Minisitiri Uwacu Julienne yahaye ikaze amakipe yitabiriye Tour du Rwanda

Yanditswe na Manzi Rema Jules
Kuya 5 Kanama 2018 saa 09:08
Yasuwe :
0 0

Minisitiri wa Siporo n’Umuco mu Rwanda, Uwacu Julienne, yahaye ikaze amakipe yose yitabiriye Tour du Rwanda 2018, ayizeza isiganwa riteguye neza mu gihugu cyuje umutekano anasaba Abanyarwanda kuzafana ari benshi ku mihanda aho isiganwa rizanyura.

Ku mugoroba wo kuri uyu wa Gatandatu kuri Kigali Convention Centre habereye umuhango wo kwerekana amakipe yose azitabira Tour du Rwanda 2018, aho abakinnyi bagize buri imwe bagiye bazamuka ahirengeye bagasuhuza abari bitabiriye uyu muhango.

Minisitiri wa Siporo n’Umuco mu Rwanda, Uwacu Julienne wari umushyitsi mukuru yahaye ikaze amakipe yose anayifuriza kuzitwara neza maze irusha izindi ikaba ariyo itsinda.


Yagize ati "Ni ishema rikomeye kuri njye kubaha ikaze muri ibi birori bya siporo y’umukino w’amagare. U Rwanda rwishimiye kubakira muri Tour du Rwanda igiye kuba ku nshuro ya 10 by’umwihariko ikaba izanakurikirwa na Perezida wa UCI, David Lappartient na Visi Perezida akaba na Perezida w’Impuzamashyirahamwe y’umukino w’amagare muri Afurika, Dr Mohamed Wagih Azzam."

Minisitiri Uwacu yibukije ko iyi ariyo Tour du Rwanda ya nyuma igiye kuba iri ku rwego rwa 2.2 ku bipimo bya UCI kuko umwaka utaha izahita izamurwa ikajya kuri 2.1 bizatuma iba iya mbere ikomeye muri Afurika kimwe na La Tropical Amissa Bongo.

Yavuze ko u Rwanda ruzakomeza gukora ibishoboka byose kugira ngo iri siganwa rikomeze kuba icyitegererezo.

Perezida w’Ishyirahamwe ry’Umukino w’Amagare ku Isi, David Lappartient, yagaragaje ibyishimo bikomeye yatewe no kwitabira Tour du Rwanda ndetse akaba yanditse amateka ko ariwe Perezida wa mbere ubashije kwitabira iri siganwa yemeza ko riri mu ya mbere aryoheye ijisho ku mugabane wa Afurika.

Yagize ati "Nishimiye kuba ndi hano nitabiriye Tour du Rwanda ku nshuro yayo 10. Ni ku nshuro ya mbere Perezida wa UCI yitabiriye Tour du Rwanda, niteze kuzaryoherwa na rimwe mu masiganwa abereye ijisho mu mukino wo gusiganwa ku magare muri Afurika."

Lappartient wanasuye ikigo cyigisha umukino w’amagare kiri i Musanze ‘Africa Rising Cycling Center’ kuri uyu wa Gatandatu, yavuze ko akurikije ubushake u Rwanda rufite mu guteza imbere umukino w’amagare yasanze biri ngombwa ko iki kigo cyakongererwa ubushobozi kikajya ku rwego rwa UCI ndetse hakaba hari n’izindi gahunda nyinshi bagiye gufatanya na Ferwacy.

Amakipe yerekanywe agomba kwitabira Tour du Rwanda 2018 arimo Ikipe y’u Rwanda, iya Afurika y’Epfo, iya Ethiopia, Les Amis Sportif na Bénédiction Club zo mu Rwanda, GSP Algeria, SNH Velo Club yo muri Cameroun, Kenyan Riders Safaricom, Team Sampada yo muri Afurika y’Epfo inakinamo Umunyarwanda Adrien Niyonshuti, Bai Sicasal- Petro de Luanda yo muri Angola.

Hazanitabira amakipe atandukanye yavuye hanze y’umugabane wa Afurika arimo Team Loup Suisse Romandie yo mu Busuwisi, Marc Pro GYM One Cycling Team yo muri USA, Team Haute-Savoie Rhône Alpes yo mu Bufaransa, Team Embrace The World yo mu Budage na Equipe De POC Côte De Lumière nayo yo mu Bufaransa ikinamo Ndayisenga Valens na Claude Uwizeye.

Tour du Rwanda iratangira kuri iki Cyumweru hakinwa agace ka mbere kabera i Rwamagana ku ntera y’ibilometero 104, hakazakurikira aka Kigali-Huye kareshya na 120,3 Km, ku wa kabiri hakazakinwa agace ka Huye-Musanze kareshya na 195,3Km ari nako karekare uyu mwaka.

Tariki 8 Kanama hazakinwa Musanze-Karongi kareshya na 135,8 Km, bukeye bave i Karongi bajya i Rubavu hareshya na 95,1 Km tariki 10 Kanama bakine agace ka Rubavu-Kinigi (Parike y’Ibirunga) kareshya na 108,5 km tariki 11 hakinwe aka Musanze- Kigali (imbere ya MIC) hareshya 107,4 km naho tariki 12 hazakorwe agace ko kuzenguruka muri Kigali.

Amafoto: Tour du Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza