Minisitiri Uwacu yibukije ko umurimo unoze kandi ukorewe igihe ari ishingiro ryo kwigira

Yanditswe na Akayezu Jean de Dieu
Kuya 3 Kanama 2018 saa 02:57
Yasuwe :
0 0

Minisitiri w’Umuco na Siporo, Uwacu Julienne yasabye abanyarwanda kurangwa n’umuco wo gutanga serivisi nziza bazirikana ko umurimo unoze kandi ukorewe igihe, ari ishingiro ryo kwigira no kwihesha agaciro.

Yabigarutseho kuri uyu wa 3 Kanama 2018, mu butumwa yagejeje ku bitabiriye ibirori byo kwizihiza umunsi w’umuganura ku rwego rw’igihugu, byabereye mu Karere ka Nyanza gafatwa nk’akarere k’ubukerarugendo bushingiye ku muco mu Ntara y’Amajyepfo.

Minisitiri Uwacu yavuze ko muri iki gihe kuganura bitagishingiye gusa ku musaruro w’ubuhinzi n’ubworozi. Yavuze kandi ko muri uyu mwaka umusaruro mu bintu byose wazamutse ku kigero gishimishije ugereranyije n’umwaka ushize.

Yagize ati “Imbumbe y’musaruro ukomoka ku buhinzi n’ubworozi wazamutse ku kigero cya 8% bitewe n’umusaruro wabaye mwiza, mu bucuruzi n’inganda byazamutse kuri 7% bishingiye ku guteza imbere ibikorerwa mu Rwanda (Made In Rwanda)”.

Yavuze ko serivisi yagize uruhare rukomeye mu kuzamura ubukungu bw’igihugu aho yazamutse ku kigero cya 12%.

Ababonye umusaruro mwiza bagerageza gufasha abatarabashije kuwubona aho muri Nyanza bafashije kuremera abaturage batishoboye bagahabwa ibiribwa, ubwisungane mu kwivuza n’abahawe inka muri gahunda ya Girinka.

Agaruka ku nsanganyamatsiko y’uyu mwaka igira iti ‘nsanganyamatsiko y’uyu mwaka ‘Umuganuro, umuco n’isooko y’ubumwe n’ishingiro ryo kwigira’, Minisitiri Uwacu yasabye abanyarwanda kurangwa n’umurimo unoze kandi ukorewe igihe gikwiye.

Ati ‘Buri muntu wese akaba asabwa gukora atikoresheje kuko umurimo unoze kandi ukorewe igihe ariwo uzatuma turushaho kwigira no kwihesha agaciro.”

Guverineri w’Intara y’Amajyepfo, Mureshyankwano Marie Rose, yashimiye Leta y’u Rwanda, yagaruye umuganura wari waraciwe n’abakoloni.

Yavuze ko muri iyi ntara abaturage bafite ibibatunga bihagije kuko umusaruro w’ibihingwa, ukomoka ku bworozi n’uwo mu nganda wiyongereye cyane ugeraranyije n’umwaka ushize, aho hashyizwemo imbaraga imyumbati ikaba yaragarutse yiyongera ku bijumba, ibigori n’ibindi byeze.

Umuganura w’uyu mwaka wahuriranye n’ibirori byo gusoza icyumweru cy’Iserukiramuco Nyafurika ry’Imbyino ‘Fespad’ ryaberaga mu Rwanda ku nshuro ya cumi. Ibi birori byakurikiwe kandi n’igitaramo cy’umuganura cy ‘i Nyanza Twataramye’ cyabaye mu ijoro ryo ku wa 2 Kanama 2018.

Ibi birori byo kwizihiza umunsi w’umuganura byari byitabiriwe kandi n’abashyitsi barimo Minisitiri w’Umuco n’Ubugeni muri Senegal, Abdou Latif Coulibaly na Minisitiri w’Umuco, Ubugeni n’Ubukerarugendo w’igihugu cya Burkinafaso, Abdoul Karim Sango n’abandi bahagarariye ibihugu byabo mu Rwanda.

Wabaye kandi umwanya wo kumurika Inyambo zo mu Rukari no guha abana amata ndetse n’itorero ry’Igihugu, Urukerereza, risusurutsa abitabiriye ibirori.

Guverineri w'Intara y'Amajyepfo (ibumoso), Minisitiri Uwacu n'abandi bitabiriye umuganura
Kwizihiza umuganura byitabiriwe n'abantu b'ingeri zitandukanye
Umunyamabanga wa Leta muri Minisiteri y'Ububanyi n'Amahanga, Nduhungirehe Olivier (uwa kabiri uturutse iburyo) mu bitabiriye Umuganura
Itorero Urukerereza ryasusurukije abitabiriye Umuganura i Nyanza
Nyuma y'umuhango wo kumurika Inyambo abana bahawe amata

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza