan y’Epfo hagati ya Perezida Kiir na Machar, byagiye binanirwa gutanga umusaruro uhamye, bikomeza gutiza umurindi ihohoterwa rikorerwa abaturage n’ibindi bibazo birimo n’inzara.

Kabarebe yavuze ko abayobozi bakwiye kuvugurura Politiki n’imico y’ibihugu byabo bigira uruhare mu makimbirane no kongera gushyiraho ingamba zihamye ku bibazo byugarije Akarere, cyane cyane mu kuvugurura uburyo bwo kwitegura kubikumira.

Yunzemo ati “Inama y’umuryango ikwiye kwibanda ku buryo nyabwo bwo kugaragaza inkomoko y’amakimbirane n’ibibazo bikomeje kwibasira Afurika y’Iburasirazuba.”

Kabarebe yakomeje asaba abitabiriye iyo nama guhuriza hamwe imbaraga mu rwego rwo gushyiraho uburyo buhamye bwo kubungabunga amahoro mu karere.

Aba bayobozi banaganiriye ku buryo buhamye bwo kongerera ubushobozi uyu mutwe, harimo nko kongera ubushobozi bw’ikigega kiwutera inkunga, baheruka gutangaza ko kirimo ari munsi ya miliyoni ebyiri z’amadolari yo gutera inkunga ibikorwa by’ubutabazi.

Minisitiri w'Ingabo Gen James Kabarebe yamaganye ubwicanyi bukorerwa abaturage muri Sudan y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza