Minisitiri w’Intebe w’u Buhinde azasura u Rwanda yitwaje inkuyo mu biganza

Yanditswe na Cyprien Niyomwungeri
Kuya 21 Nyakanga 2018 saa 08:00
Yasuwe :
0 1

Minisitiri w’Intebe w’u Buhinde, Narendra Modi, azagirira uruzinduko rw’amateka mu Rwanda kuwa 23-24 Nyakanga 2018, aho azaba yitwaje impano y’inka 200 yageneye abaturage bo mu Murenge wa Rweru ho mu Karere ka Bugesera.

Modi niwe Minisitiri w’Intebe wa mbere w’u Buhinde uzaba asuye u Rwanda. Impano y’inka azatanga zizaba zigamije gushyigikira gahunda ya Girinka yo gufasha imiryango itishoboye kongera umusaruro w’ubuhinzi no guteza imbere imirire myiza n’iterambere muri rusange.

Minisiteri y’Ububanyi n’Amahanga y’u Buhinde, yatangaje ko ‘mu Rwanda Minisitiri w’Intebe, Narendra, azasura urwibutso rwa Jenoside ndetse anashyigikire gahunda Girinka, yatangijwe na Perezida Kagame”.

Umunyamabanga muri ’iyi Minisiteri, ushinzwe umubano mu by’ubukungu, T.S Tirumurti, yakomeje avuga ko Narendra, azajya mu Murenge wa Rweru gutanga impano y’inka zizaba zatanzwe n’u Buhinde ariko zikomoka mu Rwanda.

Yagize ati “Nk’uko iyi gahunda ifitwemo uruhare na Perezida Kagame ubwe, twumva natwe ari ingenzi ko tuyigiramo uruhare”.

Yakomeje atangaza ko Modi azakirwa na Perezida Kagame n’itsinda azaba ayoboye bagirane ibiganiro, aganire n’ihuriro ry’abashoramari n’abacuruzi hanyuma aganire n’Abahinde baba mu Rwanda.

Tirumurti yavuze ko hazanasinywa amasezerano arimo ay’ubufatanye mu by’ingabo ndetse bidatinze hazafungurwa Ambasade y’iki gihugu mu Rwanda.

Yagize ati “Muri uru ruzinduko twiteze gusoza amasezerano abiri y’inguzanyo, amwe ya miliyoni 100 z’amadolari yo guteza imbere ibice byahariwe inganda ndetse n’igice cyahariwe inganda cya Kigali (Kigali Special Economic Zone), n’andi ya miliyoni 100 z’amadolari zo guteza imbere ubuhinzi na gahunda yo kuhira”.

U Rwanda ruherutse kwemeza ko uwitwa Oscar Kerketta ahagararira u Buhinde mu Rwanda ku rwego rwa Ambasaderi, afite icyicaro i Kigali. Niwe wa mbere ugize icyicaro i Kigali kuko ubusanzwe Ambasade y’u Buhinde muri Uganda ari yo yakurikiranaga ibikorwa byabwo mu Rwanda n’u Burundi.

Umwaka ushize Perezida Kagame yagiye mu Buhinde yitabiriye Inama ya 8 ku Iterambere rya Leta ya Gujarat, Vibrant Gujarat Global Summit, aho yaganiriye na Minisitiri w’Intebe Narendra, ku ngingo zitandukanye zijyanye no gukomeza umubano uri hagati y’ibihugu byombi.

Hanabayeho gusinya amasezerano y’ubufatanye hagati y’ibihugu byombi aho u Buhinde bwafasha u Rwanda mu kwifashisha siyansi mu bikorwa bitandukanye birimo nko gukora iperereza cyangwa kugenza ibyaha. Ikindi kandi ni ukuba u Rwanda rwakwinjira mu ihuriro ihuriro ry’ibihugu biharanira kubyaza umusaruro ingufu z’izuba rizwi nka ’ International Solar Alliance’.

Muri Werurwe uyu mwaka abayobozi bombi bagiranye ibiganiro bemeranya ku buryo bwakoreshwa mu kongerera ubushobozi inzego mu bihugu byombi n’ubuhahirane mu bucuruzi.

U Rwanda rufite Abahinde bagera ku 3,000, bagaragara mu bikorwa bitandukanye by’ubucuruzi burimo ibikoresho by’ikoranabuhanga, ibinyabiziga, inganda n’ibindi.

Ibihugu by’u Rwanda n’u Buhinde bisa n’ibyavuguruye umubano wabyo ku buryo kuri ubu ikompanyi ya Rwandair isigaye ikora ingendo zigera mu Mujyi wa Mumbai kuva tariki ya 4 Mata 2017.

U Rwanda n’u Buhinde bifitanye umubano ukomeye mu ngeri zitandukanye. Mu 2011 u Buhinde bwagurije u Rwanda miliyoni 80 z’amadolari zo kubaka urugomero rwa Nyabarongo I, rutanga megawatt 27 z’amashanyarazi; mu 2013 bwatanze inguzanyo ya miliyoni 120.05 z’amadolari mu mushinga wo kuhira mu Karere ka Kirehe; mu 2016 buguriza u Rwanda miliyoni 81 z’amadolari zo kubaka amashuri y’imyuga n’ibigo bihugura urubyiruko ku kwihangira imirimo.

Muri Gicurasi uyu mwaka ibihugu byombi byasinyanye amasezerano y’inguzanyo ya miliyoni 66.6 z’amadolari, ni ukuvuga miliyari zigera kuri 56 z’amafaranga y’u Rwanda, yo kubaka umuhanda Base-Butaro-Kidaho mu Ntara y’Amajyaruguru.

Umubano w’u Rwanda n’u Buhinde mu bya dipolomasi watangiye mu 1999. Muri iki gihe Abahinde bakomeje gushora imari ifatika mu Rwanda, kuko nko hagati ya 2011-2016 habarurwa imishinga 66 ifite agaciro ka miliyoni $317, harimo ikomeye nka Airtel, Zinc Hotel na Kaminuza ya Mahatma Gandhi. Bafite kandi ishoramari mu ruganda rw’icyayi rwa Gisovu, Imana Steel, Sahasra Electronic Pvt Ltd n’ahandi.

Perezida Kagame yahuye na Minisitiri w’Intebe Narendra Modi yitabiriye Inama ya 8 ku Iterambere rya Leta ya Gujarat
Minisitiri w'Intebe, Narendra ashyikiriza Perezida Kagame impano y'ifoto y'urwibutso
Minisitiri w'Intebe Narendra asuhuzanya n'Umuyobozi Mukuru w'Ikigo cy'igihugu cy'Iterambere (RDB), Clare Akamanzi
Impande zombi zagiranye ibiganiro mu bihe bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza